MUSA hakupewa jina lake na wazazi wake Waebrania, bali alipewa jina hilo na binti ya Farao aliyemlea. Alichagua jina hilo kwa sababu lilimaanisha “Kuokolewa Kutoka Majini,” kwa kuwa alimwokoa mvulana huyo kutoka kwenye maji. Huenda alitarajia kwamba mvulana huyo angekuja kuwa mtu muhimu katika familia ya kifalme ya Misri. Lazima awe alifurahi kumwona akipata elimu bora zaidi nchini Misri. Biblia inasema hivi: “Musa akafundishwa hekima yote ya Wamisri.”

Musa alipokua, akaja kuwa kijana mwenye uwezo. Biblia inasema hivi: “Alikuwa mwenye nguvu katika maneno na matendo yake.” Angeweza kufuatia utajiri, umaarufu, na raha nchini Misri. Hata hivyo, Musa alijua kwamba kufuatia maisha hayo kungemfanya akose kibali cha Yehova. Kwa hiyo, Musa alihitaji kufanya uamuzi: Angefuatia jambo gani maishani mwake?

Musa alipokuwa na umri wa miaka 40, uamuzi wake ulikuwa wazi. Biblia inasema hivi: “Kwa imani, Musa alipokuwa mtu mzima, alikataa kuitwa mwana wa binti ya Farao, akachagua kuteswa pamoja na watu wa Mungu badala ya kufurahia dhambi kwa muda.” Alifanya uamuzi unaofaa, ulioonyesha ana imani na ujasiri. Lakini wakati huo hakutenda kwa hekima.

Musa aliwaona Waisraeli kuwa “ndugu zake,” naye alitaka kuwasaidia wale waliokuwa wakidhulumiwa. Siku moja, alienda kujionea jinsi walivyokuwa wakiteseka. Alimwona Mmisri ambaye huenda alikuwa msimamizi wa kazi, akimpiga mtumwa Mwebrania. Je, Musa alimwamuru Mmisri huyo aache kufanya hivyo? Hatujui. Vyovyote vile, Musa ‘alitazama huku na kule’—labda alitaka kuona ikiwa kuna mtu ambaye atajaribu kumsaidia mtumwa huyo. Lakini hakuona yeyote. Kwa hiyo, Musa akaamua kuchukua hatua. “Akamuua Mmisri huyo.” Je, alikusudia kumuua? Au je, hasira ilimfanya akampiga kwa nguvu kuliko alivyokusudia? Simulizi la Biblia halisemi chochote. Musa alitambua kwamba sasa alikuwa hatarini, kwa hiyo, akauficha mwili wa huyo Mmisri mchangani.

Siku iliyofuata alitoka tena. Alipowaona watumwa wawili Waebrania wakipigana alijaribu kuwatuliza. Lakini mtumwa aliyekosea akamuuliza maswali haya yaliyomwogopesha Musa: “Ni nani aliyekuweka kuwa mkuu na mwamuzi wetu? Je, unapanga kuniua kama ulivyomuua yule Mmisri?”  Musa akatambua kwamba watu walijua jambo ambalo alikuwa amefanya, kwa hiyo, akaogopa kwamba angeuawa.

Mambo hayakuwa yakienda kama Musa alivyotarajia. Alikuwa ametarajia nini? Biblia inatuambia hivi: “Alidhani ndugu zake wangeelewa kwamba Mungu alikuwa akiwaokoa kupitia mkono wake, lakini hawakuelewa.” Inaonekana kwamba Musa aliamini Mungu alikuwa amemchagua kuwatoa Waisraeli kutoka utumwani Misri. Lakini Musa hakutambua kwamba wakati wa Yehova haukuwa umefika, na pia hakutarajia kwamba Waisraeli hawangemwamini. Waisraeli walimwona kuwa Mwebrania aliyelelewa na familia ya kifalme ya Misri na hivyo wakashindwa kumwamini.

Musa alifikiri kwamba alikuwa tayari kuwaongoza watu wa Yehova kutoka Misri, lakini kulikuwa na sababu nyingi kwa nini bado hakuwa tayari. Kwa maoni ya Mungu, bado Musa hakuwa na sifa za kustahili. Ni kweli kwamba alikuwa jasiri kwa kadiri fulani, alikuwa na nguvu, na pia “alikuwa mwenye nguvu katika maneno” yake. Lakini bado alihitaji sifa nyingine ambayo Yehova anathamini sana—upole. Alikuwa amemuua mwanamume Mmisri bila kufikiri.

Upesi Farao alijulishwa kuhusu jambo hilo. Bila hata kumpa Musa nafasi ya kujieleza, Farao alijaribu kumuua. Kwa hiyo, Musa akatoroka Misri. Hakujua ni nini ambacho angekutana nacho. Alilazimika kuacha maisha ya utajiri, starehe, na umashuhuri aliyokuwa nayo. Sasa aliposafiri kwenda mbali katika nchi ya Midiani alihitaji kuwa jasiri kuliko wakati mwingine. Katika eneo hilo lenye ukame, angeishi akiwa mkimbizi kwa miaka mingi, “mkaaji mgeni katika nchi ya kigeni.” Maisha yake yangekuwaje? Je, angekuwa na ujasiri wa kubadili utu wake? Je, angesitawisha upole na unyenyekevu kama Yehova alivyotaka? Acheni tuone.

Soma simulizi hili katika Biblia:

• Kutoka 2:​11-22

• Matendo 7:​22-29

• Waebrania 11:​24-26

Jambo la kuzungumzia:

Musa alionyesha ujasiri katika njia zipi wakati wa kipindi hiki cha maisha yake?

 Chimba Zaidi

1. 1. Kuna uthibitisho gani wa kihistoria unaopatana na simulizi la Biblia linaloonyesha kwamba Waisraeli walikuwa watumwa nchini Misri? (w20.03 30) A

   Jibu lako

   Courtesy Brooklyn Museum, gift of Theodora Wilbour

2. 2. Musa alijifunza nini kutoka kwa wazazi wake, na alijifunza mambo gani ‘alipofundishwa hekima yote ya Wamisri’? (Mdo. 7:22; w02 6/15 10 ¶2-5)

   Jibu lako

3. 3. Kwa kawaida Wamisri waliwazikaje waliokufa? Huenda walihisije wakati ambapo mbali tu na kumuua Mmisri, Musa aliuficha mwili huo badala ya kuupaka dawa na kuuzika? (it “Misri, Mmisri” ¶28) B

   Jibu lako

4. 4. Musa alikimbilia Midiani. Wamidiani na Waisraeli walikuwa na uhusiano gani? (it “Midiani” Na. 2 ¶1-2)

   Jibu lako

 Tafakari Masomo Tunayojifunza

• Mfano wa Musa unaweza kukufundisha nini kuhusu kudhibiti hasira yako?

  Jibu lako

• Vijana wanaweza kujifunza nini kutoka kwa Musa kuhusu kuwa na ujasiri wa kuchagua miradi inayofaa? C

  Jibu lako

• Unaweza kuiga ujasiri ambao Musa alionyesha katika simulizi hili katika njia zipi nyingine?

  Jibu lako

Tafakari Kumhusu Yehova na Kusudi Lake

• Simulizi hili linanifundisha nini kumhusu Yehova?

  Jibu lako

• Simulizi hili linahusianaje na kusudi la Mungu kwa wanadamu?

  Jibu lako

• Ningependa kumuuliza Musa maswali gani atakapofufuliwa kuhusu maisha yake huko Misri na Midiani?

  Jibu lako