Mkaribie Mungu
“Tazama! Ninafanya Vitu Vyote Kuwa Vipya”
Je, unatamani kuwa na afya njema na kuishi muda mrefu wewe na familia yako? Je, unatamani kuishi kwenye ulimwengu usio na maumivu, mateso, na kifo? Jambo hilo linawezekana. Hivi karibuni kutakuwa na ulimwengu wenye uadilifu, kwa sababu Yehova Mungu ameahidi. Ona jinsi kusudi hilo litakavyotimia kama inavyoonyeshwa na andiko la Ufunuo 21:3-5.—Soma.
“[Mungu] atafuta kila chozi kutoka katika macho yao.” (Ufunuo 21:4) Mungu atafuta machozi ya aina gani? Si machozi ya furaha wala yale yanayosafisha macho yetu. Ahadi hiyo ya Mungu inazungumzia machozi yanayotokana na mateso na huzuni. Si kwamba Mungu atakausha tu machozi hayo bali atayafuta kabisa kwa kuondoa mambo yote yanayosababisha kilio, yaani, mateso na huzuni.
“Kifo hakitakuwapo tena.” (Ufunuo 21:4) Kifo ndicho chanzo kikuu cha machozi ya huzuni. Yehova atawakomboa wanadamu watiifu kutokana na utumwa wa kifo. Jinsi gani? Kwa kuondoa kisababishi kikuu cha kifo, yaani, dhambi tuliyorithi kutoka kwa Adamu. (Waroma 5:12) Yehova atawafanya wanadamu kuwa wakamilifu kwa msingi wa dhabihu ya fidia ya Yesu. * Kisha, adui wa mwisho, kifo, ‘ataangamizwa.’ (1 Wakorintho 15:26) Wanadamu waaminifu wataishi kama Mungu alivyokusudia, yaani, milele wakiwa na afya kamilifu.
“Wala maumivu hayatakuwapo tena.” (Ufunuo 21:4) Ni maumivu ya aina gani yatakayoondolewa? Maumivu yote ya kiakili, kihisia, na kimwili yanayosumbua mamilioni ya watu, ambayo yanatokana na dhambi na kutokamilika hayatakuwapo tena.
Hivi karibuni hakutakuwa tena na machozi, maumivu, wala kifo. Huenda ukauliza ‘Lakini itakuwa wapi?’ ‘Je, labda ahadi hiyo ya Mungu inahusu maisha ya mbinguni?’ Hapana. Fikiria sababu hizi. Kwanza, maneno yanayotangulia ahadi hiyo yanasema “hema la Mungu liko pamoja na wanadamu,” na wanadamu huishi duniani. (Ufunuo 21:3) Pili, ahadi hiyo inazungumzia ulimwengu ambao “kifo hakitakuwapo tena” yaani ulimwengu uliokuwa na kifo lakini hakipo tena. Mbinguni hakujawahi kuwa na kifo, lakini kimekuwapo kwa muda mrefu hapa duniani. Hivyo, ni wazi kwamba ahadi ya Mungu ya maisha bora itatimia hapa duniani..
Mungu atafuta machozi yote yanayosababishwa na mateso na huzuni
Yehova anataka tuamini ahadi yake ya kuleta ulimwengu wenye uadilifu. Baada tu ya kufafanua baraka zitakazokuja, anatuhakikishia hivi: “Tazama! Ninafanya vitu vyote kuwa vipya.” Kisha anaongezea hivi: “Maneno haya ni ya uaminifu na ya kweli.” (Ufunuo 21:5) Kwa nini usijifunze jinsi wewe na wapendwa wako mnavyoweza kuwa kati ya waabudu wenye furaha watakaoona ahadi ya Mungu ikitimia?
Usomaji wa Biblia unaopendekezwa mwezi wa Desemba
1 Petro 1-5; 2 Petro 1-3; 1 Yohana 1-5; 2 Yohana 1-13; 3 Yohana 1-14; Yuda 1-25–Ufunuo 1-22
^ fu. 5 Ili ujifunze mengi kuhusu dhabihu ya fidia ya Kristo, ona sura ya 5 ya kitabu Biblia Inafundisha Nini Hasa? kilichochapishwa na Mashahidi wa Yehova.
