Sawa na nchi nyingine nyingi, Australia ina watu wengi sana waliozeeka. Baadhi ya wazee hao huanza kuishi katika makao ya kuwatunzia wazee, ambako wahudumu husaidia kushughulikia mahitaji yao ya kila siku na afya zao.

Bila shaka, wengi wanaoishi katika makao hayo ya kuwatunzia wazee wanahitaji mengi zaidi ya msaada wa kimwili. Nyakati nyingine, huenda wakajihisi wamechoshwa, wapweke, au hata kuwa wasiojiweza. Mashahidi wa Yehova huwapa faraja na tumaini wanapotembelea makao mawili ya kuwatunzia wazee kila juma katika mji wa Portland, ulio katika jiji la Victoria, Australia.

Mazungumzo ya Biblia Yaliyokusudiwa Hasa Wakaaji wa Makao ya Kuwatunzia Wazee

Mashahidi katika eneo hilo hukutana na kikundi cha wakaaji na kuzungumzia habari za Biblia, kama vile matukio muhimu katika maisha ya Yesu. Jason anasema hivi: “Sisi husoma simulizi la Biblia pamoja na wazee hao, kisha tunazungumzia simulizi hilo.” Kwa kuwa wengi wa wasikilizaji wanakabiliwa na matatizo ya afya, Mashahidi huwapa tumaini na kuwatia moyo kwa kuzungumzia ahadi ya Mungu ya kuondoa kabisa magonjwa na kifo.

Tony, Shahidi wa eneo hilo anasema hivi: “Mwanzoni tuliwatembelea kwa nusu saa hivi, lakini wakaaji hao wakasema muda huo uongezwe. Kwa hiyo, siku hizi mazungumzo hayo huendelea kwa saa moja hivi, ingawa mkaaji mmoja alisema angependa tuwe tukiendelea kwa saa mbili!” Kwa kuwa baadhi ya wazee hao ni vipofu, hawawezi kuondoka kitandani, au hawawezi kushika vitu kwa mikono, Mashahidi huwasaidia wakati wa mazungumzo hayo na kuwatia moyo washiriki kadiri wawezavyo.

Kama sehemu ya ziara hizo, Mashahidi huimba nyimbo kadhaa za kumsifu Mungu pamoja na wakaaji hao, na mara nyingi wazee hao huomba waimbe nyimbo nyingi zaidi. John, * mmoja wa wakaaji alisema hivi: “Tunapenda muziki mnaotuletea. Unatusaidia kumwelewa na kumheshimu Mungu.” Judith, mkaaji ambaye ni kipofu, amekariri maneno yote ya wimbo anaoupenda zaidi!

Mashahidi hao wanapendezwa na hali ya kila mzee. Mjitoleaji anayeitwa Brian anasema kwamba ikiwa mkaaji anaumwa, Mashahidi humtembelea chumbani kwake. “Tunazungumza nao na kuona jinsi wanavyohisi. Nyakati nyingine tunarudi siku nyingine kuona mgonjwa huyo anaendeleaje.”

“Mungu Amewatuma Ninyi Kwetu”

Wakaaji wengi wa makao hayo ya wazee huthamini sana ziara hizo. Peter, ambaye huhudhuria mazungumzo hayo kila juma anasema hivi: “Ninakuwa na hamu sana ya kufika huko.” Judith huwaambia wafanyakazi wanaomtunza: “Leo ni Jumatano! Tafadhali nisaidieni niwe tayari kwa ajili ya kwenda kwenye kikundi cha kujifunza Biblia. Sitaki kuchelewa!”

Wazee hao wanafurahia mambo wanayojifunza, nao wanajihisi wakiwa karibu zaidi na Mungu. Baada ya kuzungumzia fundisho moja la Yesu, Robert alisema hivi: “Sikuwa nimewahi kuelewa simulizi hili la Biblia. Lakini sasa ninalielewa!” David amejifunza jinsi ilivyo muhimu kusali, naye anasema: “Kumenisaidia kusitawisha uhusiano pamoja na Mungu naye amekuwa halisi kwangu.”

Wakaaji wa makao hayo husisimukia kujifunza kuhusu tumaini la Biblia la wakati ujao. Mkaaji mmoja anayeitwa Lynette aliwaambia hivi Mashahidi: “Asanteni kwa kutuletea faraja hiyo kutoka katika Biblia.” Mkaaji mwingine alisema: “Mungu amewatuma ninyi kwetu.”

Margaret amefurahia sana ziara hizo hivi kwamba sasa anahudhuria mikutano ya Mashahidi wa Yehova kwenye Jumba lao la Ufalme. Hiyo ni jitihada kubwa sana kwa sababu ya afya yake si nzuri na hawezi kutembea sana. Aliwaambia Mashahidi hivi: “Mmetupa sisi sote sababu ya kuendelea kuishi.”

‘Mnafanya Kazi Nzuri Sana’

Wafanyakazi pia wanathamini sana ziara za Mashahidi. Shahidi anayeitwa Anna anasema hivi: “Wafanyakazi wa makao hayo huwatia moyo wakaaji wahudhurie mazungumzo hayo kwa sababu wanatambua kwamba wazee wanakuwa wenye furaha zaidi baada ya mazungumzo hayo.” Brian, aliyenukuliwa mapema anaongezea hivi: “Wafanyakazi ni wenye urafiki na wanashirikiana nasi vizuri. Wanafanya yote wawezayo kutusaidia.”

Familia za wakaaji zinafurahi sana kuona jinsi wapendwa wao wanavyofurahia mazungumzo hayo. Binti ya mzee mmoja aliwapongeza Mashahidi hao hivi: “Mnamsaidia mama yangu kwa njia nzuri sana.”

^ fu. 7 Majina ya wakaaji wa makao ya kuwatunzia wazee yamebadilishwa.