Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

Broshua Inayofundisha kwa Kutumia Picha na Inayopatikana Katika Lugha Nyingi

Broshua Inayofundisha kwa Kutumia Picha na Inayopatikana Katika Lugha Nyingi

Odval anaishi Mongolia. Hana uhakika sana ana umri gani lakini anafikiri alizaliwa mwaka wa 1921. Alipokuwa mchanga alitunza mifugo ya wazazi wake, na alihudhuria shule kwa mwaka mmoja tu. Odval hajui kusoma. Hata hivyo, hivi karibuni broshua mpya maridadi ilimsaidia kumjua Mungu na kujifunza kuhusu wakati ujao wenye furaha ambao wale wanaomsikiliza Mungu watafurahia. Amefurahia sana kujifunza mambo hayo.

Broshua hiyo ilichapishwa na Mashahidi wa Yehova mwaka wa 2011 na inapatikana katika matoleo mawili. Matoleo yote mawili ya broshua hizo yana picha mbalimbali zenye kuvutia. Hata hivyo, toleo moja lina maandishi mengi kuliko lingine.

Hivi karibuni toleo la broshua hiyo lenye maandishi mengi, Msikilize Mungu Uishi Milele, litapatikana katika lugha 583; na broshua hiyo nyingine inayoitwa, Msikilize Mungu, itapatikana katika lugha 483. Linganisha idadi hiyo na hati ya shirika la Umoja wa Mataifa inayoitwa Azimio la Watu Wote la Haki za Kibinadamu (Universal Declaration of Human Rights) ambayo kufikia Oktoba 2013 ilikuwa imetafsiriwa katika lugha 413. Isitoshe, tayari nakala zaidi ya milioni 80 za matoleo yote mawili ya broshua hiyo zimesambazwa kote ulimwenguni.

Nchini Brazili, mwanamke mmoja mzee alifurahi sana kupata broshua Msikilize Mungu na alisema hivi: “Ninafurahi kujua kwamba kuna watu wanaowajali wale walio katika hali kama yangu. Hapo awali sikukubali kuchukua magazeti yenu kwa sababu sijui kusoma. Lakini ninataka broshua hii.”

Brigitte, mwanamke asiye na elimu anayeishi nchini Ufaransa alisema hivi: “Mimi huzitazama picha zilizo katika broshua hii kila siku.”

Shahidi mwingine kutoka Afrika Kusini aliandika hivi: “Sikuwahi kupata broshua nzuri ya kutumia kuwahubiria Wachina kweli za Biblia. Kupitia broshua hii nimeanzisha mazungumzo na watu wenye viwango mbalimbali vya elimu kutia ndani wahitimu wa vyuo vikuu, watu werevu sana, na pia watu ambao hawawezi kusoma. Broshua Msikilize Mungu Uishi Milele imenisaidia kuwafundisha watu kweli za Biblia na kuwasaidia wazishike kweli hizo haraka sana. Nimefaulu kuweka msingi mzuri wa mazungumzo kwa nusu saa tu.

Mashahidi wawili wa Yehova huko Ujerumani wanajifunza Biblia na wenzi wa ndoa wenye elimu ya juu. Mume alipendezwa sana na broshua hiyo hivi kwamba aliuliza hivi: “Kwa nini hamkunipa broshua hii mapema? Inanisaidia kuelewa matukio na mafundisho ya Biblia kwa njia rahisi sana.”

Mwanamke mmoja kiziwi kutoka Australia alisema hivi: “Kwa miaka mingi niliishi pamoja na watawa kwenye makao yao. Nilikuwa karibu sana na viongozi wa dini. Hata hivyo hakuna hata mmoja wao aliyenifundisha Ufalme wa Mungu ni nini. Picha zilizo kwenye broshua hii zimenisaidia kuelewa maana ya andiko la Mathayo 6:10.”

Ofisi ya tawi ya Mashahidi wa Yehova huko Kanada iliandika hivi: “Baada ya kupata broshua Msikilize Mungu katika lugha ya Krio, watu wengi katika jamii ya watu wa Sierra Leone wamechochewa kusema kwamba Mashahidi wa Yehova wanashiriki kwa bidii ujumbe wa Biblia pamoja na watu wengine. Wengine wamesema hivi, ‘Watu wengi hawajali, lakini ninyi mnatujali sana.’ ”

Pata Kujua Mengi Zaidi

Mnara wa Mlinzi—Gazeti Lisilo na Kifani

Tunachapisha na kusambaza gazeti la Mnara wa Mlinzi ulimwenguni pote katika lugha zaidi ya 190. Usambazaji huo unalinganaje na wa machapisho mengine?