Hamia kwenye habari

Hamia kwenye yaliyomo

“Umekosea Nambari ya Simu”

“Umekosea Nambari ya Simu”

 Ripoti ya Watangazaji wa Ufalme

“Umekosea Nambari ya Simu”

HUKO Johannesburg, Afrika Kusini, Leslie na Caroline walitumia simu kwa zamu kuwatolea ushahidi watu waliostaafu wanaoishi pamoja katika kijiji ambacho si rahisi kuingia. Hawakupata watu wengi nyumbani na hata ujumbe wao wa Kikristo haukuvutia wengi. Hivyo Caroline alitiwa moyo wakati mwanamke mmoja alipojibu simu.

“Je, huyo ni Bi. B—?” Car-oline akauliza.

“La,” sauti ya kirafiki ikajibu, “mimi ni Bi. G—. Umekosea nambari ya simu.”

Aliposikia sauti hiyo yenye shauku, Caroline alisema: “Hebu nikueleze nilichotaka kumwambia Bi. B—.” Ndipo akamweleza kuhusu baraka za Ufalme wa Mungu unaokuja. Baada ya kufanya mipango ya kumpelekea broshua, Mungu Anataka Tufanye Nini?, Bi. G—aliuliza: “Hebu niambie, wewe ni wa dini gani?”

“Sisi ni Mashahidi wa Yehova,” Caroline akajibu.

“Ah, mimi sipendezwi na dini hiyo! Sidhani kama ninataka kukuona.”

“Lakini Bi. G—,” akasihi Caroline, “kwa dakika 20 zilizopita, nimezungumza nawe kuhusu tumaini zuri sana na nikakuonyesha katika Biblia mambo ambayo Ufalme wa Mungu utawafanyia wanadamu hivi karibuni. Ulifurahi sana kuyasikia—hata ulisisimuka—ukataka kujifunza zaidi. Unajua nini hasa kuhusu Mashahidi wa Yehova? Kama ungekuwa mgonjwa, je, ungeenda kwa fundi wa gari? Kwa nini usiniruhusu nikueleze yale ambayo Mashahidi wa Yehova huamini?”

Baada ya kukaa kimya kwa muda alijibu: “Ninaona umesema kweli. Ni heri uje. Lakini ninataka ujue kwamba hutaweza kamwe kugeuza imani yangu!”

“Bi G—, mimi siwezi kugeuza imani yako kamwe hata nikitaka,” Caroline akajibu. “Yehova tu ndiye anayeweza kufanya hivyo.”

Nilifanikiwa kumpelekea Bi. G—(Betty) broshua naye akakubali atembelewe tena. Caroline aliporudi, Betty alimwambia kwamba alikuwa amewaeleza wanawake anaoketi nao kwenye meza wakati wa chakula kwamba alikuwa akizungumza na Mashahidi wa Yehova. “Unawezaje kufanya hivyo?” wakauliza huku wakitupa mikono yao juu. “Watu hao hata hawamwamini Yesu!”

Caroline alimkumbusha Betty papo hapo jambo moja kuu walilokuwa wametaja walipozungumza kuhusu Ufalme wa Mungu.

“Nani atakayekuwa Mfalme?” Caroline akauliza.

“Yesu,” Betty akajibu.

“Bila shaka,” akasema Caroline. Kisha akamweleza kwamba Mashahidi wa Yehova wanaamini kwamba Yesu ni Mwana wa Mungu, lakini yeye si sawa na Mungu naye si sehemu ya Utatu.—Marko 13:32; Luka 22:42; Yohana 14:28.

Baada ya ziara nyingine kadhaa, Caroline alitambua kwamba Betty alikuwa mgonjwa ingawa alikuwa mwenye furaha na matumaini mema. Alikuwa na kansa na aliogopa kufa. “Laiti ningekuwa nimeyasikia mambo haya zamani na kuwa na imani kama yako,” Betty akasema. Caroline alimfariji kwa kumwonyesha maandiko yanayoeleza kifo kuwa usingizi mzito ambao mtu anaweza kuamka wakati wa ufufuo. (Yohana 11:11, 25) Maandiko hayo yalimtia moyo sana Betty, ambaye sasa anaendelea kujifunza Biblia kwa ukawaida. Angekuwa anahudhuria mikutano kwenye Jumba la Ufalme kama afya yake isingekuwa mbaya.

Caroline anasema: “Ni wazi kwamba malaika wanaongoza kazi hii. Nilimpata Betty ‘kwa kukosea nambari ya simu,’ na isitoshe, ana umri wa miaka 89!”—Ufunuo 14:6.