YEHOVA alimpa rafiki yake Abrahamu ahadi yenye kustaajabisha: “Nitakufanya kuwa taifa kubwa.” Ahadi hiyo ingebadili historia yote ya wanadamu. Pia, Mungu alimwonyesha Abrahamu nchi maridadi ambayo taifa hilo lingemiliki wakati ujao. (Mwa. 12:2; 13:​14, 15) Lakini Shetani aliazimia kuangamiza taifa hilo hata kabla halijafanyizwa. Alijua kwamba taifa hilo lingetokeza “uzao” ulioahidiwa ambao ungekomesha utawala wake mbovu na hatimaye kumwangamiza.—Mwa. 3:15.

Shetani alimshambulia Abrahamu na familia yake, na mpwa wake, Loti, alipatwa na pigo kubwa sana. Abrahamu alikuwa amemruhusu Loti achague angeishi wapi katika Nchi ya Ahadi. Loti alichagua eneo bora na lenye rutuba zaidi. Eneo hilo lilikuwa karibu na jiji la Sodoma, ambako watu walikuwa “waovu, nao walitenda dhambi nzito machoni pa Yehova.” (Mwa. 13:​8-13) Mfalme wa Sodoma alikuwa katika muungano wa wafalme watano Wakanaani. Wafalme hao walikuwa wakilipa ushuru kwa mfalme wa Elamu na jambo hilo lilikuwa likiwachukiza. Hivyo, wakaasi. Walipoasi, mfalme wa Elamu akiwa na muungano wake wa wafalme wanne kutoka maeneo ya mbali, walikuja wakishambulia kutoka kaskazini na kuwashinda. Kisha wakaondoka wakiwa wamechukua nyara na mateka. Loti na familia yake walikuwa miongoni mwa mateka hao.

Abrahamu angefanya nini? Angeweza kusema kwamba Loti alijiletea matatizo hayo kwa sababu ya maamuzi aliyofanya. Au huenda angekuwa na wasiwasi kwamba ikiwa angeenda kumwokoa Loti, basi angelazimika kupigana dhidi ya wafalme hao, na mmoja wao alikuwa mtawala wa Shinari. Jiji la Uru ambako Abrahamu alizaliwa lilikuwa katika nchi ya Shinari. Abrahamu angeweza kuwa na wasiwasi kwamba kupigana vita hivyo kungemzuia asiweze hata kuthubutu kurudi katika jiji hilo la Uru ambako alikuwa amefurahia maisha mazuri. Isitoshe, Abrahamu alikuwa mchungaji ambaye alihamahama, hakuwa shujaa wa vita. Angewezaje kushinda majeshi yenye nguvu ya wafalme wanne walioungana? Hata hivyo, Abrahamu hakufikiri kwa njia hiyo. Aliamua kumwokoa Loti akiwa na uhakika kamili kwamba Yehova angekuwa pamoja naye na kumpa ushindi.

Kufikia wakati huo, huenda kambi ya Abrahamu ilikuwa na watu zaidi ya 1,000. Aliwakusanya watumishi wake 318 wa kiume waliozoezwa waende vitani akiwa pamoja na marafiki fulani. Waliyakuta majeshi hayo ya  adui mbali sana upande wa kaskazini, katika eneo la Dani. Aliwagawa wanaume wake katika vikundi na wakashambulia usiku. Ingawa Abrahamu alikuwa na jeshi dogo kuliko lile la adui, aliwashinda hivi kwamba wakaanza kukimbia. Kadiri ambavyo wafalme hao wanne pamoja na majeshi yao walivyozidi kukimbia kuelekea kaskazini, ndivyo Abrahamu alivyoendelea kuwafuatia. Mwishowe, aliwashinda kabisa karibu na jiji la Damasko, kisha akachukua nyara pamoja na mateka wote ambao wafalme hao walikuwa wameteka kule Kanaani. Hatimaye, Loti na familia yake waliokolewa!

