MANASE alizaliwa baada ya Yehova kumponya kimuujiza Hezekia baba yake. Mfalme huyo mzuri aliongezewa muda wa kuishi na hivyo akamzaa Manase. Kwa kusikitisha, Hezekia alikufa Manase alipokuwa na umri wa miaka 12. Kwa hiyo, Manase akawa mfalme akiwa bado mvulana, lakini hakuiga mfano mzuri wa baba yake.

Dhambi ambazo Manase alifanya zilikuwa mbaya sana. Wakati wa utawala wake alifanya matendo mabaya sana kama vile uasi-imani, kuabudu sanamu, ulozi, na hata aliwaua watoto wake wa kiume. Kulikuwa na ukatili mwingi kwa makumi ya miaka ya utawala wake. Alisababisha Yerusalemu, jiji la Mungu mwenyewe, liwe na hatia mbaya ya damu. Kwa nini? Kwa sababu aliwaua watu wengi na kwa sababu ya mfano wake watu jijini humo walijihusisha katika matendo ya ukatili. Yehova aliwatuma manabii wamwonye, lakini alikataa kuwasikiliza. Basi huenda ukajiuliza, Manase anawezaje kuwa mfano mzuri wa ujasiri? Acheni tuone.

Siku moja maisha ya Manase yalibadilika ghafla. Kwa kuwa mfalme huyo alikataa kusikiliza maonyo ya manabii wa Yehova, Mungu aliwaruhusu wakuu wa jeshi la Ashuru wavamie Yuda. Biblia inasema hivi: “Wakamkamata Manase kwa kulabu na kumfunga kwa pingu mbili za shaba na kumpeleka Babiloni.” Si rahisi kuwazia jinsi mfalme huyo mwenye kiburi alivyoaibika au hata kuwazia maumivu na magumu aliyokabili wakati wa safari hiyo ndefu ya kwenda Babiloni.

Akiwa mateka huko Babiloni, Manase alikuwa na muda wa kutafakari mambo yote mabaya aliyokuwa amefanya maishani mwake. Huenda hakuwa amewahi kujihisi dhaifu, mpweke, na bila mtu wa kumsaidia. Miungu yote ya uwongo ambayo alikuwa ameabudu ilikuwa wapi? Lazima alisikitika sana kwamba hata alikuwa amewaua watoto wake kwa ajili ya miungu hiyo ambayo haikuwa na nguvu za kumsaidia. Alitambua kwamba alihitaji kufanya mabadiliko. Kwanza kabisa alisali kwa Yehova, na hakufanya hivyo kwa kiburi. Badala yake “akaendelea kujinyenyekeza sana mbele za Mungu wa mababu zake.” Yehova aliona kwamba Manase alikuwa akibadilika, kwa hiyo akasikiliza sala zake. Kadiri ambavyo Manase alivyozidi kuonyesha unyenyekevu, ndivyo Yehova alivyozidi kumkaribia. (Zab. 138:6) Manase alisali kwa “Yehova Mungu wake” na kumsihi amwonyeshe kibali. Kwa kweli, “aliendelea kusali” kwa unyenyekevu.

 Yehova alihisije kuhusu sala hizo za Manase? Biblia inasema hivi: “[Aliguswa] na sala yake ya kusihi, akasikia ombi lake la kutaka kibali.” Kwa hiyo, Mungu alitenda kwa rehema na kumsaidia Manase kwa njia ya pekee. “Akamrudisha Yerusalemu kwenye ufalme wake.” Hivyo, Manase alikuwa na nafasi ya kuonyesha amebadilika kikweli kwa kufanya maamuzi yenye hekima.

