Hamia kwenye habari

Hamia kwenye yaliyomo

Ni Nani Waliokuwa Watu wa Familia ya Yesu?

Ni Nani Waliokuwa Watu wa Familia ya Yesu?

 Ni Nani Waliokuwa Watu wa Familia ya Yesu?

KATIKA sehemu nyingi za ulimwengu, mara nyingi katika mwezi wa Desemba utaona mandhari ya mtoto Yesu akiwa chini ya utunzaji wenye wororo wa mama yake, Maria, na baba yake mlezi, Yosefu. Mandhari za familia hiyo zinaweza kuvutia hata watu ambao hawadai kuwa Wakristo. Kwa kuwa mandhari hizo hukazia hasa Yesu, Maandiko hutuambia nini kuhusu watu wa familia yake?

Yesu alikuwa na malezi yasiyokuwa ya kawaida kabisa. Alizaliwa na bikira aliyeitwa Maria na hivyo akawa mshiriki wa familia ya kibinadamu. Kulingana na Biblia, uhai wake ulihamishwa kutoka mbinguni hadi katika tumbo la uzazi la Maria kupitia roho takatifu. (Luka 1:30-35) Kabla ya mimba ya Yesu iliyotukia kimuujiza kutangazwa, Maria alikuwa amechumbiwa na mwanamume aliyeitwa Yosefu, ambaye mwishowe alikuwa baba mlezi wa Yesu.

Baada ya Yesu kuzaliwa, Yosefu na Maria walipata watoto wengine, ambao walikuwa ndugu na dada wa kambo wa Yesu. Hilo linaonyeshwa wazi na swali ambalo wakaaji wa Nazareti waliuliza baadaye kumhusu Yesu: “Je, huyu si mwana wa yule seremala? Je, mama yake haitwi Maria, na ndugu zake Yakobo na Yosefu na Simoni na Yuda? Na dada zake, je, wote hawako pamoja nasi?” (Mathayo 1:25; 13:55, 56; Marko 6:3) Kutokana na hilo, tunaweza kufikia mkataa kwamba watu wa familia ya karibu ya Yesu walikuwa wazazi wake, ndugu zake wanne, na angalau dada wawili.

Hata hivyo, leo watu fulani hawaamini kwamba ndugu na dada za Yesu walikuwa watoto wa Yosefu na Maria. Kwa nini? Kichapo, New Catholic Encyclopedia, kinasema, “Tangu zamani, Kanisa limefundisha kwamba Maria alikuwa bikira sikuzote. Kwa hiyo basi, hakuna shaka yoyote kwamba Maria hakuwa na watoto wengine.” Kitabu hicho cha kitaalamu kinadai kwamba maneno “ndugu” na “dada” yanaweza kumaanisha “mtu au watu waliounganishwa na dini au uhusiano wa aina nyingine” au kumaanisha watu wa ukoo, labda binamu.

Je, hivyo ndivyo ilivyo? Hata wanatheolojia fulani Wakatoliki wasiokubaliana na fundisho hilo la zamani, huunga mkono maoni ya kwamba Yesu alikuwa na ndugu na dada za kimwili. John P. Meier, aliyekuwa msimamizi wa shirika liitwalo Catholic Bible Association of America, aliandika hivi: ‘Katika Agano Jipya neno adelphos [ndugu] humaanisha tu ndugu au ndugu wa kambo linapotumiwa kwa njia halisi kuonyesha uhusiano fulani wa kimwili au wa kisheria.’ * Naam, Maandiko yanaonyesha kwamba Yesu alikuwa na ndugu na dada waliozaliwa na Yosefu na Maria.

Vitabu vya Injili hutaja watu wengine wa ukoo wa Yesu, lakini sasa acheni tuwakazie fikira watu wa familia ya karibu ya Yesu na kuona mambo tunayoweza kujifunza kutoka kwao.

[Maelezo ya Chini]

^ fu. 6 Makala “Maoni ya Dini Mbalimbali Kuhusu Ndugu na Dada za Yesu,” ya J. P. Meier, The Catholic Biblical Quarterly, Januari 1992, ukurasa wa 21.