HALI zilikuwa mbaya nchini Israeli kwa mara nyingine. Watu walikuwa wamemwacha Yehova tena. Kwa sababu hiyo, Yehova aliwaruhusu Waamoni wawakandamize kwa miaka 18. (Amu. 10:8) Mwishowe, watu wa Mungu walikiri dhambi yao, wakaiondoa miungu yao ya uwongo, na kumrudia Yehova. Hata hivyo, muda mfupi baada ya hapo, Waamoni wakakusanyika katika eneo la Gileadi ili kuwashambulia Waisraeli.

Wazee wa Gileadi walimwomba mwanamume anayeitwa Yeftha aje kuwaongoza kwenda vitani. Hapo awali Yeftha alikuwa ametendewa vibaya na ndugu zake huko Gileadi, ambao inaonekana walikuwa miongoni mwa wazee hao wa Gileadi, kwa hiyo, alikimbia kutoka eneo hilo. Je, Yeftha aliruhusu jambo hilo limfanye kuwa mchungu na kufungia kinyongo? Hapana. Yeftha alikubali kurudi kupigana. Hata hivyo, kwanza alijaribu kufanya amani na Waamoni. Yeftha alituma wajumbe ambao walimweleza waziwazi mfalme wa Waamoni kwa nini hawakuruhusiwa kumiliki nchi aliyokuwa akitaka kuwanyang’anya Waisraeli. Maneno ya Yeftha yalionyesha kwamba alikuwa na ujuzi mwingi wa jinsi Yehova alivyoshughulika na watu Wake na mataifa yaliyowazunguka. Hata hivyo, mfalme wa Waamoni alikataa kusikiliza. Alikuwa ameazimia kupigana na Waisraeli!

Yeftha alipojitayarisha kwa ajili ya vita, roho ya Yehova ikamjia. Kwa hiyo, Yeftha hakuwa akitenda bila kufikiri au kipumbavu alipoweka nadhiri hii mbele za Yehova: “Ukiwatia Waamoni mikononi mwangu, yeyote atakayetoka nje ya mlango wa nyumba yangu ili kunipokea nitakaporudi baada ya kuwashinda Waamoni atakuwa wa Yehova, nami nitamtoa kama dhabihu ya kuteketezwa.”

Je, Yeftha alimaanisha kwamba angemteketeza mwanadamu kihalisi? La hasha. Yehova alichukia zoea la kuwadhabihu wanadamu na aliwakataza watu wake wasifanye jambo hilo. (Kum. 18:​10, 12) Badala yake, Yeftha alimaanisha kwamba mtu ambaye angetoka kwanza nje ya nyumba yake “atakuwa wa Yehova” katika maana ya kwamba angetolewa kikamili kwa ajili ya utumishi wa Yehova, huenda katika hema la ibada lililokuwa Shilo. Yeftha alijua kwamba nadhiri yake ingemgharimu sana. Alikuwa na mtoto mmoja tu, binti yake aliyempenda. Huenda yeye ndiye angekuwa wa kwanza kumpokea aliporudi.

Baada ya kuweka nadhiri hiyo, Yeftha alienda moja kwa moja vitani. Aliwaongoza wanaume wake kwa ujasiri, na Yehova akawabariki wakashinda  vita hivyo! Waliwashinda maadui wao kisha wakaharibu majiji 20 ya Waamoni na ‘kuwaua watu wengi.’

Yeftha alirudi nyumbani akiwa na shangwe. Huenda alianza kujiambia, “Natamani mtu wa kwanza kutoka nyumbani awe mtumishi wangu.” Ikiwa alikuwa akiwaza hivyo basi upesi alivunjika moyo. Mtu wa kwanza kutoka nje alikuwa binti yake. Alitoka akicheza dansi na kupiga tari! Akiwa na huzuni Yeftha alirarua mavazi yake na kulia: “Ole wangu, binti yangu! Umenivunja moyo, kwa kuwa nimesababisha uende mbali.”

