Hamia kwenye habari

Hamia kwenye yaliyomo

Je, Roho ya Krismasi Inaonyeshwa Mwaka Mzima?

Je, Roho ya Krismasi Inaonyeshwa Mwaka Mzima?

 Je, Roho ya Krismasi Inaonyeshwa Mwaka Mzima?

“Utukufu katika vilele vilivyo juu kwa Mungu, na juu ya dunia amani kati ya watu wa nia njema.”—Luka 2:14.

MAMILIONI ya watu wanajua maneno hayo yaliyosemwa na malaika wa Mungu walipowatangazia wachungaji kuzaliwa kwa Yesu. Wachungaji hao walikuwa wakichunga makundi yao usiku. Karibu tarehe ambayo makanisa yanadai kwamba Yesu alizaliwa, watu wengi wanaodai kuwa Wakristo wanajitahidi sana kuwa na tabia nzuri. Wakati huo, wanajitahidi kuonyesha sifa ambazo zilitangazwa na malaika hao, yaani, shangwe, amani, na nia njema. Jitihada hizo zinaitwa roho ya Krismasi.

Sifa hizo nzuri hata zinawavutia watu ambao hawasherehekei Krismasi kwa sababu za kidini. Wao pia wanathamini uchangamfu ambao unaletwa na sherehe hiyo. Katika sehemu nyingine, watu wanapewa ruhusa ya kupumzika kutoka shuleni au kazini, na wanatumia nafasi hiyo kustarehe, kuwa pamoja na familia na marafiki, au kujifurahisha. Bila shaka, watu wengi wanyoofu wanaona Krismasi kuwa wakati hasa ya kumheshimu Yesu Kristo.

Haidhuru watu wana maoni gani kuhusu umaana wa Krismasi, watu wengi wanakubali kwamba sifa nzuri zinazochochewa na sherehe hiyo mara nyingi hazidumu. Watu wanarudia haraka tabia zao za kawaida. Habari yenye kichwa “Roho ya Krismasi,” iliyochapishwa na Royal Bank ya Kanada, ilisema hivi: “Watu wengi wanaodai kuwa Wakristo wanajaribu kuonyesha sifa za Kikristo kwa majuma machache tu kila mwaka. Wanaonyesha sana nia njema kuelekea wanadamu wenzao kuanzia wakati wa Krismasi mpaka wakati wa sherehe ya Mwaka Mpya, kisha wanarudia maisha yao ya uchoyo na ya kutowajali wanadamu wenzao.” Habari hiyo iliendelea kusema kwamba “kasoro kubwa” ya roho ya Krismasi ni kuwa watu hawaionyeshi “mwaka mzima.”

Iwe unakubaliana au hukubaliani na maelezo hayo, bado yanatokeza maswali muhimu. Je, watu wataweza kuonyesha ukarimu na kuwajali wanadamu wenzao sikuzote? Je, kuna tumaini hakika kwamba tangazo lililotolewa na malaika usiku ambao Yesu alizaliwa litatimia? Au je, tumaini la amani ya kweli ni ndoto tu?