Hamia kwenye habari

Hamia kwenye yaliyomo

Mungu Ni Nani?

Mungu Ni Nani?

 Jifunze Kutoka Katika Neno la Mungu

Mungu Ni Nani?

Makala hii ina maswali ambayo huenda umejiuliza na inakuonyesha mahali unapoweza kupata majibu katika Biblia yako. Mashahidi wa Yehova watafurahi kuzungumzia majibu hayo pamoja nawe.

1. Mungu ni nani?

Mungu wa kweli ndiye Muumba wa vitu vyote. Biblia inamwita “Mfalme wa umilele,” ikimaanisha kuwa hana mwanzo wala hatakuwa na mwisho. (Ufunuo 15:3) Kwa kuwa Mungu ndiye Chanzo cha uhai, tunapaswa kumwabudu yeye peke yake.—Soma Ufunuo 4:11.

2. Mungu ana sifa gani?

Hakuna mtu ambaye amewahi kumwona Mungu kwa kuwa yeye ni Roho, ikimaanisha kuwa uhai wake ni wa hali ya juu zaidi kuliko ule wa viumbe vinavyoishi hapa duniani. (Yohana 1:18; 4:24) Sifa za Mungu zinafunuliwa wazi katika vitu alivyoumba. Kwa mfano, tunapotafakari jinsi matunda na maua ya aina mbalimbali yalivyobuniwa, tunatambua upendo na hekima ya Mungu. Ukubwa wa ulimwengu wote mzima, unatuonyesha nguvu za Mungu.—Soma Waroma 1:20.

Tunaweza kujifunza mengi zaidi kuhusu sifa za Mungu katika Biblia. Kwa mfano, inatueleza mambo ambayo Mungu anapenda na anayochukia, jinsi anavyoshughulika na watu, na jinsi anavyotenda katika hali mbalimbali.—Soma Zaburi 103:7-10.

3. Je, Mungu ana jina?

Yesu alisema: “Baba yetu uliye mbinguni, jina lako na litakaswe.” (Mathayo 6:9) Ingawa Mungu ana majina mengi ya cheo, ana jina moja tu. Linatamkwa kwa njia tofauti katika kila lugha. Katika Kiswahili jina hilo linatamkwa “Yehova” au nyakati nyingine “Yahweh.”—Soma Zaburi 83:18.

Jina la Mungu limeondolewa katika Biblia nyingi na mahali pake kuwekwa majina ya cheo Bwana au Mungu. Lakini Biblia ilipoandikwa, jina la Mungu lilipatikana mara 7,000 hivi. Yesu alifanya jina la Mungu lijulikane kwa kulitumia alipokuwa akiwaeleza watu kuhusu Neno la Mungu. Aliwasaidia watu wamjue Mungu.—Soma Yohana 17:26.

 4. Je, Yehova anatujali?

Yehova anaonyesha kuwa anatujali kwa kusikiliza sala zetu yeye mwenyewe. (Zaburi 65:2) Je, mateso mengi tunayopata leo, yanamaanisha kuwa Mungu hatujali? Watu fulani wanadai kuwa Mungu huruhusu tuteseke ili atujaribu, lakini hilo si kweli. Biblia inasema: “Mungu hatendi kwa uovu.”—Ayubu 34:12; Soma Yakobo 1:13.

Mungu amempa mwanadamu uhuru wa kufanya maamuzi. Tunathamini sana uhuru tulio nao wa kuchagua kumtumikia Mungu, sivyo? (Yoshua 24:15) Kuteseka kumeongezeka kwa sababu watu wengi huchagua kuwatendea wengine mambo mabaya. Yehova anaumia moyoni anapoona ukosefu huo wa haki.—Soma Mwanzo 6:5, 6.

Karibuni, Yehova atamtumia Yesu kuondoa mateso na wale wanaoyasababisha. Wakati huu, Yehova ana sababu nzuri ya kuruhusu tuteseke kwa muda. Baadaye, makala moja katika mfululizo huu itaeleza sababu inayofanya Mungu aruhusu tuteseke.—Soma Isaya 11:4.

5. Mungu anataka tufanye nini?

Yehova alituumba tukiwa na uwezo wa kumjua na kumpenda. Anataka tujifunze ukweli kumhusu. (1 Timotheo 2:4) Ikiwa tutajifunza Biblia, tutaweza kumjua Mungu kuwa Rafiki.—Soma Methali 2:4, 5.

Kwa kuwa Yehova ametupa uhai, tunapaswa kumpenda zaidi ya mtu mwingine yeyote. Tunaweza kuonyesha kuwa tunampenda Mungu kwa kuongea naye kupitia sala na kwa kufanya yale anayotaka tufanye. (Methali 15:8) Yehova anataka tuwatendee wengine kwa upendo.—Soma Marko 12:29, 30; 1 Yohana 5:3.

Kwa habari zaidi, ona sura ya 1 ya kitabu hiki Biblia Inafundisha Nini Hasa? kilichochapishwa na Mashahidi wa Yehova.

[Picha katika ukurasa wa 17]

Je, kunaweza kuwa na sababu nzuri ya mateso kuruhusiwa kwa muda mfupi?