Binti ya Yeftha alitambua jinsi ambavyo nadhiri ya baba yake ingebadili maisha yake. Angetolewa kikamili kwa ajili ya utumishi mtakatifu wa Yehova. Hilo lilimaanisha hangeolewa wala kuzaa watoto. Hilo lilikuwa jambo lenye kukatisha tamaa kwa mwanamke Mwisraeli. Hata hivyo, msichana huyo alimwambia baba yake hivi kwa ujasiri: “Ikiwa umetoa ahadi kwa Yehova, nitendee kama ulivyoahidi.” Aliomba tu apewe muda wa kwenda milimani akiwa na rafiki zake ili akaomboleze kwa sababu asingepata nafasi ya kuolewa wala kuzaa watoto.

Binti ya Yeftha alifarijiwa na kupongezwa. Kila mwaka, wasichana Waisraeli walienda kumpongeza mwanamke huyo jasiri na asiye na ubinafsi kwa siku nne! Na kwa kweli lilikuwa pendeleo kubwa kutumikia katika hema hilo takatifu la ibada. Inaelekea kwamba wakati huo tayari mvulana Samweli alikuwa akiishi huko. Je, binti ya Yeftha alisaidia kumzoeza na kumtia moyo Samweli alipokuwa mtoto? Hatujui. Ikiwa alifanya hivyo, huenda angepata shangwe kubwa kutokana na hilo kwa kuwa hakuwa na mtoto wake mwenyewe. Hata hivyo, tunajua kwamba wakati huo kulikuwa na tatizo la ukosefu wa maadili katika hema la ibada. (1 Sam. 2:22) Je, binti ya Yeftha alijihusisha katika ukosefu wa maadili? Hapana. Maandiko matakatifu yanasema: “Hakufanya ngono na mwanamume yeyote.”

Mtume Paulo alimworodhesha Yeftha miongoni mwa wanaume na wanawake wenye imani kubwa. (Ebr. 11:32) Yeftha na binti yake ni mifano bora ya ujasiri. Yeftha alipigana kwa ajili ya watu wa Mungu, na binti yake alimuunga mkono kikamili. Wote wawili walimtimizia Yehova nadhiri ambayo haikuwa rahisi kutimiza!

Soma simulizi hili katika Biblia:

• Waamuzi 10:​15, 16; 11:​1-40

Jambo la kuzungumzia:

Yeftha na binti yake walionyesha ujasiri katika njia zipi?

 Chimba Zaidi

1. 1. Ni nini kinachoonyesha kwamba mbali tu na kupigana na Waisraeli, Waamoni walikuwa wakijaribu kuzuia ibada safi? (it “Yeftha” ¶6) A

   Jibu lako

2. 2. Mtazamo ambao Yeftha alikuwa nao unafananaje ule ambao Yakobo alikuwa nao alipoweka nadhiri kwa Yehova? (it “Yeftha” ¶11)

   Jibu lako

3. 3. Kwa nini ilikuwa dhabihu kubwa kwa Yeftha kutimiza nadhiri yake? (w17.04 4 ¶6)

   Jibu lako

4. 4. Nabii Samweli alizaliwa mwaka wa 1180 K.W.K. hivi. Hivyo, ni nini kinachodokeza kwamba huenda yeye na binti ya Yeftha walitumikia katika hema la ibada wakati uleule? (it “Yeftha” ¶2; ona chati ya mfuatano wa matukio yenye kichwa “Kuanzia kwa Wazee wa Ukoo Hadi Wakati wa Waamuzi.”)

   Jibu lako

 Tafakari Masomo Tunayojifunza

• Wazazi wanapokuwa jasiri kama Yeftha wanaweza kuwaathirije watoto wao?

  Jibu lako

• Wakristo leo wanaweza kuwaigaje wasichana waliompongeza binti ya Yeftha na kumsaidia aendelee kuwa jasiri? B

  Jibu lako

• Unaweza kuiga ujasiri wa Yeftha na binti yake katika njia zipi nyingine?

  Jibu lako

Tafakari Kumhusu Yehova na Kusudi Lake

• Simulizi hili linanifundisha nini kumhusu Yehova?

  Jibu lako

• Simulizi hili linahusianaje na kusudi la Mungu kwa wanadamu?

  Jibu lako

• Ningependa kuwauliza Yeftha na binti yake maswali gani watakapofufuliwa?

  Jibu lako