Hamia kwenye habari

Hamia kwenye yaliyomo

 Maoni ya Biblia

Je, Inafaa Mtu Kuonyesha Mali Yake?

Je, Inafaa Mtu Kuonyesha Mali Yake?

“Kuvalia jinzi au mavazi mengine ya wabuni mashuhuri wa mitindo kunaweza kuinua hadhi ya mtu anayehisi kuwa haifai na aanze kuwazia kwamba yeye ni mtu wa maana!”—Mwanasaikolojia Chaytor D. Mason.

ILI wapendwe, watu fulani huonyesha mavazi yao ya kimitindo au mali nyingine ya bei ghali. Kwa mfano, katika nchi mmoja huko Asia, “watu ambao wamekuwa matajiri hivi karibuni hupenda vitu vya hali ya juu, kama vile mikoba iliyonunuliwa Ufaransa, magari yenye mwendo wa kasi kutoka Italia, na isitoshe, wanapenda sana kuonyesha [utajiri wao],” inasema makala katika gazeti The Washington Post.

Bila shaka, hakuna ubaya wowote kufurahia matunda ya kazi yako. Biblia inasema: “Kila mtu ale, naam, anywe na kuona mema kwa ajili ya kazi yake yote iliyo ngumu. Hiyo ndiyo zawadi ya Mungu.” (Mhubiri 3:13) Lakini, je, ni jambo la hekima mtu kuonyesha mali yake? Biblia inasema nini?

“Tajiri ana Marafiki Wengi”

Matajiri au wanaojifanya kuwa matajiri wanapoonyesha mali yao, huenda wakavutia marafiki wa aina gani? Biblia inatudokezea katika msemo huu kuhusu utu wa mwanadamu: “Maskini huchukiwa hata na jirani yake, lakini tajiri ana marafiki wengi.”​—Methali 14:20, Biblia Habari Njema.

Andiko hilo linamaanisha kwamba “marafiki wengi” wa tajiri si marafiki wake, bali ni marafiki wa mali yake. Urafiki wao ni wa ubinafsi na usemi wao ni wa kurairai. Biblia inasema kwamba usemi wa aina hiyo ni “unafiki kwa ajili ya tamaa,” au pupa.​—1 Wathesalonike 2:5.

Kwa hiyo, jiulize, ‘Ninataka marafiki wa aina gani? Marafiki wanaonipenda kwa sababu ya vitu nilivyo navyo au marafiki wa kweli wanaonipenda kwa sababu ya sifa nilizo nazo?’ Biblia inaonyesha kwamba tabia yetu inaweza kuamua ni marafiki wa aina gani tutakaowavutia.

“Wenye Kiasi Wana Hekima”

Tatizo lingine linaloweza kutokea kwa sababu ya mtu kuonyesha mali yake linatajwa katika Biblia kuhusiana na Mfalme Hezekia, aliyeishi katika Yerusalemu la kale. Pindi moja, Hezekia aliwaonyesha wakuu wa Babiloni “vyote vilivyokuwa katika hazina zake.” Ni wazi kwamba wageni hao walivutiwa na mali yake nyingi. Hata hivyo, huenda pia mali hiyo ilichochea pupa yao. Walipoondoka, Isaya, nabii wa Mungu alimwambia Hezekia kwa ujasiri kwamba siku moja, vitu vyake vyote ‘vingechukuliwa kwenda Babiloni.’ Hakuna chochote kingebaki. Maneno hayo yalitimia! Miaka kadhaa baadaye, Wababiloni walirudi na kupora mali yote ya familia ya Hezekia.​—2 Wafalme 20:12-17; 24:12, 13.

Vivyo hivyo leo, watu wanaoonyesha mali yao huenda wakaipoteza yote au wakapoteza kiasi fulani cha mali hiyo. Ripoti moja kuhusu uhalifu na usalama huko Mexico ilisema hivi: “Kuonyesha waziwazi mali ni kivutio kwa wezi huko Mexico City. Kuvalia vito, saa za bei ghali, na kuonyesha kiasi kikubwa cha pesa huwavutia watu wasiofaa.” Inafaa kama nini kufuata shauri la Biblia kwamba mtu “asijigambe” kwa kuwa ana utajiri. (Yeremia 9:23) “Wenye kiasi wana hekima,” inasema Methali 11:2.

Tambua Sifa Nzuri za Wengine

Badala ya kuwa na mtazamo wa kujisifu na kujionyesha, mtu mnyenyekevu na mwenye kiasi hufurahia sifa nzuri na uwezo wa wengine. Andiko la Wafilipi 2:3 linasema: “Msitende neno lo lote kwa kushindana wala kwa majivuno; bali kwa unyenyekevu, kila mtu na amhesabu mwenziwe kuwa bora kuliko nafsi yake.” (Union Version) Tunasoma hivi kwenye Wagalatia 5:26: “Na tusiwe wenye kujisifu, wenye kuchochea mashindano juu ya mtu na mwenzake, tukioneana wivu.”

Je, unataka marafiki wanaokupenda kwa sababu ya vitu ulivyo navyo au marafiki wanaokupenda kwa sababu ya sifa ulizo nazo?

Pia watu wanaopata hekima kupitia kujifunza Biblia wanajua kwamba msingi wa urafiki wa kweli ni kuheshimiana na kutokuwa na ubinafsi na kwamba urafiki wa aina hiyo haukomi mali zinapoisha. Badala yake, unaendelea kuwa imara kadiri muda unavyopita. Methali 17:17 inasema: “Rafiki wa kweli anapenda nyakati zote.” Zaidi ya yote, mtu mwenye hekima hujitahidi kumpendeza Mungu. Anajua kwamba Mungu havutiwi na sura ya nje bali yeye humtazama “yule mtu wa siri wa moyoni,” yaani, sifa zetu. (1 Petro 3:4) Kwa hiyo, anajitahidi sana kusitawisha sifa zenye kuvutia ambazo Biblia inazitaja kuwa “utu mpya.” (Waefeso 4:24) Baadhi ya sifa hizo zinatajwa kwenye Mika 6:8: “Yehova anataka nini kutoka kwako ila kutenda haki na kupenda fadhili na kuwa na kiasi katika kutembea na Mungu wako?”

Ni kweli kwamba katika ulimwengu leo, watu hawavutiwi na sifa ya kiasi, na hilo haliwashangazi wanafunzi wa Biblia. Kwa nini? Ilipokuwa ikizungumzia “siku za mwisho,” Biblia ilitabiri kwamba wanadamu wengi wangekuwa “wenye tamaa ya fedha, wenye majivuno, kujiona, . . . waliojaa kiburi.” (2 Timotheo 3:1-5, BHN) Katika mazingira kama hayo, watu hujihisi huru kuonyesha mali yao. Hata hivyo, Mungu anatutia moyo ‘tujiepushe kabisa na watu wa namna hiyo,’ ili tusiwe kama wao.