Hamia kwenye habari

Hamia kwenye yaliyomo

Je, Mashahidi wa Yehova Wanaponya Kimuujiza?

Je, Mashahidi wa Yehova Wanaponya Kimuujiza?

 Wasomaji Wetu Wanauliza . . .

Je, Mashahidi wa Yehova Wanaponya Kimuujiza?

▪ Mashahidi wa Yehova hawajawahi kuponya watu kimuujiza. Kama Yesu, wanaamini kwamba kazi yao kuu ni kuhubiri habari njema kuhusu Ufalme wa Mungu. Pia wanaamini kwamba Wakristo wa kweli wanatambuliwa si kwa kuponya kimuujiza, bali kwa jambo fulani ambalo ni muhimu zaidi.

Ni kweli kwamba uponyaji ambao Yesu Kristo alichochewa na huruma kuufanya katika karne ya kwanza, ni muhimu sana kwetu. Kwa kufanya hivyo, alitoa uhakikisho kamili kuwa chini ya utawala wake akiwa Mfalme wa Ufalme wa Mungu, “hakuna mkaaji atakayesema: ‘Mimi ni mgonjwa.’”—Isaya 33:24.

Namna gani leo? Watu wa dini zinazodai kuwa za Kikristo na dini nyinginezo, wamedai kwamba wanaweza kuwaponya watu kimuujiza. Hata hivyo, Yesu alitoa onyo kali kuhusu watu ambao wangedai kuwa ‘wamefanya miujiza mingi’ katika jina lake. Angewaambia: “Sikuwajua nyinyi kamwe; ondokeni mbele yangu, enyi watenda maovu.” (Mathayo 7:22, 23, Biblia Habari Njema) Kwa hiyo, je, kweli uponyaji wa kimuujiza unaodaiwa kufanywa leo unathibitisha kwamba mtu amekubaliwa au kubarikiwa na Mungu?

Ona vile Biblia inavyosema kuhusu uponyaji uliofanywa na Yesu. Tunapolinganisha jinsi Yesu alivyoponya na jinsi waponyaji wa siku hizi wanavyofanya, tunaweza kuamua urahisi kama uponyaji wa siku hizi unatoka kwa Mungu.

Yesu hakutumia uwezo wa kuponya kama njia ya kupata wafuasi au kuvuta umati uje kumsikiliza. Kinyume cha hilo, aliponya watu fulani bila kujionyesha waziwazi. Mara nyingi aliwaambia wale aliowaponya wasimwambie mtu yeyote kuhusu muujiza huo.—Luka 5:13, 14.

Yesu hakuwaomba watu aliowaponya watoe pesa. (Mathayo 10:8) Pia, hakushindwa kumponya mtu yeyote. Wagonjwa wote waliokuja kwake waliponywa kabisa, na uponyaji huo haukutegemea imani ya mtu. (Luka 6:19; Yohana 5:5-9, 13) Yesu hata aliwafufua wafu!—Luka 7:11-17; 8:40-56; Yohana 11:38-44.

Ingawa Yesu alifanya miujiza hiyo ya kuponya, jambo lililokuwa muhimu katika huduma yake halikuwa kuwakusanya watu kwa kuwageuza imani kupitia matendo ya kimuujiza yenye kuchochea hisia. Badala yake, kazi yake muhimu ilikuwa kutangaza habari njema ya Ufalme wa Mungu. Yesu aliwatayarisha wafuasi wake kwa ajili ya kazi ya kufanya wanafunzi, nao wangewafundisha wengine kuhusu tumaini la kupata afya kamilifu chini ya Ufalme wa Mungu.—Mathayo 28:19, 20.

Ni kweli kwamba baadhi ya wafuasi wa Yesu wa karne ya kwanza walipewa zawadi za kipekee za kuponya, lakini zawadi hizo zingefikia mwisho. (1 Wakorintho 12:29, 30; 13:8, 13) Wakristo wa kweli leo wanatambuliwa, si kupitia kuponya kimuujiza, bali kupitia upendo wa kujidhabihu unaowaunganisha. (Yohana 13:35) Kuponya kimuujiza leo hakujatokeza familia ya Wakristo kutoka malezi na jamii tofauti-tofauti ambao wanaunganishwa pamoja na upendo.

Hata hivyo, kuna Wakristo ambao wanaunganishwa na kifungo cha upendo. Kifungo hicho kina nguvu sana hivi kwamba wanakataa kuumizana—au kumuumiza mtu mwingine—hata wakati wa vita vikali vya wanadamu. Ni nani hao? Mashahidi wa Yehova. Duniani kote, wanajulikana kwa kuonyesha upendo kama wa Kristo. Kuwaunganisha watu wa jamii, mataifa, utamaduni, na makabila mbalimbali ni muujiza wa aina fulani, na jambo hilo linawezekana kupitia tu roho takatifu ya Mungu. Unaalikwa uhudhurie mmoja kati ya mikutano yao na ujionee mwenyewe.

[Picha katika ukurasa wa 13]

Je, kweli wale wanaodai kuponya kimuujiza siku hizi (picha upande wa kulia) wanaungwa mkono na Mungu?