Yehova alikuwa na maoni gani kuhusu ujasiri na imani ambayo Abrahamu alionyesha? Jibu lilionekana wazi Abrahamu alipopita karibu na jiji la Salemu. Melkizedeki aliyekuwa mfalme wa jiji hilo, alikuwa pia kuhani wa Yehova. Mfalme huyo alitoka nje ya jiji hilo ili kukutana na Abrahamu na kumpa baraka kutoka kwa Yehova. Abrahamu alimpa Melkizedeki, aliyekuwa mwakilishi wa Yehova, sehemu ya kumi ya nyara bora. Kwa kufanya hivyo, alionyesha alikuwa mnyenyekevu na alitambua kwamba aliwashinda adui zake si kwa nguvu zake mwenyewe bali kwa msaada wa Yehova.

Basi, ni wazi kwamba vita hivyo havikuwa vya mwanadamu, bali vya Mungu. Biblia inataja “kitabu cha Vita vya Yehova.” (Hes. 21:14) Inawezekana kwamba vita ambavyo Abrahamu alipigana ndivyo vita vya kwanza kuandikwa katika kitabu hicho. Karne kadhaa baadaye, wazao wa Abrahamu walipopigana dhidi ya Wakanaani waovu walioishi katika Nchi ya Ahadi, Yehova aliwasaidia watu wake waaminifu kushinda vita moja baada ya nyingine.

Hata hivyo, watu wa Mungu walipomwacha, walipoteza ulinzi wake. Hatimaye, walipomkataa Mwana wake, aliyekuwa Masihi Yehova aliwakataa pia. Badala ya taifa hilo la asili la Israeli, Yehova alianza kubariki taifa la kiroho linaloongozwa na Kristo. Yesu aliwazuia wanafunzi wake kupigana vita halisi. (Mt. 26:52) Badala yake, aliwafundisha jinsi ya kupigana vita vya kiroho. Aliwawekea mfano, akionyesha kwamba mtu anahitaji kuwa na ujasiri mwingi kupigana vita hivyo sawa tu na kupigana vita halisi.

Soma simulizi hili katika Biblia:

• Mwanzo 14:​1-24

• Waebrania 7:​1-4

Jambo la kuzungumzia:

Abrahamu alionyesha ujasiri katika njia zipi wakati wa kipindi hiki cha maisha yake?

 Chimba Zaidi

1. 1. Kuna uthibitisho gani wa mambo yaliyochimbuliwa unaounga mkono usahihi wa simulizi hili? (w89 7/1 5 ¶4–6 ¶1)

   Jibu lako

2. 2. Kwa kutegemea ufafanuzi wa Biblia huenda Sodoma na Gomora zilikuwa wapi? Ni nini kinachounga mkono dai hilo? (it “Bahari ya Chumvi” ¶ 6) A

   Jibu lako

   © Yadid Levy/age fotostock

3. 3. Melkizedeki alikuwa mfalme na kuhani wa Salemu. Salemu lilikuwa wapi? (it “Salemu”)

   Jibu lako

4. 4. Melkizedeki alikuwaje mfano wa kinabii wa Yesu? (it “Kuhani Mkuu” ¶ 27-28) B

   Jibu lako

 Tafakari Masomo Tunayojifunza

• Abrahamu alimruhusu Loti ajichagulie eneo bora na lenye rutuba zaidi. Tunaweza kumwiga Abrahamu katika njia zipi tunaposhughulika na watu wa familia, waamini wenzetu, na watu wengine? C

  Jibu lako

• Tunajifunza mambo gani kutokana na utayari wa Abrahamu wa kumwokoa mpwa wake?

  Jibu lako

• Kulingana na simulizi hili, unaweza kuiga ujasiri wa Abrahamu katika njia zipi nyingine?

  Jibu lako

Tafakari Kumhusu Yehova na Kusudi Lake

• Simulizi hili linanifundisha nini kumhusu Yehova?

  Jibu lako

• Simulizi hili linahusianaje na kusudi la Mungu kwa wanadamu?

  Jibu lako

• Ningependa kuwauliza Abrahamu na Loti maswali gani watakapofufuliwa?

  Jibu lako