Hamia kwenye habari

Hamia kwenye yaliyomo

Kujenga Imani Kupitia Funzo la Biblia Nchini India

Kujenga Imani Kupitia Funzo la Biblia Nchini India

 Sisi Ni Namna Iliyo na Imani

Kujenga Imani Kupitia Funzo la Biblia Nchini India

TOKEA upande wa kaskazini kwenye Milima ya Himalaya, yenye fahari na yenye kufunikwa kwa theluji, hadi fuo zenye joto jingi za Bahari ya Hindi upande wa kusini, India ni nchi yenye hali tofauti-tofauti, kijiografia na kidini. Asilimia 83 hivi ya wakazi wake, ambao ni zaidi ya bilioni moja, ni Wahindu, asilimia 11 ni Waislamu, na wanaobaki hasa ni Wakristo kwa jina tu, Makalasinga, Wabuddha, na Wajaini. Wote wana uhuru wa ibada. “Dini ni muhimu katika maisha ya watu wa India,” chasema kichapo The World Book Encyclopedia.

Mashahidi wa Yehova, ambao ni zaidi ya 21,200 nchini India, huishi kulingana na imani yao ya Kikristo. Kama wenzao wa kiroho katika sehemu nyingine za ulimwengu, Mashahidi nchini India huliona kuwa pendeleo kuwasaidia majirani wao wajenge imani yenye nguvu katika Neno la Mungu, Biblia Takatifu. (2 Timotheo 3:16, 17) Ebu ona jinsi familia moja huko Chennai iliyoko kusini mwa India ilivyokuja kujua kweli ya Biblia.

Kabla ya kukutana na Mashahidi wa Yehova, familia hii ilikuwa inashiriki kwa bidii katika dini za roho za kanisa Katoliki, wakidai kuona maono, kusema kwa lugha, na kuponya wagonjwa. Walikuwa mashuhuri katika kanisa na katika jumuiya na hata watu waliwaita baadhi ya washiriki wa familia hiyo “swami,” linalomaanisha “bwana.” Ndipo siku moja Shahidi mmoja akaitembelea familia hiyo na kuwaonyesha katika Biblia kwamba Yesu ni Mwana wa Mungu, si Mungu Mweza Yote, kama watu wengi wanavyoamini. Shahidi huyo pia aliwaonyesha kwamba jina la Mungu ni Yehova na kwamba anakusudia kuifanya dunia iwe paradiso maridadi.—Zaburi 83:18; Luka 23:43; Yohana 3:16.

Kwa kuwa waliheshimu Neno la Mungu na kufurahia waliyosikia, washiriki wa familia hiyo walikubali kujifunza Biblia kwa ukawaida pamoja na Mashahidi wa Yehova. Jambo hili lilifanya wadhihakiwe na watu wa kanisa lao. Hata hivyo, familia hiyo iliazimia kuendelea kujifunza Biblia. Walipoendelea kupata ujuzi na imani yao kuzidi kupata nguvu, waliacha mazoea yao ya dini isiyo ya kweli. Leo, watatu katika familia hiyo ni Mashahidi wenye bidii waliobatizwa, na mama yao hutumikia akiwa painia msaidizi inapowezekana.

Imani ya Kushinda Ulemavu

Sunder Lal, mwanamume kijana anayeishi katika kijiji kilichoko Punjab, alihitaji imani nyingi na ujasiri ili kuhubiria wengine habari njema za Ufalme wa Mungu. (Mathayo 24:14) Sababu moja ni kwamba aliacha ibada ya miungu mingi iliyoabudiwa na familia yao na watu wa kijiji chao kusudi amwabudu Mungu wa kweli, Yehova. Sababu nyingine ni kwamba Sunder Lal hana miguu.

Kufikia mwaka wa 1992, kuna mambo ambayo Sunder Lal alikuwa anafanya kila siku. Alikuwa akifanya kazi ya msaidizi wa daktari kisha kujiunga na familia yake katika kuabudu miungu mbalimbali wakiongozwa na mwalimu wa kidini ambaye walimchagua. Ndipo usiku mmoja, akaanguka akivuka reli. Garimoshi lilimkanyaga na kukata miguu yake kwenye mapaja. Ingawa alinusurika, maisha yake hayakuwa na tumaini. Ni jambo linaloeleweka kwamba Sunder Lal alishuka moyo sana na hata akafikiria kujiua. Familia ilimsaidia, lakini hakuwa na tumaini lolote la wakati ujao.

 Ndipo mmoja wa Mashahidi wa Yehova akamtembelea Sunder Lal na kumwonyesha katika Biblia kwamba Mungu ameahidi kuifanya dunia iwe paradiso yenye kupendeza na kuwapa afya kamili wote wampendao na kumhofu. Sunder Lal alikubali funzo la Biblia, na kwa mwaka mmoja akajifunza kwa bidii. Alialikwa kuhudhuria mikutano ya Kikristo na hatimaye akakubali kuandamana na rafiki yake aliyembeba kwa baiskeli. Ingawa safari hiyo ilimwumiza, alithawabishwa sana. Alichokuwa amejifunza katika funzo la Biblia la kibinafsi kilithibitishwa alipokutana na wengine ambao waliamini kikweli ahadi za Neno la Mungu na kuishi kulingana na mafundisho ya Biblia.

Sunder Lal alianza kuhubiria majirani habari njema, na kubatizwa mwaka wa 1995. Mwanzoni, alishiriki katika huduma kijijini kwao kwa kujikokota kutoka mlango hadi mlango, hiyo ikiwa njia yake ya kawaida ya kutembea. Lakini sasa amepata zawadi kutoka kwa ndugu zake wa kiroho—baiskeli ya magurudumu matatu iliyotengenezwa hasa kuendeshwa kwa mikono. Kwa sababu ya baiskeli hiyo, sasa ana uhuru zaidi na anaweza kusafiri peke yake umbali wa kilometa 12 ili kuhudhuria mikutano. Wakati mwingine yeye huendesha baiskeli yake kukiwa na mvua kubwa na pepo za msimu; wakati mwingine hali ya joto inakuwa zaidi ya nyuzi 43 Selsiasi.

Mbali na kuhudhuria mikutano, Sunder Lal anajifunza Biblia pamoja na wengine ambao wanataka msaada wa kujenga imani yenye nguvu katika Mungu wa kweli, Yehova. Hata saba kati ya watu aliojifunza nao Biblia wamebatizwa sasa, na wengine watatu ambao aliwahubiria lakini wakajifunza Biblia na Mashahidi wenzake, wamebatizwa.

“Imani,” kulingana na Biblia, “si miliki ya watu wote.” (2 Wathesalonike 3:2) Lakini kwa wale ‘walio na mwelekeo ufaao kwa ajili ya uhai udumuo milele,’ funzo la Neno la Mungu la kawaida laweza kujenga imani yenye nguvu. (Matendo 13:48) Funzo kama hilo hutusisimua kwa tumaini la ajabu la wakati ujao—tumaini ambalo watu wanaozidi kuongezeka nchini India wanadhihirishia imani.

[Ramani katika ukurasa wa 30]

 

AFGHANISTAN

PAKISTAN

NEPAL

BHUTAN

CHINA

BANGLADESH

MYANMAR

LAOS

THAILAND

VIETNAM

KAMBODIA

SRI LANKA

INDIA

[Hisani]

Mountain High Maps® Copyright © 1997 Digital Wisdom, Inc.