Hamia kwenye habari

Hamia kwenye yaliyomo

Je, Unaweza Kujua Maana ya Jina la Mungu?

Je, Unaweza Kujua Maana ya Jina la Mungu?

 Je, Unaweza Kujua Maana ya Jina la Mungu?

Ni heshima kubwa sana kuruhusiwa umsalimu na kuzungumza na mheshimiwa kwa kutumia jina lake. Wakuu wa serikali huitwa kwa majina ya cheo kama vile “Rais,” “Mtukufu,” au “Mheshimiwa.” Hivyo ikiwa mtu mwenye cheo cha juu angekuambia, “Tafadhali, tumia tu jina langu,” bila shaka ungeona hilo kuwa pendeleo.

MUNGU wa kweli anatuambia hivi katika Neno lake, Biblia: “Mimi ni Yehova. Hilo ni jina langu.” (Isaya 42:8) Ingawa ana majina mengi ya cheo kama vile, “Muumba,” “Mweza-Yote,” na “Bwana Mwenye Enzi Kuu,” yeye amewapa watumishi wake washikamanifu pendeleo la kumwita kwa jina lake la kibinafsi.

Kwa mfano, wakati mmoja nabii Musa alimsihi Mungu kwa kusema: “Nakuomba radhi, Yehova.” (Kutoka 4:10) Wakati wa kuwekwa wakfu kwa hekalu huko Yerusalemu, Mfalme Sulemani alianza sala yake kwa maneno: “Ee Yehova.” (1 Wafalme 8:22, 23) Naye nabii Isaya alipozungumza na Mungu kwa niaba ya Waisraeli, alisema hivi: “Wewe, Ee Yehova, ni Baba yetu.” (Isaya 63:16) Ni wazi kwamba Baba yetu wa mbinguni anataka tumwite kwa jina lake.

Ingawa ni muhimu kulitaja jina la Yehova, kufahamu maana ya jina hilo kunahusisha mengi zaidi. Yehova anaahidi hivi kuhusu mtu anayempenda na kumtegemea: “Nitamlinda kwa sababu amelijua jina langu.” (Zaburi 91:14) Kwa kweli, kulifahamu jina la Mungu kunahusisha mambo mengi zaidi, kwa kuwa hiyo ndiyo hatua muhimu ya kupata ulinzi wa Mungu. Hivyo basi, unahitaji kufanya nini ili ujue maana ya jina la Mungu?