YESU alipokutana na Simoni kwa mara ya kwanza aliamua mara moja kumpa jina jipya. Kristo alisema hivi: “Wewe ni Simoni mwana wa Yohana; utaitwa Kefa.” Inaonekana kwamba jina “Kefa” lina maana ileile na jina “Petro,” linalomaanisha “Kipande cha Mwamba.” Kwa nini Yesu alichagua jina hilo? Jiwe ni gumu na imara na linaweza kutumiwa katika ujenzi. Inaonekana Yesu alikuwa akisema kwamba Petro atakuja kuwa jasiri na ataimarisha makutaniko.

Je, Petro alikuwa imara kama mwamba? Kama tulivyoona katika Sura ya 45, Petro hakuwa hivyo sikuzote. Nyakati nyingine hakuwa imara na aliyumbishwa kwa sababu ya woga. Lakini bado Yesu aliona kwamba Petro alikuwa na uwezo wa kuwa imara. Alikuwa na uhakika kwamba kadiri muda ulivyopita, Petro angesitawisha sifa ya ujasiri.

Baada ya Yesu kufa na kufufuliwa, aliwapa mitume wake kazi muhimu sana. Petro alikuwa na hamu kubwa ya kufanya kazi hiyo. Hatua kwa hatua aliendelea kuonyesha ujasiri. Maelfu ya Wayahudi walipokusanyika kwa ajili ya sherehe huko Yerusalemu, Petro alisimama na kwa ujasiri akawaambia moja kwa moja kwamba walikuwa wamemuua Masihi. Wengi kati yao “walichomwa moyoni” na wakachochewa kutenda kupatana na mahubiri hayo ya Petro. Kwa sababu hiyo, watu 3,000 hivi wakabatizwa na kuwa wanafunzi wa Yesu.

Petro alifanya kazi ya kuhubiri iwe kazi muhimu zaidi maishani mwake. Yesu alikuwa amemkabidhi “funguo za Ufalme” na kumpa utume wa kufungua njia ya kuingia katika Ufalme wa mbinguni kwa ajili ya vikundi vitatu vya watu. Kwa hiyo, kwa ujasiri na bila ubaguzi, Petro aliwahubiria Wayahudi, kisha Wasamaria, na mwishowe Watu wa Mataifa, au wasio Wayahudi. Alisafiri kwenda maeneo ya mbali akahubiri na kuwatia moyo waamini wenzake, nyakati nyingine akisafiri na mke wake. Petro hata alisafiri kwenda eneo la mbali la Babiloni na kuishi huko.

Kadiri miaka ilivyosonga, Petro aliendelea kuhubiri kwa ujasiri huku akikabiliana na changamoto na kuvumilia upinzani. Yeye na mitume wenzake walifungwa gerezani mara kadhaa. Viongozi wa dini ya Kiyahudi waliwaagiza waache kuhubiri. Hata hivyo, Petro akawaambia: “Lazima tumtii Mungu kuwa mtawala badala ya wanadamu.” Licha ya kwamba baada ya hapo walipigwa, bado waliendelea kuwahubiria watu kuhusu Ufalme  wa Mungu na kumhusu Mfalme ambaye Yehova alikuwa amemweka rasmi, Yesu Kristo.

Mateso hayo yalizidi kuwa mabaya. Kama tulivyoona katika sura iliyotangulia, Stefano aliuawa. Miaka kadhaa baadaye, Yakobo, aliyekuwa mtume na rafiki ya Petro, naye pia akauawa. Mtawala mwovu ambaye alimuua Yakobo alipoona kwamba jambo hilo liliwafurahisha Wayahudi waliokuwa wakiwapinga Wakristo, aliagiza kwamba Petro akamatwe pia. Walinzi walimfunga Petro minyororo na wakamtupa ndani ya gereza ambako walihakikisha kwamba hatoroki. Je, Petro alijiuliza ikiwa huo ndio wakati ambao Yesu alikuwa ametabiri kwamba angefungwa na kupelekwa asikotaka ili akauawe?

