Hamia kwenye habari

Hamia kwenye menyu ya pili

Mashahidi wa Yehova

Kiswahili

Transforming Lives, One Prisoner at a Time

Transforming Lives, One Prisoner at a Time

Wafungwa 68 wanatembelewa kwa ukawaida na Mashahidi wa Yehova nchini Hispania. Mashahidi wa Yehova wanaendesha ibada kwa ukawaida, na katika magereza 15 wafungwa wapatao 600 wanajifunza Biblia.

Mmoja kati ya watu wanaofanya kazi hiyo ni Miguel, ambaye alitumikia kifungo cha miaka 12 gerezani kabla hajawa Shahidi wa Yehova. Sasa anawatembelea wafungwa kila wiki. Kwa nini anafanya hivyo? Ili kusaidia kubadili maisha ya wafungwa wengine, kama tu ambavyo yeye alisaidiwa.

Katika kipindi cha miaka nane iliyopita, Miguel amewafundisha Biblia wafungwa wengi. Anasema hivi: “Ninajisikia vizuri sana kuwasaidia wafungwa katika gereza ambalo nilifungwa. Kwa kweli inanifurahisha kuona jitihada zao za kutaka kuachana na maisha ya uhalifu.”

Miguel alipokuwa na umri wa miaka minne, dereva mlevi alimgonga na kumuua baba yake. Mama yake alihitaji kufanya kazi kwa saa nyingi ili ailishe familia yake.

Miguel na kaka yake mkubwa walianza kuwa watoro na kuiba kwenye nyumba za watu na kuvunja vioo vya magari na kuiba. Alipofikia umri wa miaka 12, Miguel alikuwa mhalifu wa makosa madogo-madogo. Alipokuwa na umri wa miaka 15, alikuwa akipata fedha nyingi kwa sababu ya kuuza dawa za kulevya. Hata hivyo, gharama kubwa ya dawa ya heroini na kokeini ilimchochea kuiba hata zaidi. Kuanzia alipokuwa na umri wa miaka 16, alifungwa mara kwa mara gerezani, na muda si muda akawa mhalifu sugu. Miguel anasema hivi: “Nilikuwa na uhakika kwamba nitafia gerezani au kwa sababu ya kutumia kiasi kikubwa cha dawa za kulevya. Nilihisi nilikuwa kama nzi aliyenasa kwenye utando wa buibui.”

Hata hivyo, mnamo 1994, mmoja wa rafiki za Miguel alimwomba Shahidi mmoja amwandikie barua Miguel, ambaye wakati huo alikuwa gerezani. Kwenye barua hiyo Miguel alijifunza kwamba Mungu amekusudia kuifanya dunia iwe Paradiso tena. Mwandishi wa barua hiyo alimtia moyo Miguel abadili maisha yake ili kwamba aje kufurahia kutimizwa kwa ahadi hiyo. Miguel anasema: “Maneno yake yaliugusa moyo wangu. Siku hiyo kila kitu kilibadilika, na niliamua kujifunza Biblia, ingawa nilijua kwamba haitakuwa rahisi.”

Miguel alijua jambo hilo kwa sababu alinaswa kwenye mtego wa kuvuta sigara na dawa za kulevya. Vyote hivyo vilipatikana kwa urahisi. Mfungwa mwezake alikua akimpa dawa za kulevya kila siku. Miguel alisali kwa bidii ili apate nguvu za kushinda mambo hayo, na hatimaye alifanikiwa.

Miezi mitatu baadaye, Miguel alianza kuwaambia wafungwa wengine mambo aliyokuwa akijifunza. Aliachiliwa mwaka uliofuata na hatimaye akabatizwa ili awe Shahidi wa Yehova. Pia, alipanga kufunga ndoa, lakini tatizo likatokea. Mwezi mmoja kabla ya ndoa, mahakama ilimhukumu Miguel miaka kumi zaidi gerezani kwa sababu ya kesi kadhaa ambazo hazikuwa zimeamuliwa. Hata hivyo, baada ya miaka mitatu na nusu, aliachiliwa kwa sababu ya mwenendo wake mzuri. Hatimaye aliweza kufunga ndoa. Miguel hajayarudia maisha yake ya uhalifu.

 

Pata Kujua Mengi Zaidi

HABARI NJEMA KUTOKA KWA MUNGU!

Mungu Ana Kusudi Gani Kuelekea Dunia?

Biblia inaeleza kwa nini mungu aliumba dunia, kuteseka kutakapoisha, na wakati ujao wa dunia na wale watakao kaa ndani yake.