Hamia kwenye habari

Hamia kwenye yaliyomo

Je, Kweli Tunawahitaji Wengine?

Je, Kweli Tunawahitaji Wengine?

 Je, Kweli Tunawahitaji Wengine?

“TUNAPOCHUNGUZA maisha na shughuli zetu, upesi tunatambua kwamba karibu matendo na tamaa zetu zote zinahusiana na wanadamu wengine,” akasema mwanasayansi maarufu Albert Einstein. Aliongeza hivi: ‘Tunakula chakula kilichozalishwa na wengine, tunavaa mavazi yaliyoshonwa na wengine, tunaishi katika nyumba zilizojengwa na wengine. Sifa za mtu na umuhimu wake hazitokani naye binafsi bali zatokana na kuwa mshiriki wa jamii kubwa ambayo huunda maisha yake kimwili na kiroho tangu kuzaliwa hadi kifo.’

Katika jamii ya wanyama, ni kawaida kuwaona wakishirikiana kisilika. Ndovu hutembea katika vikundi, wakiwalinda watoto wao kwa makini. Simba-jike hushirikiana kuwinda nao hula pamoja na simba-dume. Pomboo hucheza pamoja na hata wamewalinda wanyama wengine au waogeleaji walio taabani.

Hata hivyo, wanasayansi wa jamii wameona kwamba kati ya wanadamu kuna mwelekeo fulani unaozidi kuleta hali ya wasiwasi. Kulingana na gazeti fulani linalochapwa nchini Mexico, baadhi ya wanasayansi hao wanasema kwamba “watu wa Marekani wameathiriwa sana kwa sababu ya watu fulani kujitenga na wengine kwa muda mrefu, na pia kuharibika kwa maisha ya jamii.” Gazeti hilo linasema kwamba “hali nzuri ya taifa inategemea badiliko kubwa la kijamii ambalo linahusisha kurudia maisha ya kutegemeana.”

Tatizo hilo limeenea hasa kati ya watu wanaoishi katika nchi zilizoendelea. Watu wengi wanazidi kuwa na mwelekeo wa kujitenga. Wanataka ‘kujitegemea’ nao hawataki kabisa wengine ‘waingilie maisha yao.’ Imesemekana kwamba mtazamo huo umefanya iwe rahisi kwa wanadamu kupatwa na matatizo ya kihisia moyo, kushuka moyo, na kujiua.

Kuhusiana na hilo, Dakt. Daniel Goleman alisema: “Kujitenga na jamii, yaani, wazo la kwamba mtu hahitaji kuwa na mwingine wa kumweleza hisia zake za moyoni au kushirikiana naye kwa ukaribu, huongeza maradufu uwezekano wa kupatwa na ugonjwa au kifo.” Ripoti ambayo ilichapishwa katika gazeti la Science ilifikia mkataa kwamba kujitenga na jamii ‘kunaweza kusababisha kifo kama vile tu kuvuta sigara, msongo wa damu, kuwa na mafuta mengi mwilini, kuwa mnene kupita kiasi, na kukosa kufanya mazoezi ya kimwili.’

Basi, ni kweli kwamba kwa sababu mbalimbali, tunawahitaji wengine. Hatuwezi kujitegemea kabisa. Kwa hiyo, tatizo la kujitenga linaweza kutatuliwaje? Ni nini ambacho kimefanya maisha ya wengi yawe na maana halisi? Makala ifuatayo itajibu maswali kama hayo.

[Blabu katika ukurasa wa 3]

“Karibu matendo na tamaa zetu zote zinahusiana na wanadamu wengine.”—Albert Einstein