Ghafla malaika akatokea usiku sana. Akamwamsha Petro, akaondoa minyororo yake, akamtoa gerezani, wakawapita walinzi, lango kubwa la gereza hilo likafunguka, nao wakatoka nje barabarani. Petro alifanya nini baada ya hapo? Hakufikiria tu kuhusu usalama wake mwenyewe. Badala yake, alienda moja kwa moja mahali ambapo alijua ndugu na dada zake walikuwa wakimwabudu Yehova na kusali. Wazia jinsi walivyotiwa moyo walipomwona!

Petro hakusahau kamwe amri ya Bwana wake: “Watie nguvu ndugu zako”; “lisha kondoo wangu wadogo.” (Luka 22:32; Yoh. 21:17) Alihubiri kwa ujasiri na kuwajenga watu wa Mungu popote alipoenda. Hakuwa mkamilifu kwa hiyo alifanya makosa. Pindi moja alikosea kwa sababu ya kushinikizwa hivi kwamba mtume mwenzake alilazimika kumrekebisha. Lakini Petro alikubali shauri alilopewa na hakurudia kosa hilo. Aliendelea kuwatia moyo ndugu na dada zake. Aliandika barua mbili zilizoongozwa na roho ambazo zilikuja kuwa sehemu ya Biblia. Baada ya kutumikia kwa uaminifu kwa makumi ya miaka, Petro alikamatwa na kupelekwa gerezani kwa mara ya mwisho, ili akauawe. Lakini alidumisha imani na ujasiri wake. Kama Yesu alivyosema, kwa kweli Petro alithibitika kuwa “mwamba”!

Soma simulizi hili katika Biblia:

• Mathayo 16:​18, 19

• Yohana 1:​40-42; 21:​14-19

• Matendo 2:​14-43; 5:​17-42; 8:​14-17, 25; 10:​44-48; 12:​1-17

• Wagalatia 2:​11-14

• 1 Petro 5:13

• 2 Petro 1:​12-15

Jambo la kuzungumzia:

Petro alionyesha ujasiri katika njia zipi katika kipindi hiki cha maisha yake?

 Chimba Zaidi

1. 1. Yesu alimpa Petro “funguo za Ufalme.” Petro alitumiaje funguo hizo? (Mt. 16:​18, 19; ijwbq makala ya 124 ¶1-5) A

   Jibu lako

2. 2. Ni nini kinachoonyesha kwamba Petro hakuwa na ubaguzi hata kabla ya kumtembelea Kornelio aliyekuwa mtu wa mataifa? (Mdo. 10:​5-7, 23; bt 69 ¶1, maelezo ya chini) B

   Jibu lako

3. 3. Ni nini kinachoonyesha kwamba Petro alikubali shauri alilopewa na Paulo? (w17.04 26-27 ¶15-17)

   Jibu lako

4. 4. Kwa nini Petro alihamia Babiloni? (it “Utekwani” ¶24)

   Jibu lako

 Tafakari Masomo Tunayojifunza

• Petro alizungumza kwa ujasiri na kwa busara mbele ya umati huko Yerusalemu. Ni pindi zipi hasa ambazo tunahitaji kuwa na ujasiri na busara?

  Jibu lako

• Ingawa Petro alikuwa na mapendeleo makubwa kutanikoni, alikubali shauri kutoka kwa Paulo. Tunaweza kumwigaje Petro? C

  Jibu lako

• Kulingana na simulizi hili, unaweza kuiga ujasiri wa Petro katika njia zipi nyingine?

  Jibu lako

Tafakari Kumhusu Yehova na Kusudi Lake

• Simulizi hili linanifundisha nini kumhusu Yehova?

  Jibu lako

• Simulizi hili linahusianaje na kusudi la Mungu kwa wanadamu?

  Jibu lako

• Umejifunza mambo gani kumhusu Petro katika simulizi hili ambayo yamekufanya uwe na furaha kwamba alichaguliwa kutawala na Kristo mbinguni?

  Jibu lako