Hamia kwenye habari

Hamia kwenye yaliyomo

Kutembelea Kiwanda cha Pekee cha Uchapishaji

Kutembelea Kiwanda cha Pekee cha Uchapishaji

 Kutembelea Kiwanda cha Pekee cha Uchapishaji

HUENDA umeona magazeti mengi ya Mnara wa Mlinzi na Amkeni! Labda Mashahidi wa Yehova wamekutembelea nyumbani kwako na kukuachia magazeti hayo ili yakusaidie kuielewa Biblia vizuri zaidi. Au huenda umewaona Mashahidi barabarani au katika soko la kwenu wakiwaachia watu magazeti hayo ambayo yanategemea Biblia. Kwa kweli, nakala zaidi ya milioni 35 za gazeti la Mnara wa Mlinzi zinachapishwa kila mwezi, na hivyo kulifanya kuwa gazeti la kidini ambalo linasambazwa kwa wingi zaidi ulimwenguni.

Hata hivyo, je, umewahi kujiuliza magazeti hayo yote yanachapishiwa wapi na jinsi gani? Ili kujibu swali hilo, acheni tuchunguze moja ya viwanda vingi ambavyo Mashahidi wa Yehova wanatumia katika nchi nyingi. Kiwanda hicho kiko huko Wallkill, New York, Marekani. Si rahisi kwa wasomaji wetu wengi kusafiri ili kutembelea kiwanda hicho cha uchapishaji ambacho kinaendeshwa na Mashahidi wa Yehova huko Marekani, kwa hiyo, picha na masimulizi haya yatakusaidia kujifunza mengi kuhusu kiwanda hicho.

Bila shaka, ni lazima vichapo viandikwe kwanza kabla ya kuchapishwa. Idara ya Kupanga Maandishi na Picha inapokea habari za kuchapisha kupitia kompyuta kutoka kwenye Idara ya Uandikaji huko Brooklyn, New York. Habari hizo zinazotumwa kupitia kompyuta zinawekwa kwenye mabamba ya kuchapishia. Huko Wallkill, kila mwezi mabumba ya mviringo 1,400 ya karatasi yanaletwa kiwandani. Kiwanda hicho kinatumia tani 80 hadi 100 za karatasi kila siku. Mabumba hayo ya mviringo—mengine yakiwa na uzito wa kilo 1,360 hivi yanaingizwa katika mashini tano kubwa sana za kuchapisha, ambazo zina mabamba ya kuchapishia. Karatasi zinachapishwa, zinakatwa, na kukunjwa katika visehemu vya kurasa 32. Gazeti hili unalosoma ni moja kati ya visehemu hivyo. Namna gani vitabu? Katika sehemu ya kutia vitabu jalada, visehemu hivyo vinaunganishwa pamoja na kuwa vitabu. Kuna sehemu mbili za kutia vitabu jalada, na kila sehemu inaweza kutengeneza vitabu 50,000 vyenye majalada magumu au vitabu 75,000 vyenye majalada mepesi kwa siku moja. Sehemu ya pili ya kutia vitabu jalada inaweza kutengeneza vitabu karibu 100,000 vyenye majalada mepesi kwa siku.

Katika mwaka wa 2008, kiwanda hicho kilichapisha vitabu zaidi ya 28,000,000, kutia ndani Biblia zaidi ya milioni 2.6. Katika kipindi hichohicho, magazeti 243,317,564 yalichapishwa. Kiwanda hicho kina akiba ya vichapo vinavyotegemea Biblia katika lugha 380 hivi. Baada ya vichapo kuchapishwa, ni hatua gani inayofuata?

Kiwanda hicho kinapokea maombi ya vichapo kutoka kwenye makutaniko 12,754 ya Mashahidi wa Yehova huko Marekani na makutaniko 1,369 ya Karibea na Hawaii. Idara ya Upakizi na  Usafirishaji inapakia vichapo hivyo vyote vinavyoombwa na makutaniko na kufanya mipango ya kuvisafirisha katika maeneo yanayofaa. Kila mwaka, vichapo vyenye uzito wa kilo milioni 14 vinasafirishwa kwenye makutaniko nchini Marekani.

Sehemu muhimu zaidi ya kiwanda hicho ni watu wala si mashini. Watu zaidi ya 300 wanafanya kazi katika idara za uchapishaji, yaani, Idara ya Kupanga Maandishi na Picha, Kuratibu, Chumba cha Mashini za Kuchapisha, Sehemu ya Kutia Majalada, na Idara ya Upakizi na Usafirishaji. Wafanyakazi hao wote wanaofanya kazi ya kujitolea bila kulipwa mshahara wana umri wa kati ya miaka 19 na 92.

Wanapendezwa sana na watu ambao watapokea vichapo hivyo kwa hamu na kufundishwa, kuchochewa, na kuongozwa na kanuni za Biblia ambazo zinazungumziwa katika vichapo hivyo. Tunatumaini kwamba wewe ni mmoja wa wasomaji hao na kwamba vichapo vinavyochapishwa katika kiwanda hiki vinakusaidia kuendelea kupata ujuzi juu ya Yehova Mungu na Yesu Kristo ambao unaongoza kwenye uzima wa milele.—Yohana 17:3.

[Picha katika ukurasa wa 16]

 [Picha katika ukurasa wa 17]