Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

Baraza Linaloongoza Lawatia Moyo Mashahidi Nchini Urusi na Ukrainia

Baada ya kusikiliza barua muhimu iliyosomwa na Stephen Lett, mshiriki wa Baraza Linaloongoza la Mashahidi wa Yehova, mwanamke mmoja nchini Ukrainia alisema hivi: “Tulihisi kwamba tunapendwa sana!” Alikuwa miongoni mwa Mashahidi 165,000 waliomsikiliza Ndugu Lett wakati wa ziara yake katika nchi hiyo katika mwisho-juma wa Mei 10 na 11, 2014.

Hotuba zinazotegemea Maandiko pamoja na barua hiyo zilitafsiriwa katika lugha tano na kusikilizwa katika Majumba ya Ufalme 700 hivi yaliyounganishwa kotekote nchini Ukrainia.

Katika mwisho-juma huo, Mark Sanderson, ambaye pia ni mshiriki wa Baraza Linaloongoza, alisoma barua hiyo katika programu iliyotolewa kwa ndugu zetu kotekote nchini Urusi. Programu hiyo ilitafsiriwa katika lugha 14, na watu 180,413 katika makutaniko zaidi ya 2,500 nchini Belarus na Urusi waliunganishwa ili kusikiliza.

Barua hiyo iliyotoka kwa Baraza Linaloongoza, iliandikiwa makutaniko yote nchini Urusi na Ukrainia. Ndugu Sanderson aliisoma katika Kirusi, jambo lililofanya ofisi ya tawi ya Urusi iandike hivi: “Ndugu na dada wameguswa sana kwamba Baraza Linaloongoza linapendezwa sana na sehemu hii ya ulimwengu. Sisi sote tulihisi kana kwamba Baraza Linaloongoza linatukumbatia.”

Barua hiyo ilikusudiwa kuwafariji na kuwaimarisha Mashahidi katika eneo hilo ambalo limekumbwa na msukosuko wa kisiasa. Iliwahimiza akina ndugu waendelee ‘kutokuwa sehemu ya ulimwengu’ kwa kutounga mkono upande wowote katika masuala ya kisiasa ya ulimwengu huu.—Yohana 17:16.

Ili wafaulu, Baraza Linaloongoza liliwatia moyo Mashahidi wadumishe uhusiano wa karibu na Yehova kupitia sala, kujifunza, na kutafakari Neno la Mungu. Wasikilizaji walikumbushwa kwamba hata iwe watakabili jaribu gani, wanaweza kuwa na tumaini katika ahadi hakika ya Mungu iliyo kwenye kitabu cha Isaya 54:17: “Silaha yoyote itakayofanywa juu yako haitafanikiwa.”

Barua hiyo kutoka kwa Baraza Linaloongoza ilisema hivi mwishoni: “Tunawapenda sana nyinyi nyote. Muwe na hakika kwamba tunawafikiria sana na tunatoa dua kwa Yehova kwa niaba yenu.”

Ofisi ya tawi ya Mashahidi wa Yehova nchini Ukrainia ilisema hivi kuhusu ziara hizo: “Akina ndugu walifurahia sana upendo na ufikirio wa Baraza Linaloongoza. Ziara ya Ndugu Lett na Ndugu Sanderson nchini Ukrainia na Urusi mwisho-juma uleule zilithibitisha kwamba watu wa Mungu wana umoja na kuwaonyesha akina ndugu jinsi ambavyo Yehova na Yesu wanawajali. Sote tulikubali kwamba huo ulikuwa wakati unaofaa kwa ajili ya ziara hizo, na tunahisi kuwa tumeimarishwa ili tuendelee kumtumikia Yehova licha ya magumu ambayo huenda tukakabili.”

Pata Kujua Mengi Zaidi

Amani Duniani—Kwa Nini Haipatikani?

Jitihada za wanadamu za kuleta amani duniani hazijafanikiwa. Chunguza sababu kadhaa.

Kwa Nini Mashahidi wa Yehova Hawajihusishi na Siasa?

Je, wanahatarisha usalama wa nchi?