MFALME ASA alipigwa na butwaa alipoona jeshi la Waethiopia kwa mara ya kwanza. Licha ya kwamba watu wa Yehova walikuwa wameenda vitani mara nyingi kabla ya hapo, hakuna rekodi inayoonyesha kwamba walikuwa wamewahi kukabiliana na jeshi kubwa kama hilo. Lilikuwa na wanajeshi milioni moja—karibu mara mbili ya jeshi la Asa, na lilikuwa limekuja Yuda likiwa tayari kwa ajili ya vita. Asa angepata wapi ujasiri wa kuwalinda watu wake?

Hiyo haikuwa mara ya kwanza ambayo Asa alihitaji kuonyesha ujasiri. Alipoanza kutawala Yuda miaka kumi hivi mapema, alionyesha kwamba alikuwa kama babu yake wa zamani Mfalme Daudi. Kama Daudi, Asa alitaka kumpendeza Mungu wake, Yehova. Hivyo, kwa unyenyekevu Mfalme Asa alimsikiliza nabii wa Yehova, Odedi, na mwana wake Azaria. Mtawala huyo mwenye umri mdogo alijipa ujasiri na kurekebisha baadhi ya mambo maovu ambayo watu walikuwa wakifanya tangu Mfalme Sulemani alipomwasi Yehova. Kwa ujasiri, Asa aliharibu sanamu ambazo watu walikuwa wakiabudu na akawaondoa wanaume makahaba wa hekaluni.

Pia, Asa alirekebisha dhambi za familia yake mwenyewe. Nyanya yake aliyeitwa Maaka, alikuwa na cheo muhimu cha “mama malkia” nchini Yuda. Maaka alikuwa amesimamisha sanamu chafu sana, ambayo huenda ilitumiwa kuendeleza ibada ya ngono. Asa hakuruhusu uhusiano wa kifamilia uwe muhimu kuliko ushikamanifu wake kwa Yehova. Alimwondoa nyanya yake kutoka kwenye cheo chake na kuiteketeza sanamu hiyo aliyokuwa ametengeneza. Yehova alifurahi kuona mambo ambayo Asa alifanya, kwa hiyo akaibariki nchi kwa amani kwa miaka kumi. Hata hivyo, siku moja jeshi kubwa la Waethiopia likaja kuishambulia Yuda! Yehova alimsaidiaje Asa?

Asa alipotazama kwenye maeneo ya chini ya Yuda, aliona jeshi kubwa la Waethiopia. Jambo la kwanza ambalo alifanya ni kusali kwa Yehova. Wazia jinsi wanajeshi wake walivyohisi walipomsikia Asa akisali hivi: “Ee Yehova, haijalishi kwako ikiwa wale unaowasaidia ni wengi au hawana nguvu. Tusaidie, Ee Yehova Mungu wetu, kwa maana tunakutegemea wewe, na katika jina lako tumekuja kupigana na umati huu. Ee Yehova, wewe ni Mungu wetu. Usiache mwanadamu anayeweza kufa akushinde.” Lazima Yehova awe alifurahi sana kusikia sala hiyo ya kutoka moyoni.  Aliona kwamba Asa alikuwa kama Yonathani, mwana wa Mfalme Sauli. Asa na Yonathani walitambua kwamba maadamu Yehova alikuwa upande wao hawakuhitaji kuwa na jeshi kubwa kuliko la maadui wao. (1 Sam. 14:6) Kwa kweli, Mwenye Enzi Kuu ya ulimwengu wote akiwa upande wetu, sikuzote jeshi letu ndilo kubwa zaidi!

Basi Asa akawaongoza wanaume wake kwenda vitani. Ni nini kilichotokea? Biblia inasema hivi kuwahusu maadui hao: “Walipondwapondwa na Yehova na jeshi lake.” Hakuna hata mwanajeshi mmoja aliyeokoka.

Baada ya hapo, Asa aliendelea kuwatia moyo watu wamwabudu Yehova. Watu wengi kutoka kwenye ufalme wa kaskazini wa makabila kumi ya Israeli walihamia Yuda iliyokuwa upande wa kusini ili waweze kurudia ibada safi katika hekalu la Yerusalemu. Asa hata aliwakusanya watu wote waliokuwa Yuda, nao wakaapa kuwa washikamanifu kwa Yehova.

Hata hivyo, tunasoma kwamba Asa alifanya makosa fulani makubwa. Mfalme wa Israeli alipotisha kushambulia Yuda, Asa hakumwomba Yehova msaada. Badala yake, alimpa mfalme wa Siria rushwa ili aishambulie Israeli. Yehova alipomtuma mwonaji, au nabii, aliyeitwa Hanani akamsahihishe Asa, mfalme huyo alikasirika na kumtupa nabii huyo gerezani. Mbali na hilo, Asa alipozeeka akawa mgonjwa sana. Badala ya kumwomba Yehova msaada, aliwategemea waponyaji. Kwa hiyo, inaonekana kwamba Asa hakuendelea kuwa na imani yenye nguvu kama aliyokuwa nayo mwanzoni.

Lakini Yehova ni Baba mwenye subira sana. Neno lake linatuambia hivi kuhusu utawala wa Asa wa miaka 41: “Hata hivyo, moyo wa Asa ulikuwa kamili kwa Yehova maisha yake yote.” Simulizi la Asa lililoongozwa na roho linatukumbusha kwamba Yehova anawapenda wale wanaompenda Yeye. Lakini pia linatufundisha kwamba hatupaswi kusahau mambo ambayo Yehova ametufanyia. Kadiri miaka inavyopita, anatupatia sababu nyingi zaidi za kuendelea kuwa jasiri!

Soma simulizi hili katika Biblia:

• 1 Wafalme 15:​8-24

• 2 Mambo ya Nyakati 14:​1–16:14

Jambo la kuzungumzia:

Asa alionyesha ujasiri katika njia zipi?

1. 2. Huenda mwana wa Hanani mwonaji alikuwa nani, naye aliigaje mfano wa ujasiri wa baba yake? (it “Hanani” Na. 2)

   Jibu lako

2. 3. Ingawa Asa alifanya makosa, alifanya nini ambacho kilionyesha moyo wake “ulikuwa kamili kwa Yehova”? (1 Fal. 15:14; w17.03 19 ¶5-6)

   Jibu lako

3. 4. Halikuwa jambo la kawaida kwa Waisraeli kuteketeza maiti. Kwa hiyo, kwa nini Biblia inasema kwamba “waliwasha moto mkubwa isivyo kawaida kwa ajili” ya Asa? (2 Nya. 16:14; w05 12/1 20 ¶5)

   Jibu lako

 Tafakari Masomo Tunayojifunza

• Asa alitiwa moyo na nabii Azaria hivi kwamba akarudisha ibada safi. Maneno yako yanawezaje kuwatia moyo wengine? B

  Jibu lako

• Asa alimtegemea Yehova alipokabili jeshi kubwa lakini baadaye akawategemea wanadamu alipokabili jeshi dogo zaidi. Hilo linatufundisha nini kuhusu umuhimu wa kumtegemea Yehova katika njia zetu zote? (Met. 3:​5, 6)

  Jibu lako

• Unaweza kuiga ujasiri wa Asa katika njia zipi nyingine?

  Jibu lako

Tafakari Kumhusu Yehova na Kusudi Lake

• Simulizi hili linanifundisha nini kumhusu Yehova?

  Jibu lako

• Simulizi hili linahusianaje na kusudi la Mungu kwa wanadamu?

  Jibu lako

• Ningependa kumuuliza Asa maswali gani atakapofufuliwa?

  Jibu lako