Hamia kwenye habari

Hamia kwenye yaliyomo

Unaweza Kuyapata Wapi Mafundisho ya Kweli?

Unaweza Kuyapata Wapi Mafundisho ya Kweli?

 Unaweza Kuyapata Wapi Mafundisho ya Kweli?

MTU fulani huko Tibet anazungusha gurudumu la sala, yaani, chombo cha mviringo kilicho na sala zilizoandikwa. Anaamini kwamba sala zake zinarudiwa kila anapozungusha gurudumu hilo. Katika nyumba moja yenye nafasi kubwa huko India, chumba kimoja kidogo kimetengwa kwa ajili ya puja, yaani, ibada ambayo huenda ikahusisha kuitolea miungu mbalimbali ya kiume na ya kike uvumba, maua, na vitu vingine. Katika kanisa moja lililopambwa sana huko Italia, nchi iliyo mbali na India, mwanamke mmoja anasali kwa kutumia rozari huku akiwa amepiga magoti mbele ya sanamu ya Maria, mama ya Yesu.

Labda umejionea uvutano wa dini juu ya maisha ya watu. Kitabu The World’s Religions—Understanding the Living Faiths kinasema: “Dini . . . imekuwa muhimu na inaendelea kuwa muhimu katika jamii nyingi ulimwenguni.” Katika kitabu, God—A Brief History, mwandishi John Bowker anasema: “Sikuzote imani katika Mungu imekuwa muhimu katika jamii zote za kibinadamu. Kwa kawaida Mungu huonwa kuwa Muumba mwenye kuudhibiti ulimwengu wote. Imekuwa hivyo hata katika jamii zisizoamini kwamba kuna Mungu.”

Naam, dini imekuwa na uvutano juu ya mamilioni ya watu. Je, huo si uthibitisho wenye nguvu kwamba mwanadamu anatamani na anahitaji mambo ya kiroho? Katika kitabu chake, The Undiscovered Self, Dakt. Carl G. Jung mtaalamu mashuhuri wa mambo ya akili anaeleza kuhusu uhitaji wa mwanadamu wa kuabudu kitu au mtu mwenye uwezo mkubwa zaidi na anasema kwamba “uhitaji huo umekuwepo katika historia yote ya mwanadamu.”

 Hata hivyo, watu wengi hawamwamini Mungu wala hawapendezwi na dini. Wengine wanaotilia shaka au kukataa kwamba kuna Mungu, hufanya hivyo hasa kwa sababu dini wanazojua zimeshindwa kutosheleza uhitaji wao wa kiroho. Lakini karibu kila mtu, kutia ndani wale wanaoamini kwamba hakuna Mungu, huonyesha kwa njia fulani kwamba wanashikilia kanuni wanazoamini, nazo zinakuwa kama dini kwao.

Kwa maelfu ya miaka iliyopita, wanadamu wamejaribu ibada za aina nyingi katika jitihada zao za kutosheleza uhitaji wao wa kiroho. Kwa sababu hiyo, kuna imani mbalimbali za kidini ulimwenguni pote. Kwa mfano, ingawa karibu dini zote zinaamini kwamba kuna kitu au mtu mwenye uwezo mkubwa zaidi, dini hizo zina maoni mbalimbali kuhusu utambulisho wa kitu hicho au mtu huyo. Dini nyingi pia hukazia umuhimu wa wokovu au ukombozi. Lakini mafundisho ya dini hizo hutofautiana kuhusu wokovu na jinsi ya kuupata. Kwa kuwa kuna imani nyingi sana, tunaweza kuyatambuaje mafundisho ya kweli yanayompendeza Mungu?