SAULI WA TARSO aliporudi Yerusalemu baada ya miaka mitatu hivi, alienda kuwatafuta Wakristo waliokuwa katika jiji hilo. (Gal. 1:​15-19) Yeye aliwaona kama ndugu na dada zake, lakini wao bado walimwona kuwa mtesaji mkatili. Inaonekana kwamba wengi hawakuamini kwamba alikuwa amebadilika. Hata hivyo, mwanamume mmoja alikuwa na ujasiri na huruma ya kumsaidia Sauli. Baadaye, mwanamume huyo alipewa jina Barnaba.

Barnaba anapotajwa kwa mara ya kwanza katika Biblia anatambulishwa kwa jina Yosefu. Muda mfupi baada ya Pentekoste 33 W.K., Yosefu aliuza mali fulani na akatoa pesa alizopata ili kuwasaidia Wakristo wenzake waliokuwa na uhitaji. Mitume wakampa jina Barnaba, linalomaanisha “Mwana wa Faraja,” kwa sababu ya kujulikana kuwa mwenye fadhili na utayari wa kuwafariji wengine. Baadaye, mnamo mwaka wa 36 W.K., alijipa ujasiri na kumkaribisha Sauli. Biblia inasema hivi: “Barnaba akamsaidia na kumpeleka kwa mitume.”

Kuanzia wakati huo, Barnaba na Sauli wakawa marafiki wa karibu. Sauli alihubiri kwa bidii sana huko Yerusalemu hivi kwamba Wayahudi walitaka kumuua. Kwa hiyo, akina ndugu huko Yerusalemu wakampeleka Tarso, mahali alipozaliwa. Miaka tisa baadaye, Barnaba alitumwa kwenda Antiokia ya Siria ili kuwatia moyo waamini wapya. Biblia inasema kwamba Barnaba “alikuwa mtu mwema aliyejaa roho takatifu na imani.” Watu wengi walipendezwa na habari njema huko Antiokia hivi kwamba Barnaba alihitaji msaada ili kuwafundisha. Kwa hiyo, alienda Tarso kumtafuta Sauli rafiki yake. Wanaume hao wawili walikuwa wahubiri wenye bidii sana. Pia walifanya mpango wa kukusanya michango ya kuwasaidia Wakristo waliokuwa na uhitaji.

Sauli, ambaye baada ya muda alianza kuitwa Paulo, alifunga safari ya umishonari pamoja na Barnaba. Ujasiri wao ulijaribiwa tena na tena. Wakiwa Ikoniamu, Wayahudi waliowapinga walitaka kuwaua kwa kuwapiga mawe. Kwa hekima wamishonari hao wakaondoka na kwenda Listra. Walipofika huko mwanzoni watu walifikiri wao ni miungu! Hata hivyo, wapinzani wakaja kutoka Antiokia ya Pisidia na Ikoniamu na kubadili maoni yao. Kwa hiyo, watu wa Listra wakaanza kumpiga Paulo kwa mawe na wakamwacha nje ya jiji wakifikiri kwamba amekufa. Wakristo wa Listra walipomkaribia, Paulo akasimama na kutembea kurudi jijini. Wazia jinsi Barnaba alivyofurahi kumwona Paulo akiwa hai!  Wakaondoka Listra wakiwa salama. Halafu, baada ya muda fulani walirudi katika jiji hilo ili kuwafariji Wakristo huko. Huo ulikuwa ujasiri ulioje!

Barnaba na Paulo walikabili hatari nyingi pamoja, na pia walifurahia mambo mengi yenye kusisimua. Lakini pindi moja, jambo fulani lilitokea ambalo lilifanya wabishane vikali. Katika safari yao iliyofuata, Barnaba alitaka Marko binamu yake andamane nao. Paulo hakukubali, kwa sababu kabla ya hapo Marko alikuwa amewaacha walipokuwa wakihubiri. Kila mmoja wao alisisitiza maoni yake yafuatwe. “Wakagombana kwa ukali,” kisha wakaachana.

