Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

Zawadi ya Tiketi 19,000 za Ndege

Julai 2013, barua yenye kusisimua iliandikwa na Baraza Linaloongoza la Mashahidi wa Yehova kwa wamishonari na wengine walio katika utumishi wa pekee wa wakati wote katika nchi za kigeni. Barua hiyo ilieleza kuhusu mpango wa kuwasafirisha wanaotumikia katika nchi za kigeni ili wahudhurie makusanyiko ya eneo na ya kimataifa ambayo yangefanywa 2014 hadi mwanzoni mwa 2015.

Kusudi la mpango huo haukuwa tu kuwasafirisha kwa ajili ya makusanyiko bali pia kuwapa nafasi ya kutumia wakati pamoja na familia zao na marafiki. Barua hiyo ilieleza kwamba wangelipiwa nauli ya kwenda na kurudi.

Ingawa mpango huo umewahi kufanywa, pindi hii ungefanywa kwa njia tofauti. Chini ya mwongozo wa Halmashauri ya Ufundishaji ya Baraza Linaloongoza, idara mpya ya kufanya mipango ya usafiri iitwayo World Headquarters (WHQ) Travel, ingeratibu safari hizo.

Muda mfupi baada ya barua hizo kutumwa, maombi ya tiketi yalianza kupokewa katika idara ya WHQ Travel. Kufikia Januari 2014, kulikuwa na maombi mengi sana. Kikundi kilichopewa mgawo wa kuratibu safari hizo kilifanya utafiti na mipango kwa ajili ya watumishi wa wakati wote wa pekee duniani kote.

Baadhi ya safari zilikuwa ngumu sana kupanga. Wasafiri kutoka Reykjavík, Iceland, walihitaji kwenda hadi Cochabamba, Bolivia. Wengine kutoka Nouméa, New Caledonia, walihitaji kwenda hadi Antananarivo, Madagaska. Wengine walitoka Port Moresby, Papua New Guinea, kwenda Seattle, Washington, Marekani, na wengine kutoka Ouagadougou, Burkina Faso, kwenda Winnipeg, Kanada.

Kikundi cha watu watano kwenye idara ya WHQ Travel kilikata tiketi 19,000 hivi za ndege. Wakitumia michango ambayo makutaniko walitoa kwa ajili ya kusudi hilo, walinunua na kuwasilisha tiketi za ndege kwa wasafiri 4,300 hivi katika nchi 176.

Mpango huo ulithaminiwa sana. Wenzi fulani wamishonari waliandika hivi: “Leo tunarudi kwenye mgawo wetu Asia ya Kusini-Mashariki. Tunawashukuru sana kwa kutuwezesha kufika nyumbani, Uingereza, na kuwa pamoja na familia zetu kwa mara ya kwanza baada ya miaka mitano. Bila mpango huu, hatungefanikiwa. Hivyo tunawashukuru kwa moyo wote wale waliofanikisha safari yetu.”

Mmishonari anayetumika Paraguai aliandika hivi: “Mimi na mke wangu tunathamini sana fursa tuliyopata ya kuhudhuria kusanyiko la kimataifa lililofanyiwa New Jersey, Marekani. Mwanzoni mwa mwaka wa 2011, tulianza kupanga kutembelea makao makuu ya ulimwenguni pote. Tulikuwa na pesa tulizotunza kwa kusudi hilo. Hata hivyo, Juni mwaka huo, tulialikwa kutembelea makutaniko ya lugha ya ishara nchini Paraguai. Mgawo huo ulihusisha safari nyingi. Baada ya kutafakari kwa kina, tuliamua kudhabihu safari yetu ya Marekani na badala yake tukanunua gari la kutusaidia kutimiza mgawo wetu mpya vizuri zaidi. Halafu, tukapata mwaliko wa kuhudhuria kusanyiko la kimataifa. Hivyo tamaa yetu ikatimia! Tunamshukuru sana Yehova kwa wema wake na upendo aliotuonyesha katika njia hii.”

Wenzi wa ndoa wanaotumika Malawi waliandika hivi: “Tunawatumia barua-pepe fupi ili kuwashukuru sana! Tunajua ilihusisha kazi, wakati, na gharama kubwa kupanga safari hizo nyingi. Tunathamini sana kazi yenu ngumu na, zaidi ya yote, ukarimu wa tengenezo la Yehova kwa kufanya maandalizi haya yaliyotuwezesha kuhudhuria kusanyiko la kimataifa na kutumia wakati pamoja na familia na marafiki.”

Wale katika idara ya WHQ Travel walipenda sana mgawo huo. Mileivi alisema hivi: “Ulikuwa mgawo wa pekee kuwasaidia wamishonari kurudi nyumbani ili wawe pamoja na familia zao na marafiki.” Na Dorise aliongezea hivi: “Mgawo huo ulinisaidia kuthamini hata zaidi upendo wenye kina wa tengenezo letu kuwaelekea wale walio na migawo katika nchi za kigeni.” Rodney, msimamizi wa idara hiyo alisema hivi: “Ni shangwe kubwa kutumiwa katika kazi hii.”

Mashahidi wa Yehova ulimwenguni pote walifurahia pendeleo la kuchangia zawadi hii yenye upendo kwa ndugu na dada zao wenye bidii na wenye roho ya kujidhabihu.

Pata Kujua Mengi Zaidi

Kwa Nini Mashahidi wa Yehova Wanahudhuria Makusanyiko?

Kila mwaka tunahudhuria matukio matatu ya pekee. Unaweza kufaidika jinsi gani kutokana na matukio hayo?