STEFANO alikuwa mwanadamu asiye mkamilifu. Hata hivyo, alipokabili hali ya hatari sana, Biblia inasema hivi kumhusu: “Uso wake [ulikuwa] kama uso wa malaika.” Alikuwa mtulivu na hakuwa na wasiwasi licha ya kwamba alikuwa karibu kutoa ushahidi mbele ya Sanhedrini, mahakama kuu ya Wayahudi. Miezi michache tu mapema, mahakama hiyohiyo ilikuwa imeamuru Yesu auawe. Mtu aliyekuwa akikabili hatari kubwa namna hiyo angewezaje kuwa mtulivu hivyo? Kwa sababu alikuwa jasiri.

Biblia inasema kwamba Stefano alikuwa “mwanamume aliyejaa imani na roho takatifu.” Mitume kule Yerusalemu walimwamini, kwa hiyo akawa miongoni mwa wale waliopewa mgawo wa kushughulikia mahitaji ya wengine kutanikoni. Siku moja, Wayahudi fulani wapinzani walikasirishwa sana na Stefano na wakaanza kubishana naye. Stefano alitumia maandiko kwa njia nzuri sana hivi kwamba wakashindwa kupinga maneno yake. Hilo lilifanya wawe na hasira hata zaidi kwa hiyo wakamkamata na kumpeleka mbele ya Sanhedrini. Hivyo, Stefano akajikuta mbele ya mahakama hiyo ambayo ingeamua ikiwa angestahili kufa.

Yesu alikuwa amewaahidi wafuasi wake hivi ikiwa wangekabili hali kama hiyo: “Msihangaike kuhusu jambo mtakalosema; bali semeni jambo mtakalopewa saa hiyo, kwa maana si ninyi mnaosema, bali ni roho takatifu.” (Marko 13:11) Ikiwa Stefano alijua kuhusu ahadi hiyo, bila shaka ilimchochea awe jasiri hata zaidi. Nayo roho ya Yehova ilimsaidia awe mtulivu alipokuwa amesimama mbele ya Sanhedrini hivi kwamba watu walifikiri alionekana kama malaika.

Mahakama hiyo ilifanyizwa na watu 71. Wote walikuwa wanaume wenye mamlaka, walimu, na viongozi wa dini ya Kiyahudi. Mahakama hiyo ilikutana ndani ya jumba kubwa sana, na mahakimu hao waliketi katika safu tatu zilizopangwa kwa nusu mduara. Kulikuwa pia na waandishi wawili walioandika kila kitu kilichotokea ndani ya jumba hilo. Stefano alisimama mbele yao akiwa ameshtakiwa eti alikuwa amekufuru Sheria ya Musa na hekalu. Hayo yalikuwa makosa yaliyostahili kifo. Kayafa, aliyekuwa kuhani mkuu, akamwamuru Stefano ajibu mashtaka hayo.

Stefano akaanza kuzungumza. Alieleza historia ya jinsi Mungu alivyoshughulika na watu wake Waisraeli. Kwanza alizungumza kumhusu Abrahamu. Kisha akazungumza kumhusu Yosefu, aliyeteswa na ndugu zake, waliokuwa mababa wa makabila ya Israeli. Stefano akazungumza kwa heshima kumhusu  Musa, na akakazia jinsi taifa hilo lilivyopinga mwongozo wake. Akiongozwa na roho, Stefano alitaja habari kumhusu Musa ambazo hazikuwa zimeandikwa katika Maandiko ya Kiebrania.

Hotuba ya Stefano ilionyesha kwamba aliheshimu sana Sheria ya Musa, hema la ibada, na hekalu ambalo Yehova alikuwa ameweka litumiwe kwa ajili ya ibada safi. Wakati huohuo akaonyesha kwamba tena na tena watu wa Mungu waliwapinga wawakilishi ambao Yehova alikuwa amewatumia.

