Ndugu na Dada Wapendwa:

Yesu alisema hivi katika ujumbe wake kwa kutaniko la Smirna: “Usiogope mateso yatakayokupata hivi karibuni.” (Ufu. 2:10) Maneno hayo ya Yesu yenye kutia moyo yalikusudiwa kwa ajili yetu pia ambao tunaishi katika “siku ya Bwana.” (Ufu. 1:10) Kwa kweli hizi ni “nyakati za hatari zilizo ngumu kushughulika nazo,” na tunaguswa moyo sana kuwaona watu wa Mungu ulimwenguni pote wakidumisha utimilifu wao wakati ambapo imani na ujasiri wao unajaribiwa!—2 Tim. 3:​1-5.

Hata hivyo, tutahakikishaje kwamba unaendelea kuwa imara, bila ‘kurudi nyuma’ kwa woga? (Ebr. 10:39) Huenda isiwe rahisi kuwa imara kwa kuwa pindi fulani tunaweza kupatwa na upinzani, au hata mateso. Lakini sikuzote uamuzi ni wetu. Tunaweza kuamua kumuunga mkono Yehova kwa ujasiri na kufanya yaliyo sawa machoni pake, hata ikiwa kiasili sisi ni wenye haya. Ni nini kinachoweza kutusaidia kufanya hivyo?

Neno la Mungu lililoongozwa na roho linaweza kukusaidia kuwa na ujasiri. Neno hilo limejaa mifano ya wanaume na wanawake waliokuwa na ujasiri. Kitabu hiki kimetayarishwa ili kutusaidia kuchunguza mifano yao kwa undani na kutafakari kuwahusu. Unapojifunza masimulizi hayo ya Biblia, sali na umwombe Yehova akusaidie kuona jinsi mifano yao inavyoweza kukusaidia kushughulikia matatizo unayokabili sasa au ambayo utakabili wakati ujao. Fikiria jinsi Yehova anavyoweza kukusaidia kuwa jasiri. Pia, chunguza jinsi ujasiri wa wanaume na wanawake hao unavyoweza kukupa ujasiri wa kufanya mambo yafuatayo:

Kukubali mabadiliko. (Yak. 3:17) Huenda Yonathani alifikiri angekuwa mfalme baada ya baba yake, lakini Yehova alikamtaa Sauli na kumchagua kijana Daudi. Yonathani alionyesha ushikamanifu na ujasiri kwa kuunga mkono uamuzi wa Yehova wa kumchagua Daudi.

Kutetea kanuni za uadilifu. (Ebr. 11:​32-34) Hanania, Mishaeli, na Azaria walikuwa tayari kufa katika tanuru linalowaka moto badala ya kukana imani yao kwa kuabudu sanamu.

Kutetea kweli. (Mt. 22:16) Fikiria kumhusu Sauli wa Tarso, ambaye alisema kweli kumhusu Yesu mbele ya watu walewale ambao walitarajia angewasaidia kuwatesa wafuasi wa Yesu.

 Tunasali kwamba chapisho hili litakusaidia uwe na imani na ujasiri hata zaidi. (Zab. 27:14) Yehova na akubariki unapowasaidia wengine katika familia yako na kutanikoni kuunga mkono Ufalme wa Mungu kwa ujasiri!