Hamia kwenye habari

Hamia kwenye menyu ya pili

Mashahidi wa Yehova

Kiswahili

Mashahidi wa Yehova Wasaidia Kurembesha Mandhari ya Jiji la Rostov-on-Don

Mei 20, 2015, ofisa mkuu wa utawala wa Rostov-on-Don, jiji kubwa zaidi kusini mwa Urusi, aliwaandikia Mashahidi wa Yehova barua ya shukrani, akiwashukuru “kwa kushiriki kwa bidii kulirembesha jiji hilo wakati wa majira ya kuchipua.”

Wakazi wa jiji la Rostov-on-Don waliposhirikiana katika jitihada za kulirembesha jiji hilo, Mashahidi wa Yehova wa makutaniko manne walikusanya takataka na uchafu uliokuwa umekusanyika kwenye vijia vya jiji na kwenye kingo za mito. Katika muda wa saa chache tu, walijaza mifuko 300 hivi ya takataka, ambayo baadaye ilisafirishwa kwa malori.

Kwa nini Mashahidi walitaka sana kuisaidia jamii? “Siwezi kuketi tu bila kufanya jambo lolote,” anasema Raisa mwenye umri wa miaka 67. “Ninataka jiji langu liwe safi ili kila mtu aishi katika mazingira safi. Hata ingawa ni watu wachache tu wanaojua tulichofanya, bado ninaifurahia kazi hiyo. Zaidi ya yote, Yehova Mungu anaona tunachofanya.” Aleksander akaongeza hivi: “Hatuwahubirii tu wengine lakini pia tunawasaidia katika kazi mbalimbali. Ninahisi nikiwa mwenye furaha na uradhi ninapowasaidia majirani wangu.”

Watu waliojionea jambo hilo walithamini roho hiyo ya kujitolea iliyoonyeshwa na Mashahidi wa Yehova. Mkazi mmoja wa jiji hilo alishangaa kujua kwamba Mashahidi hawakuwa wanalipwa chochote. Hivyo, akaamua kujiunga nao kufanya usafi na baadaye akasema: “Singewahi kufikiri kwamba mtu anaweza kufurahia kufanya usafi na kupata uradhi mwingi hivyo kutokana na kazi hiyo!” Akaongeza hivi: “Wengine wenu hata hawaishi hapa, lakini wamekuja kutufanyia usafi!”

Ofisa mmoja wa jiji aligundua kwamba kikundi kimoja kidogo cha Mashahidi kilikusanya takataka nyingi sana. Aliwapiga picha wakiwa wamesimama kando ya mifuko hiyo ya takataka ili “akawaonyeshe wengine jinsi kazi inavyopaswa kufanywa.”