Manase aliporudi Yerusalemu, alikabili jaribu kali zaidi la imani yake. Nchi ilikuwa imejaa watu ambao walikuwa wameiga mfano wake mbaya kwa miaka mingi. Je, wangemsikiliza au wangekasirika kwa sababu alikuwa amebadilika? Ikiwa Manase alikuwa na wasiwasi huo, bado alitenda kwa ujasiri na kuanza kurekebisha mambo. Baada ya kujenga ukuta ili kuimarisha ulinzi wa Yerusalemu, alipita katika jiji lote akiharibu miungu ya kigeni na sanamu zote, kutia ndani zilizokuwa katika hekalu la Yehova. Alirekebisha madhabahu ya Yehova na kutoa dhabihu juu yake. Na huenda jambo gumu zaidi ambalo alifanya lilikuwa kuzungumza na watu wake. Alibadili kauli ambayo alikuwa akisema kwa miaka mingi. Badala ya kuwaambia waabudu miungu ya uwongo, pindi hii aliwahimiza watu wa Yuda “wamtumikie Yehova Mungu wa Israeli.” Kwa kweli, mtu huyo aliyekuwa mtenda-dhambi sugu alikuwa amebadilika sana. Naye Yehova alitukuzwa kwa sababu kwa mara nyingine tena alithibitika kuwa “mwema na . . . tayari kusamehe.”—Zab. 86:5.

Kwa kusikitisha, Manase asingeweza kurekebisha matendo yote maovu aliyokuwa amefanya. Yehova alimsamehe mfalme huyo, lakini hangeweza kupuuza jeuri na mauaji yote ambayo yalikuwa yamefanywa wakati wa utawala wake. Watu wa Yuda hawakutubu wala kubadilika kama mfalme wao alivyofanya. Hata Amoni, mwana wa Manase, alikataa kujifunza kutokana na mabadiliko ambayo baba yake alifanya. Lakini Manase alijaribu kufanya yote aliyoweza ili kumsaidia mjukuu wake Yosia. Bila shaka, Yosia alikumbuka kwamba babu yake alitenda kwa ujasiri ili kujinyenyekeza na kutubu. Baada ya miaka mingi ya kutenda maovu, Manase alikuwa amebadilika kabisa. Kuanzia wakati huo hadi mwisho wa maisha yake, alikuwa na uhakika kwamba Baba yake mwenye upendo Yehova, alikuwa amemsamehe.

Soma simulizi hili katika Biblia:

• 2 Wafalme 21:​1-26

• 2 Mambo ya Nyakati 33:​1-25

Jambo la kuzungumzia:

Manase alionyesha ujasiri katika njia zipi?

 Chimba Zaidi

1. 1. Manase alitenda “mambo maovu zaidi kuliko Waamori wote” waliokuwa wakiishi nchini humo kabla ya Waisraeli. Hilo linatufundisha nini kumhusu Manase? (2 Fal. 21:11; w00 10/15 16 ¶5-6; gl 10 ¶5, maelezo ya chini)

   Jibu lako

2. 2. Wanaakiolojia wamegundua vitu gani ambavyo vinathibitisha kwamba Manase alikuwa mtu halisi na kwamba Ashuru ilikuwa serikali yenye nguvu wakati wa utawala wake? (it “Manase” Na. 4 ¶2) A

   Jibu lako

   © The Trustees of the British Museum. Licensed under CC BY-NC-SA 4.0. Source

3. 3. Ni nini kinachoonyesha kwamba Waashuru waliwafunga mateka wao kwa kulabu? (2 Nya. 33:11; w13 4/1 10 ¶2-3) B

   Jibu lako

4. 4. Yehova alinyooshaje “kamba ya kupimia” na kutumia “timazi” juu ya Yerusalemu? (2 Fal. 21:13; it “Timazi” ¶2)

   Jibu lako

 Tafakari Masomo Tunayojifunza

• Simulizi hili linatufundisha nini kuhusu toba?

  Jibu lako

• Kutokana na mfano wa Manase, kwa nini tunaweza kusema kwamba ingawa Yehova huwasamehe watenda dhambi wanaotubu, bado watahitaji kukabiliana na matokeo ya dhambi zao? (Yer. 15:​3-5) C

  Jibu lako

• Unaweza kuiga ujasiri wa Manase katika njia zipi nyingine?

  Jibu lako

Tafakari Kumhusu Yehova na Kusudi Lake

• Simulizi hili linanifundisha nini kumhusu Yehova?

  Jibu lako

• Simulizi hili linahusianaje na kusudi la Mungu kwa wanadamu?

  Jibu lako

• Ningependa kumuuliza Manase maswali gani atakapofufuliwa?

  Jibu lako