Hamia kwenye habari

Hamia kwenye yaliyomo

Kabla na Baadaye—Alipata Nguvu za Kubadilika

Kabla na Baadaye—Alipata Nguvu za Kubadilika

 “Mkaribieni Mungu, Naye Atawakaribia”

Kabla na Baadaye—Alipata Nguvu za Kubadilika

SANDRA, mwanamke mmoja huko Mexico alisema kwamba alikuwa mtu asiyefaa katika familia yao. Alikataliwa na kuchukiwa, jambo ambalo liliathiri maisha yake ya ujanani. Anasema: “Nilipokuwa kijana, daima nilihisi kwamba sina thamani yoyote na nilikuwa na shaka nyingi kuhusu maisha yangu na maisha kwa ujumla.”

Akiwa katika shule ya sekondari, Sandra alianza kunywa pombe ya baba yake iliyokuwa nyumbani. Muda si muda akaanza kujinunulia pombe na akawa mlevi. Anakiri hivi: “Sikuona kusudi la kuishi.” Kwa sababu ya kukata tamaa, Sandra alianza kutumia dawa za kulevya. Anasema: “Kitu ambacho kilikuwa kikinisaidia kusahau matatizo yangu ni kile nilichokuwa nikibeba kwenye mkoba wangu: pombe, dawa za kulevya, au bangi kidogo.”

Baada ya Sandra kumaliza masomo yake katika shule ya kitiba, alizama kabisa katika ulevi. Akajaribu kujiua lakini hakufaulu.

Sandra alitafuta msaada wa kiroho na wa kihisia moyo katika dini mbalimbali bila mafanikio. Baada ya kukosa tumaini na kuvunjika moyo, alimlilia Mungu tena na tena hivi: “Uko wapi? Mbona hunisaidii?” Sandra alikuwa anahisi kwamba hafai kabisa, wakati mmoja wa Mashahidi wa Yehova alipozungumza naye. Jambo hilo lilifanya aanze kujifunza Biblia. Sandra alitiwa moyo sana alipojifunza kwamba “BWANA yu karibu nao waliovunjika moyo.”—Zaburi 34:18.

Mwalimu wa Biblia wa Sandra alimsaidia kuelewa kwamba Yehova Mungu anajua kuwa sisi ni wadhaifu kwa sababu ya dhambi na kutokamilika tulikorithi kutoka kwa Adamu. Sandra alitambua kuwa Mungu anaelewa kwamba hatuwezi kutimiza kikamilifu viwango vyake vya uadilifu. (Zaburi 51:5; Waroma 3:23; 5:12, 18) Alifurahi kujua kwamba Yehova hakazii uangalifu wake juu ya udhaifu wetu, na hatazamii tufanye zaidi kuliko tunavyoweza. Mtunga-zaburi aliuliza: “BWANA, kama wewe ungehesabu maovu, Ee Bwana, nani angesimama?”—Zaburi 130:3.

Sandra alifurahi sana kujua kweli muhimu ya Biblia kuhusu dhabihu ya fidia ya Yesu Kristo. Kupitia dhabihu hiyo, Yehova kwa huruma huwahesabu wanadamu watiifu kuwa wanyofu ingawa wao si wakamilifu. (1 Yohana 2:2; 4:9, 10) Ndiyo, tunaweza kupata “msamaha wa makosa yetu,” na kupata msaada wa kushinda hali yoyote ya kuhisi kuwa hatufai kitu.—Waefeso 1:7.

Sandra alijifunza mambo muhimu kutokana na mfano wa mtume Paulo. Mtume huyo alithamini sana fadhili za Mungu za kumsamehe makosa aliyokuwa amefanya hapo awali na kumsaidia ashinde pigano gumu la kutorudia udhaifu wake. (Waroma 7:15-25; 1 Wakorintho 15:9, 10) Paulo alibadili njia yake ya maisha, ‘alipiga-piga mwili wake ngumi na kuuongoza kama mtumwa,’ ili abaki katika barabara inayokubaliwa na Mungu. (1 Wakorintho 9:27) Hakuruhusu  mwelekeo wake wenye dhambi umwongoze kama mtumwa.

Sandra alisumbuliwa na udhaifu wake, lakini aliendelea kupigana nao. Alisali kwa Yehova kwa bidii ili amsaidie kushinda udhaifu wake na kumwomba msamaha. (Zaburi 55:22; Yakobo 4:8) Sandra alipotambua kwamba Mungu anapendezwa naye, alibadili njia yake ya maisha. “Ninafurahia kuwafundisha wengine Biblia wakati wote,” anasema. Sandra alikuwa na pendeleo la kumsaidia dada yake mkubwa na dada yake mdogo kumjua Yehova. Anapoendelea ‘kufanya lililo jema,’ yeye hujitolea pia kutumia ustadi wake wa kitiba kwenye makusanyiko ya Mashahidi wa Yehova.—Wagalatia 6:10.

Namna gani mazoea machafu ya Sandra? Anasema hivi kwa uhakika: “Nina akili timamu. Sinywi pombe, sivuti sigara, wala situmii dawa za kulevya. Sivihitaji vitu hivyo tena. Nilipata kile nilichokuwa nikitafuta.”

[Blabu katika ukurasa wa 9]

“Nilipata nilichokuwa nikitafuta”

[Sanduku katika ukurasa wa 9]

Kanuni za Biblia Zinazofanya Kazi

Zifuatazo ni baadhi ya kanuni za Biblia ambazo zimewasaidia wengi kuacha mazoea machafu:

“Acheni tujisafishe wenyewe kila unajisi wa mwili na wa roho, tukikamilisha utakatifu katika hofu ya Mungu.” (2 Wakorintho 7:1) Mungu huwabariki wale ambao wamejisafisha wenyewe kila unajisi, wakijiepusha na mazoea machafu.

“Kumwogopa Yehova humaanisha kuchukia yaliyo mabaya.” (Mithali 8:13, NW) Woga unaofaa kumwelekea Mungu humsaidia mtu kuacha mazoea mabaya, kutia ndani matumizi ya dawa za kulevya. Mtu anayeacha mazoea hayo, anamfurahisha Yehova na anajilinda na magonjwa hatari.

‘Iweni katika ujitiisho na iweni watiifu kwa serikali na mamlaka zikiwa watawala.’ (Tito 3:1) Katika sehemu nyingi, kuwa na dawa za kulevya au kuzitumia ni kinyume cha sheria. Wakristo wa kweli hawaweki wala hawatumii dawa haramu.