Hamia kwenye habari

Hamia kwenye menyu ya pili

Mashahidi wa Yehova

Kiswahili

Wapenda Uhuru Wahudhuria Tamasha la Armada

Wapenda Uhuru Wahudhuria Tamasha la Armada

Kuanzia Juni 6 hadi 16, 2013, mamilioni ya wageni kutoka sehemu mbalimbali duniani walikusanyika kwenye bandari ya Rouen, kaskazini mwa Ufaransa, kwa ajili ya tamasha kubwa lenye kupendeza ambalo hufanyika baharini linaloitwa Armada.

Baada ya kusafiri kilometa 120 kwenye mto uliopindapinda unaoitwa Seine katika eneo lenye kupendeza la Normandy, meli bora na kubwa zaidi ulimwenguni zilitia nanga kwenye eneo la kilometa saba lililotengwa kwa ajili ya tukio hilo. Kwa zaidi ya siku kumi, wageni walikuwa na nafasi ya pekee ya kupanda meli na kutembea ndani ya baadhi ya vyombo 45 vya majini vilivyo maarufu na pia meli kubwa zilizokuwepo kwenye tamasha hilo.

Ni nini kilichowachochea watu wengi wa umri mbalimbali kuhudhuria tamasha hilo la Armada? Mwanzilishi na msimamizi wa tamasha hilo anasema kwamba linawapa watu nafasi ya “kukaribia ‘Majitu ya Baharini’ ambayo huwafanya waote ndoto.” Bila shaka, meli kubwa huwafanya watu wengi, vijana kwa wazee, wafikirie kuhusu safari za mbali za baharini na uhuru.

Maelfu ya watalii pia walipata nafasi ya kusikia kuhusu uhuru wa aina nyingine unaotoka katika Biblia. (Yohana 8:31, 32) Walipokuwa wakitembelea mji wa kale unaopendeza wa Rouen na mitaa yake yenye njia nyembamba zenye watu wengi, wageni walijionea vigari vya kukokotwa vyenye machapisho vinavyotumiwa na Mashahidi wa Yehova. Watalii au mabaharia walipokaribia vigari hivyo, walialikwa kuchukua chapisho lolote la Biblia, bila malipo. Wapita njia wengi walivutiwa na makala yenye kichwa “Ubaguzi Utakwisha Lini?” ya gazeti la Mnara wa Mlinzi na walialikwa kusikiliza hotuba inayotegemea Biblia ambayo ingetolewa kwa Kifaransa, Kiingereza, na Kihispania.

Wenyeji walithamini sana mpango huo. Mwanamume mmoja, ambaye kwa mara ya kwanza alishangazwa kuwaona Mashahidi wakisimama sehemu za umma wakiwa na vigari vya kukokotwa alisema hivi: “Ninafurahi sana kuwaona mkiwa kwenye mitaa. Ninawaheshimu sana watu wanaoshikilia imani yao, ingawa mimi binafsi siamini mambo mnayoamini.” Wanaume wawili wazee waliwaambia hivi Mashahidi vijana waliokutana nao wakihubiri kwa njia hiyo: “Mnapaswa kujivunia kuwa ninyi ni Mashahidi wa Yehova!”

 

Pata Kujua Mengi Zaidi

MNARA WA MLINZI

Ubaguzi Utakwisha Lini?

Masimulizi ya maisha yanaonyesha jinsi Biblia inavyowasaidia watu kushinda ubaguzi. Ni wakati gani ambapo ubaguzi utaondolewa kabisa?