666—Si Fumbo Tu

“Mtu yeyote asiweze kununua au kuuza isipokuwa mtu aliye na ile alama, jina la yule mnyama-mwitu au namba ya jina lake. Hapa ndipo hekima inapohitajiwa: Yeye aliye na akili na apige hesabu ya namba ya yule mnyama-mwitu, kwa maana ni namba ya mwanadamu; na namba yake ni 666.”—Ufunuo 13:17, 18.

NI HABARI chache za Biblia ambazo zimewavutia watu na kuwahangaisha kama ule unabii kuhusu alama au jina la fumbo la “yule mnyama-mwitu,” yaani, namba 666. Maana ya alama ya mnyama huyo imeendelea kukisiwa-kisiwa katika televisheni na Internet, na pia katika sinema, vitabu, na magazeti.

Watu fulani wanaamini kwamba namba 666 ni alama ya mpinga-Kristo anayetajwa katika Biblia. Wengine husema kwamba namba hiyo inamaanisha kutiwa alama ya aina fulani kwa nguvu, kama vile chanjo au kuwekwa mwilini kifaa fulani kidogo cha umeme chenye maandishi ya siri ambayo humtambulisha mtu kuwa mtumishi wa mnyama huyo. Nao wengine huamini kwamba namba 666 inawatambulisha mapapa wa dini ya Katoliki. Kwa kutumia herufi za hesabu za Kiroma badala ya herufi zinazotumiwa kuandika jina rasmi la papa, Vicarius Filii Dei, (Mwakilishi wa Mwana wa Mungu), kisha kuzibadili kidogo, wao hupata namba 666. Pia inadaiwa kwamba kwa kutumia jina la Kilatini la Maliki Mroma, Diocletian, na jina la Kaisari Nero katika Kiebrania, mtu anaweza kupiga hesabu na kupata namba hiyo. *

Hata hivyo, fasiri hizo za kuwazia-wazia, ni tofauti sana na yale ambayo Biblia yenyewe husema kuhusu alama ya mnyama huyo, kama tutakavyoona katika makala inayofuata. Biblia huonyesha kwamba wale walio na alama hiyo watapatwa na ghadhabu ya Mungu wakati atakapokomesha mfumo huu wa mambo. (Ufunuo 14:9-11; 19:20) Kwa hiyo, kuelewa namba 666, kunamaanisha mengi zaidi kuliko tu kufumbua fumbo lenye kutatanisha. Inafurahisha kwamba Yehova Mungu, ambaye ndiye kielelezo bora zaidi cha upendo na Chanzo cha nuru ya kiroho, amewafunulia watumishi wake jambo hilo la maana.—2 Timotheo 3:16; 1 Yohana 1:5; 4:8.

[Maelezo ya Chini]