Barnaba alihitaji kuwa jasiri ili kukabiliana na jaribu hilo jipya. Tunapokosana na Mkristo mwenzetu, ni rahisi kufunga kinyongo, kumsema vibaya, au hata kuacha kushirikiana na kutaniko. Mtu anahitaji ujasiri mwingi ili kusamehe na hivyo kudumisha amani kati yake na Mungu na pamoja na Wakristo wenzake.

Inapendeza kwamba Barnaba na Paulo hawakuruhusu kutolewana kwao kuwazuie kumtumikia Yehova. Barnaba na Marko walisafiri kwenda Kipro, ambako waliendelea na kazi yao ya kufanya wanafunzi. Paulo aliendelea na safari yake akiwa pamoja na Sila na wakatimiza mambo mengi makubwa katika jina la Yehova.

Je, wanaume hao wawili walifungiana kinyongo? Hapana. Kwa nini tunasema hivyo? Baadaye Paulo alisema mambo mazuri kumhusu Barnaba katika barua zake zilizoongozwa na roho. Kwa mfano, katika barua moja, Paulo alisema kwamba Barnaba pia alikuwa amefanya kazi kwa bidii kupata pesa ili kutegemeza huduma yake, kama Paulo alivyofanya. (1 Kor. 9:6) Katika barua nyingine, alizungumza vizuri kumhusu Marko “binamu ya Barnaba.” (Kol. 4:​10, 11) Ingawa Paulo na Barnaba hawakwenda tena safari za kuhubiri wakiwa pamoja, waliendelea kuwa marafiki wa karibu. Bila shaka, Barnaba aliendelea kuwafariji watu kwa kuwahubiria habari njema kadiri alivyoweza, na hivyo kuishi kupatana na jina lake. Na aliposhirikiana na Marko, bila shaka alimzoeza sana kijana huyo. Tutazungumzia ujasiri wa Marko katika sura inayofuata.

Soma simulizi hili katika Biblia:

• Matendo 4:​34-37; 9:​23-31; 11:​19-30; 12:25–13:​5, 42-52; 14:​1-26; 15:​35-41

Jambo la kuzungumzia:

Barnaba alionyesha ujasiri katika njia zipi?

 Chimba Zaidi

1. 1. Walawi hawakupokea urithi wowote wa ardhi. Kwa hiyo, Barnaba aliyekuwa Mlawi alimilikije ardhi? (Hes. 18:20; Mdo. 4:​36, 37; w98 4/15 20 ¶4, maelezo ya chini)

   Jibu lako

2. 2. Kwa nini Barnaba aliitwa mtume? (Mdo. 14:14; it “Barnaba” ¶3)

   Jibu lako

3. 3. Wakiwa Kipro, Barnaba na Paulo walimhubiria mwanamume aliyeitwa Sergio Paulo. Je, Luka, mwandikaji wa kitabu cha Matendo, alikuwa sahihi kumrejelea Sergio Paulo kuwa “liwali”? (Mdo. 13:​7, 12; it “Kipro” ¶7) A

   Jibu lako

   Bank of Cyprus Cultural Foundation Collection

4. 4. Kwa nini si jambo la ajabu kwamba watu wa Listra walitaka kuwatolea dhabihu Barnaba na Paulo? (bt 97, sanduku)

   Jibu lako

 Tafakari Masomo Tunayojifunza

• Tunaweza kuiga ukarimu wa Barnaba katika njia zipi?

  Jibu lako

• Ingawa inaonekana kwamba mwanzoni Barnaba aliongoza wakati wa safari zao za umishonari, baadaye Paulo alikuja kuwa maarufu kuliko yeye. Hata hivyo, hakuna jambo linaloonyesha kwamba Barnaba alimwonea wivu. Tunaweza kuiga mfano wake katika hali zipi? B

  Jibu lako

• Unaweza kuiga ujasiri wa Barnaba katika njia zipi nyingine?

  Jibu lako

Tafakari Kumhusu Yehova na Kusudi Lake

• Simulizi hili linanifundisha nini kumhusu Yehova?

  Jibu lako

• Simulizi hili linahusianaje na kusudi la Mungu kwa wanadamu?

  Jibu lako

• Kwa nini unafurahi kwamba Barnaba alichaguliwa kutawala na Kristo mbinguni?

  Jibu lako