Hamia kwenye habari

Hamia kwenye yaliyomo

Kwa Wasomaji Wetu

Kwa Wasomaji Wetu

 Kwa Wasomaji Wetu

TUNAFURAHI kuwajulisha kwamba gazeti la Mnara wa Mlinzi litakuwa na mpangilio mpya, kuanzia toleo hili. Acheni tueleze kwanza mambo ambayo hayatabadilika kisha tutaeleza mambo ambayo ni mapya.

Jina la gazeti hili, Mnara wa Mlinzi Unaotangaza Ufalme wa Yehova, halijabadilika. Kwa hiyo, gazeti la Mnara wa Mlinzi litaendelea kumheshimu Yehova akiwa Mungu wa kweli na kuwafariji wasomaji kupitia habari njema ya Ufalme wake. Habari zilizo katika ukurasa wa 5 mpaka 9 wa toleo hili zinazungumzia Ufalme ni nini na utakuja wakati gani. Kwa kuongezea, gazeti la Mnara wa Mlinzi litaendelea kuwasaidia watu wawe na imani katika Yesu Kristo, kutetea kweli ya Biblia, na kueleza maana ya matukio ya ulimwengu kupatana na unabii wa Biblia, kama vile ambavyo limekuwa likifanya kwa zaidi ya miaka 100.

Kutakuwa na mabadiliko gani? Acheni tueleze mambo fulani mapya ambayo yatakuwa katika toleo la tarehe moja kila mwezi. *

Habari fulani zenye kuchochea fikira zitachapishwa kila mwezi. Makala yenye kichwa “Je, Wajua?” itazungumzia habari fulani zenye kupendeza kuhusu maana ya masimulizi fulani ya Biblia. Makala yenye kichwa “Mkaribie Mungu” itakazia mambo ambayo tunajifunza kumhusu Yehova kutokana na maandiko fulani ya Biblia. Makala yenye kichwa “Wasomaji Wetu Wanauliza” itajibu maswali ya Biblia ambayo kwa kawaida watu wanauliza. Kwa mfano, watu wengi wanauliza, “Je, Ufalme wa Mungu umo moyoni mwako?” Utapata jibu kwenye ukurasa wa 13.

Makala fulani za kawaida zimekusudiwa kusaidia familia. Makala yenye kichwa “Siri ya Kupata Furaha Katika Familia,” ambayo itachapishwa mara nne kwa mwaka, itazungumzia matatizo mbalimbali yanayokumba familia na itaonyesha jinsi kanuni za Biblia zinavyoweza kusaidia kusuluhisha matatizo hayo. Wazazi wanapaswa kuwasomea watoto wao makala yenye kichwa “Wafundishe Watoto Wako” ambayo itachapishwa baada ya kila mwezi mmoja. Makala yenye kichwa “Kwa Ajili ya Vijana Wetu,” ambayo itakuwa na miradi ya kujifunza Biblia, itachapishwa miezi mingine kwa ajili ya vijana.

Makala nyingine za ziada zitachapishwa mara nne kwa mwaka. Habari yenye kichwa “Igeni Imani Yao” itatutia moyo tufuate mifano ya watu wanaotajwa katika Biblia. Kwa mfano, kwenye ukurasa wa 18 mpaka 21 wa toleo hili, utasoma simulizi lenye kugusa moyo kumhusu nabii Eliya na utajifunza jinsi tunavyoweza kuiga imani yake. Sehemu yenye kichwa “Barua Kutoka kwa . . . ” itakuwa na masimulizi kutoka kwa wamishonari na watu wengine katika sehemu mbalimbali za ulimwengu. Habari yenye kichwa “Tunayojifunza Kutoka kwa Yesu” itazungumzia mafundisho ya msingi ya Biblia kwa njia rahisi.

Tuna hakika kwamba gazeti la Mnara wa Mlinzi litaendelea kuwavutia wasomaji ambao wanaiheshimu Biblia na wanataka kikweli kujua mafundisho ya kitabu hicho. Tunatumaini kwamba gazeti hili litakusaidia kutosheleza kiu yako ya kujua kweli za Biblia.

WACHAPISHAJI

[Maelezo ya Chini]

^ fu. 4 Sasa gazeti la Mnara wa Mlinzi litachapishwa katika matoleo mawili. Toleo la tarehe moja litakuwa la watu wote. Toleo la tarehe 15 litakuwa toleo la funzo ambalo Mashahidi wa Yehova watatumia katika mikutano yao ya kutaniko, na watu wote wanakaribishwa kuhudhuria mikutano hiyo.