Stefano aliona wazi kwamba watu hao wenye roho ngumu wasingemwonyesha rehema. Alipokuwa akimalizia hotuba yake, roho ya Yehova ikampa ujasiri wa kuwaambia ujumbe wa hukumu. Stefano akawaambia kwamba walikuwa “watu wagumu,” na kwamba “sikuzote [waliipinga] roho takatifu” kama tu mababu zao walivyofanya. Jambo baya hata zaidi ni kwamba walikuwa wamemuua yule nabii ambaye Musa alitabiri angekuja, aliyekuwa mkuu kuliko Musa. Stefano akawaambia kwamba ‘walimsaliti na kumuua’ mtu huyo mwadilifu—Yesu, Masihi.

Washiriki wa Sanhedrini waliwaka hasira hivi kwamba wakaanza “kumsagia meno yao.” Lakini Yehova akamwimarisha kwa kumpa maono ya mambo yaliyokuwa yakitendeka mbinguni. Stefano alisema hivi: “Tazama! Ninaziona mbingu zimefunguka na Mwana wa binadamu akiwa amesimama kwenye mkono wa kuume wa Mungu.” Stefano aliposema hivyo, washiriki hao wa Sanhedrini wakalipuka kwa hasira na wakataka kumpiga! Kwa nini? Huenda maneno hayo yaliwakumbusha jambo fulani. Miezi michache tu kabla ya hapo, Yesu alitabiri hivi alipokuwa akishtakiwa mbele ya mahakama hiyohiyo: “Mtamwona Mwana wa binadamu akiwa ameketi kwenye mkono wa kuume wa nguvu.” (Mt. 26:64) Stefano alikuwa akiwafunulia kwamba maneno hayo yalitimizwa. Yesu alikuwa amesimama kando ya Yehova!

Kwa hasira walimshambulia Stefano, wakamtupa nje ya jiji, na kumpiga kwa mawe. Huenda bado Stefano alikuwa akimwona Yesu katika maono, kwa hiyo akamwomba Bwana wake aipokee roho yake. Kisha akamwomba Yehova jambo moja la mwisho: “Usiwahesabie dhambi hii.” Stefano akalala katika usingizi wa kifo, akiwa mshindi na mfia-imani wa kwanza Mkristo. Lakini kijana mmoja ambaye aliunga mkono kuuawa kwa Stefano, hakusahau kamwe maneno hayo ya mwisho. Tutazungumza kumhusu katika Sura ya 50, 51, na 53.

Soma simulizi hili katika Biblia:

• Matendo 6:5–8:2

Jambo la kuzungumzia:

Stefano alionyesha ujasiri katika njia zipi?

 Chimba Zaidi

1. 1. Kwa nini mitume walimchagua Stefano na wanaume wengine “waliojaa roho na hekima” wasimamie kazi ya kugawa chakula? Mdo. 6:​3-5; bt 41-42 ¶17-18) A

   Jibu lako

2. 2. Kuna habari gani muhimu kumhusu Musa iliyo katika hotuba ya Stefano? (bt 48 ¶13, maelezo ya chini)

   Jibu lako

3. 3. Ni nini kilichomsaidia Stefano aendelee kuwa mtulivu alipokuwa akiteswa? (w18.10 32)

   Jibu lako

4. 4. Je, Matendo 7:59 inaonyesha Stefano alisali kwa Yesu? (w05 1/1 31)

   Jibu lako

 Tafakari Masomo Tunayojifunza

• Stefano alikuwa “amejaa imani na roho takatifu” na “kibali cha Mungu na nguvu.” Hata hivyo, alikubali kwa hiari kugawa chakula. (Mdo. 6:​2, 5, 8) Ndugu walio na vipaji au walio na migawo mizito wanaweza kumwigaje Stefano? B

  Jibu lako

• Stefano alisali kwa ajili ya wale waliokuwa wakimtesa. Tunawezaje kuwaonyesha upendo wale wanaotupinga na kututesa leo? (Mt. 5:​44-48)

  Jibu lako

• Unaweza kuiga ujasiri wa Stefano katika njia zipi nyingine?

  Jibu lako

Tafakari Kumhusu Yehova na Kusudi Lake

• Simulizi hili linanifundisha nini kumhusu Yehova?

  Jibu lako

• Simulizi hili linahusianaje na kusudi la Mungu kwa wanadamu?

  Jibu lako

• Ni mambo gani yanayokufanya ushukuru kwamba Stefano alichaguliwa kutawala na Kristo mbinguni?

  Jibu lako