Tunatii maoni ya Biblia kuhusu ndoa na talaka. Mungu alianzisha ndoa iwe muungano wa kudumu kati ya mwanamume na mwanamke. Msingi pekee wa Kimaandiko wa talaka ni uasherati.​—Mathayo 19:5, 6, 9.

Je, Mashahidi wanawasaidia watu walio katika ndoa zenye matatizo?

Ndiyo, wanawasaidia kwa njia kadhaa:

  • Machapisho. Machapisho hayo yanayotolewa kwa ukawaida yana habari zinazoweza kuimarisha ndoa, hata zile zinazoonekana kuwa hazina matumaini. Kwa mfano, ona makala zenye kichwa “Wajibika Sikuzote Katika Ndoa Yako,” “Jinsi ya Kusamehe,” na “Jinsi ya Kuanza Kuaminiana Tena.”

  • Mikutano. Katika mikutano yetu ya kutaniko na makusanyiko tunapata mashauri ya Biblia kuhusu ndoa.

  • Wazee. Wazee wa kutaniko huwapa wenzi wa ndoa msaada ambao wanahitaji, wakitumia maandiko kama vile Waefeso 5:22-25.

Je, lazima wazee wa kutaniko waidhinishe talaka kati ya wenzi wa ndoa?

Hapana. Hata ikiwa wazee wanaombwa wasaidie wenzi kushughulikia matatizo yao ya ndoa, hawana mamlaka ya kuwaamulia wenzi hao wanachopaswa kufanya. (Wagalatia 6:5) Hata hivyo, mtu anayeamua kumtaliki mwenzi wake bila msingi wa Kimaandiko hastahili kupata mapendeleo ya pekee kutanikoni na hayuko huru Kimaandiko kufunga ndoa tena.​—1 Timotheo 3:1, 5, 12.

Mashahidi wana maoni gani kuhusu kutengana?

Biblia inawatia moyo wenzi wa ndoa waendelee kukaa pamoja hata ikiwa ndoa ina matatizo. (1 Wakorintho 7:10-16) Matatizo mengi yanaweza kusuluhishwa wenzi wa ndoa wanaposali kwa bidii, kutumia kanuni za Biblia, na kuonyeshana upendo.​—1 Wakorintho 13:4-8; Wagalatia 5:22.

Hata hivyo, chini ya hali mbaya sana kama hizi zifuatazo, Wakristo fulani wameamua kutengana:

  • Kukataa kimakusudi kuitegemeza familia.​—1 Timotheo 5:8.

  • Kuteswa sana kimwili.​—Zaburi 11:5.

  • Kuhatarishwa kabisa kwa hali ya kiroho. Kwa mfano, mwenzi wa ndoa anaweza kujaribu kumlazimisha mwenzi wake ambaye ni Shahidi avunje sheria ya Mungu kwa njia fulani. Shahidi huyo anaweza kuamua kwamba kutengana ndiyo njia pekee ya ‘kumtii Mungu kuwa mtawala kuliko wanadamu.’​—Matendo 5:29.