ABIGAILI alikabili hali ngumu sana iliyosababishwa na wanaume wawili wenye hasira. Mmoja wao alikuwa Nabali, mume wake. Nabali alikuwa mwanamume mkatili, mkali, na asiyefaa kitu. Mwanamume wa pili alikuwa Daudi, ambaye alikuwa mtu mzuri, mtumishi mwaminifu wa Yehova, na mfalme wa wakati ujao wa Israeli. Hata hivyo, Nabali alikuwa amemkasirisha Daudi, na sasa nyumba yote ya Abigaili ilikuwa hatarini. Abigaili alikuwa mwanamke mrembo na mwenye hekima. Lakini angepataje ujasiri wa kushughulikia hali hii?

Abigaili alipata taarifa kwa kuchelewa kuhusu kilichokuwa kimetokea. Mtumishi wake alimwendea na kumwambia walikuwa hatarini. Daudi alikuwa akija nyumbani kwao akiwa na wanaume 400. Wote walikuwa na silaha na walikuwa wameazimia kumwangamiza Nabali pamoja na “nyumba yake yote.” Kwa nini? Daudi alikuwa amewatuma watu wake kwa Nabali wakamwombe chakula. Hilo halikuwa ombi la ajabu. Hata hivyo, Nabali aliwatukana vikali, hata akamwita Daudi mtumishi aliyemtoroka bwana wake! Nabali hakuzingatia kwamba Daudi na wanaume wake walikuwa kama ukuta wa ulinzi kuwazunguka wachungaji wake, mifugo yake mingi, na hata kumzunguka Nabali mwenyewe aliyekuwa tajiri. Muda wote huo, Daudi alikuwa akiwalinda Waisraeli kwa ushikamanifu dhidi ya makundi ya wavamizi, licha ya kwamba alikuwa amelazimika kuwa mkimbizi kwa sababu ya Mfalme Sauli ambaye pia alikuwa akimtesa bila msingi.

Mtumishi wa Nabali alijua kwamba hakukuwa na haja ya kuzungumza na Nabali kuhusiana na hali hiyo. Mtumishi huyo alisema waziwazi kwamba Nabali “ni mtu asiyefaa kitu hivi kwamba hakuna mtu anayeweza kuzungumza naye.” Lakini mtumishi huyo alijua kwamba Abigaili angemsikiliza na kutenda kwa hekima. Abigaili angefanya nini?

Abigaili aliendelea kuwa mtulivu. Lakini alitambua kwamba alihitaji kutenda upesi. Alitayarisha chakula kingi sana, akakipakia juu ya punda, kisha akawatuma watumishi wake wakipeleke kwa Daudi. Abigaili akawafuata nyuma akiwa amepanda juu ya punda. Hakumwambia Nabali chochote kuhusu hilo. Huenda alijua kwamba Nabali angejaribu kumzuia kufanya jambo linalofaa.

Abigaili alipokuwa juu ya punda wake akishuka bondeni nyuma ya mlima, alikutana kwa ghafla na Daudi na wanaume wake. Alishuka haraka  kutoka kwenye punda wake na kumwendea Daudi aliyekuwa na hasira. Alijiangusha mbele zake na kumsihi aruhusiwe kuzungumza. Unyenyekevu wake ulimtuliza Daudi.

Abigaili alikubali kubeba lawama ya upumbavu wa mume wake, na akakubali kwamba Daudi alikuwa na haki ya kumkasirikia mume wake, ambaye alikuwa ametenda kwa njia isiyofaa. Alimkumbusha Daudi kwamba alikuwa mwanamume mwenye imani yenye nguvu katika Yehova Mungu. Kwa msingi huo, Yehova asingependa Daudi awe na hatia ya damu, wala asingependa Daudi ajute kwa kuwaua watu wasio na hatia. Pia, alisema kwamba Yehova angemjengea Daudi nyumba inayodumu na kumfanya kuwa kiongozi wa Israeli, na kwamba Yehova angemwokoa kutoka kwa maadui wake wote. Ni wazi kwamba Abigaili alijua Yehova alikuwa amemtia Daudi mafuta kuwa mfalme anayefuata wa Israeli.

Maneno yake yenye hekima na fadhili yalimtuliza Daudi aliyekuwa na hasira. Daudi akasema: “Msifu Yehova Mungu wa Israeli, aliyekutuma leo ukutane nami!” Alimbariki Abigaili kwa busara yake, naye akakubali ushauri wake wenye hekima. Akamwambia: “Tazama, nimekusikiliza na nitatimiza ombi lako.”

Nabali hakujua chochote kuhusu mambo ambayo Abigaili alikuwa amefanya. Usiku huo alikula na kunywa, naye ‘akalewa kabisa.’ Abigaili hakumwambia jambo lolote mpaka asubuhi, divai ilipomtoka, lakini huenda bado angeweza kulipuka kwa hasira wakati wowote. Abigaili akamwambia yote yaliyokuwa yametendeka. Labda alitarajia kwamba Nabali angemlipukia kwa hasira au hata kumpiga. Lakini ni nini kilichotokea? “Moyo wa Nabali ukawa kama wa mtu aliyekufa, akalala akiwa amepooza kama jiwe.” Kisha, siku kumi hivi baadaye, “Yehova akampiga Nabali, naye akafa.” Mungu alimwadhibu Nabali kwa kumtendea Daudi vibaya, kwa kuwa alikuwa mtumishi wake aliyetiwa mafuta. Abigaili alinufaika pia kwa sababu aliwekwa huru kutoka kwenye ndoa ambayo haikuwa na furaha.

Yehova alimbariki Abigaili kwa njia kubwa hata zaidi. Daudi aliposikia kwamba Nabali alikuwa amekufa, alimwomba Abigaili awe mke wake naye Abigaili alikubali. Daudi akaja kuwa mfalme, kwanza wa Yuda na baadaye wa Israeli yote, na Abigaili akamzalia mwana. Baadaye, pindi fulani Abigaili alitekwa na maadui wa Mungu. Hata hivyo, mume wake aliyempenda na aliyekuwa jasiri alimwokoa.

Soma simulizi hili katika Biblia:

• 1 Samweli 25:​1-43; 30:​1-6, 16-20

Jambo la kuzungumzia:

Abigaili alionyesha ujasiri katika njia zipi?

1. 3. Kwa nini Nabali alipaswa kuonyesha shukrani kwa msaada ambao wanaume wa Daudi walimpa? (ia 77-78 ¶9-10) B

   Jibu lako

   Hanan Isachar/Alamy Stock Photo

2. 4. Abigaili alimaanisha nini alipomwambia Daudi kwamba “Yehova Mungu wako atakuwa ameufungia salama uhai wako katika mfuko wa uzima”? (1 Sam. 25:29; it “Uhai” ¶45)

   Jibu lako

 Tafakari Masomo Tunayojifunza

• Waume wanaweza kujifunza nini kutokana na jinsi Daudi alivyomsikiliza Abigaili? C

  Jibu lako

• Dada ambaye mume wake si mwamini anaweza kujifunza nini kutoka kwa Abigaili?

  Jibu lako

• Unaweza kuiga ujasiri wa Abigaili katika njia zipi nyingine?

  Jibu lako

Tafakari Kumhusu Yehova na Kusudi Lake

• Simulizi hili linanifundisha nini kumhusu Yehova?

  Jibu lako

• Simulizi hili linahusianaje na kusudi la Mungu kwa wanadamu?

  Jibu lako

• Ningependa kumuuliza Abigaili maswali gani atakapofufuliwa?

  Jibu lako