Hamia kwenye habari

Hamia kwenye yaliyomo

Unaweza Kujua Wakati Ujao!

Unaweza Kujua Wakati Ujao!

 Unaweza Kujua Wakati Ujao!

Watu wengi hufikiria wakati ujao kwa makini sana. Wanapenda kupanga mambo, kuweka rasilimali zao kwa hekima, na kuhisi wakiwa salama. Lakini je, kuna njia yoyote ya kuwa na hakika kuhusu yatakayotokea wakati ujao?

WANADAMU wametumia njia za aina zote katika jitihada ya kutaka kujua yatakayotokea wakati ujao. Wanasayansi wa jamii ambao ni wataalamu wa mambo ya wakati ujao, huchanganua mielekeo ya wakati wa sasa na kutabiri kwa kuitegemea. Wataalamu wa uchumi hufanya vivyo hivyo katika utabiri wao. Wanajimu na waaguzi hutegemea unajimu, matufe ya kioo, na mizungu, nao wanapendwa na wengi. Kwa mfano, mnajimu Mfaransa Nostradamus, angali anapendwa sana ingawa alikufa karne nyingi zilizopita.

Wote hao ambao hujidai kuwa manabii wamekuwa watu wasioweza kutegemeka kabisa na wenye kutamausha. Kwa nini? Kwa sababu wao humpuuza Yehova Mungu na Neno lake, Biblia. Kwa sababu hiyo, wao hushindwa kujibu maswali ya msingi kama haya: ‘Kwa nini naweza kuwa na hakika kwamba mambo yaliyotabiriwa katika Biblia yatatukia? Yanahusianaje na kusudi la Mungu kwa wanadamu? Mimi na familia yangu tunaweza kunufaikaje na unabii huo?’ Biblia hujibu maswali hayo.

Unabii wa Biblia pia ni bora kwa njia nyingine nyingi. Tofauti na matabiri ya wanajimu, unabii wa Biblia humwacha mtu atumie hiari yake mwenyewe. Hivyo, mambo yanayompata mtu hayaamuliwi kimbele. (Kumbukumbu la Torati 30:19) Maandishi kama yale ya Nostradamus yamekosa msingi wowote wa kiadili, nayo hufunika hali hiyo kwa mafumbo na habari zenye kusisimua. Lakini unabii wa Biblia una msingi imara wa kiadili. Hiyo hueleza ni kwa nini Mungu atatimiza makusudi yake. (2 Mambo ya Nyakati 36:15) Unabii wa Yehova haukosi kamwe kutimia, kwa kuwa ‘Mungu hawezi kusema uwongo.’ (Tito 1:2) Hivyo, watu wanaoongozwa na Neno la Mungu huishi wakiwa na ujuzi, huwa na maisha yenye kusudi, na yenye furaha bila kuharibu wakati wao wenye thamani na rasilimali zao kwa kufuatia mambo yasiyo na maana.—Zaburi 25:12, 13.

Mambo hayo na mengine mengi yalizungumziwa kwenye Mikusanyiko ya Wilaya ya “Neno la Mungu la Kiunabii” ya Mashahidi wa Yehova, iliyofanywa ulimwenguni kote mwaka wa 1999/2000. Hotuba, mahoji, maonyesho, na drama ya Biblia iliwafanya wasikilizaji wazingatie urithi mzuri wa kiroho unaofurahiwa na wale wanaojifunza na kutumia neno la Mungu la kiunabii. Makala ifuatayo itapitia baadhi ya mambo makuu yenye kusisimua ya mkusanyiko.