Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

Kukumbuka Kusanyiko Lililokuwa na Kichwa “Kuuzunguka Ulimwengu”

Kukumbuka Kusanyiko Lililokuwa na Kichwa “Kuuzunguka Ulimwengu”

Miaka hamsini iliyopita, Mashahidi wa Yehova 583 walianza safari ya majuma kumi, ambayo ingewafanya wazunguke ulimwengu. Hata hivyo hawakuwa watalii. Kusudi lao kuu lilikuwa ni kushirikiana na ndugu zao katika makusanyiko ya mwaka 1963 yaliyokuwa na kichwa “Habari Njema za Milele.” Kwa sababu wageni walisafiri ili kukutana na wageni wenzao kutoka nchi zaidi ya 20, makusanyiko haya yaliitwa Kusanyiko la “Kuuzunguka Ulimwengu.”

Jambo kuu katika kila kusanyiko lilikuwa hotuba yenye kichwa “Mungu Atakapokuwa Mfalme Duniani Kote.” Nathan Knorr, kutoka katika makao makuu ya Mashahidi wa Yehova alitoa hotuba hiyo katika mengi ya makusanyiko hayo. Alifafanua hali mbaya za ulimwengu na alizungumzia kuhusu ahadi za Biblia za kurudisha paradiso duniani. Ulimwenguni pote, jumla ya watu 580,509 walihudhuria ili kusikiliza hotuba hiyo.

“Kuuzunguka Ulimwengu” kwa Majuma Kumi

Makusanyiko hayo yalianza huko Milwaukee, Wisconsin, Marekani. Kutoka hapo, wageni walisafiri kuelekea upande wa mashariki. Baada ya kusanyiko lililofanywa huko New York, walienda Uingereza, Sweden, Ujerumani, na Italia. Katika kila moja ya maeneo hayo, walipata fursa za kuhubiri kuhusu habari njema inayopatikana katika Biblia.

Wenyeji wengi waliotembelewa walithamini sana kwamba Mashahidi wa Yehova walitenga wakati wa kuwatembelea. Mwanamke mmoja kijana huko Stockholm, Sweden, alisema hivi: “Sitasahau kamwe ziara yenu. . . . Siamini mlifunga safari hii yote ili kuja kuzungumza nami kuhusu Mungu. Mnafanya kazi nzuri sana.”

Wageni hao walivunjika moyo kwa kiasi fulani walipofika huko Athens, Ugiriki. Viongozi wa kidini waliishinikiza serikali iwanyime kibali Mashahidi wa Yehova, wasifanye kusanyiko lao katika uwanja wa Panathinaikos Stadium. Lakini Mashahidi hao wenye bidii hawakukata tamaa. Kufikia mwishoni mwa mwezi wa Agosti, watu 10,000 hivi walihudhuria kusanyiko hilo ambalo lilifanywa katika nyumba za watu binafsi na katika makutaniko ya sehemu hiyo.

Walipotoka Athens, wageni hao walisafiri hadi Lebanoni, Jordan, Israel, na Saiprasi. Mashahidi wenzao waliwakaribisha kwa uchangamfu, na wakati mwingine mambo waliyofanya yaliwafurahisha wageni. Huko Nicosia, Saiprasi, mgeni mmoja aliwachekesha wengine alipokuwa akizungumzia kuhusu viatu vyake: “Kila mara niliporudi kwa mwenyeji wangu na kuvua viatu vyangu . . . , vingepotea . . . , kisha baada ya dakika tano ningevipata vikiwa vimepigwa rangi na kung’arishwa!”

Safari yao iliishia huko Asia na Pasifiki. Maelfu ya Mashahidi wa Yehova katika nchi za India, Burma (ambayo sasa inaitwa Myanmar), Thailand, Hong Kong, Singapore, Ufilipino, Indonesia, Australia, Taiwani, Japani, New Zealand, Fiji, na Korea walifurahia kusanyiko hilo pamoja na wajumbe kutoka nchi nyingine. Ingawa watu wengi walipangua ratiba zao ili wahudhurie kusanyiko hilo, mwanamume na mwanamke mmoja huko Yokosuka, Japani, ambao walikuwa wamepanga kuoana, walipangua ratiba yao kwa njia kubwa hata zaidi. Mwanamume huyo alipomwomba mwajiri wake ruhusa ya kuhudhuria kusanyiko la Kyoto, mwajiri wake alimwambia kwamba angepewa ruhusa kwa ajili ya kwenda tu kwenye mazishi na harusi. Kwa kuwa tayari walikuwa wamepanga kuoana, waliamua kuoana mapema kidogo. Walienda fungate kusanyikoni!

Safari hiyo ya kuuzunguka ulimwengu ilikaribia kikomo mapema mwezi wa Septemba katika makusanyiko huko Hawaii na California, Marekani. Kituo cha mwisho cha safari yao kilikuwa huko Pasadena, California, ambapo hudhurio la watu kusanyikoni lilikuwa kubwa sana. Baada ya kusanyiko kulikuwa na msongamano mkubwa sana wa magari. Licha ya hayo, gazeti moja la sehemu hiyo lilimnukuu mkuu mmoja wa polisi ambaye alisema hivi: “ingawa walikuwa wengi sana walijiendesha kwa njia nzuri sana ambayo sijawahi kuona.”

Faida za Muda Mrefu

Faida za kusanyiko hilo zinafurahiwa hadi leo hii. Kitabu “Kila Andiko Lenye Pumzi ya Mungu Lafaa” kilitolewa katika kusanyiko hilo, na kitabu hicho kinaendelea kutumiwa katika mikutano ya Mashahidi wa Yehova.

Harold King muda mfupi baada ya kuachiliwa huru kutoka gerezani huko China

Wimbo mpya ulianza kutumiwa katika kusanyiko la New York. Harold King, Shahidi ambaye aliachiliwa huru kutoka gerezani katika mwaka wa 1963 nchini China, ndiye aliyeutunga wimbo huo. Kichwa cha wimbo kilikuwa “Mlango kwa Mlango.” Harold King alitunga wimbo huo alipokuwa katika kifungo cha upweke. Hadi sasa, Mashahidi wa Yehova huimba wimbo uliotokana na wimbo huo unaoitwa “Nyumba kwa Nyumba.”

Leo, makusanyiko ya Mashahidi wa Yehova ni tofauti sana. Watu hukusanyika pamoja kwenye vikundi vidogo vidogo. Kuna maeneo mengi ya makusanyiko na hivyo watu hutumia muda mchache kusafiri ili kuhudhuria makusanyiko hayo. Mabadiliko hayo kutia ndani marekebisho mengine yamewasaidia watu wengi zaidi wakazie fikira programu. Zaidi ya Mashahidi wa Yehova milioni saba pamoja na wageni wao huhudhuria makusanyiko kila mwaka. Je, ungependa kuungana nasi kuhudhuria kusanyiko letu lijalo? Tafuta mahali pa kusanyiko palipo karibu nawe.

Pata Kujua Mengi Zaidi

Kwa Nini Mashahidi wa Yehova Wanahudhuria Makusanyiko?

Kila mwaka tunahudhuria matukio matatu ya pekee. Unaweza kufaidika jinsi gani kutokana na matukio hayo?