Hamia kwenye habari

Hamia kwenye yaliyomo

Jicho la Uduvi Anayeitwa Peacock Mantis

Jicho la Uduvi Anayeitwa Peacock Mantis

 Je, Ni Kazi ya Ubuni?

Jicho la Uduvi Anayeitwa Peacock Mantis

● Uduvi anayeitwa peacock mantis anayepatikana kwenye Tumbawe Kubwa la Australia, ana uwezo wa kuona wa hali ya juu zaidi kuliko ule wa wanyama wengine wote. “Kwa kweli uwezo wake ni wa pekee sana,” akasema Dakt. Nicholas Roberts, “macho yake yanafanya kazi vizuri zaidi kuliko kitu kingine chochote ambacho sisi wanadamu tumetengeneza.”

Fikiria hili: Uduvi huyo anaweza kutazama mwangaza wenye mng’ao mkali moja kwa moja machoni kwa njia ambayo wanadamu hawawezi kufanya. Mawimbi ya mwangaza wenye mng’ao mkali yanaweza kusonga katika mstari ulionyooka au katika mzunguko. Mbali na kuwa na uwezo wa kuona mwangaza ukiwa katika mstari ulionyooka na pia katika mzunguko, uduvi huyo anaweza pia kubadili mawimbi yaliyonyooka yawe mzunguko na ya mzunguko yawe mstari ulionyooka, jambo ambalo wanyama wengine hawawezi kufanya. Hilo huboresha uwezo wake wa kuona.

Mashini za kucheza DVD hufanya kazi kwa njia hiyohiyo. Ili kuchanganua habari, mashini ya DVD lazima kwanza ibadili mwangaza wenye mng’ao mkali ulioelekezwa kwenye diski kuwa mawimbi yanayozunguka, kisha ibadili tena mawimbi hayo yasonge katika mstari ulionyooka. Lakini uduvi huyo anafanya jambo la ziada. Mashini za kawaida za DVD zinaweza kubadili rangi nyekundu peke yake, na DVD za hali ya juu zaidi zinaweza kubadili rangi ya bluu. Lakini jicho la uduvi huyo, linaweza kubadili mwangaza wa rangi zote zinazoweza kuonekana.

Watafiti wanaamini kwamba wakitumia ubuni wa jicho la uduvi huyo, mainjinia watatengeneza mashini ya kucheza DVD ambayo inaweza kucheza diski zenye habari nyingi zaidi kuliko DVD zinazotumiwa leo. Roberts anasema: “Jambo la kushangaza ni kuona jinsi ambavyo limeundwa kwa njia rahisi sana na ya ajabu. Linafanya kazi vizuri zaidi kuliko kifaa chochote ambacho tumewahi kuunda.”

Una maoni gani? Je, jicho lenye kustaajabisha sana la uduvi anayeitwa peacock mantis lilijitokeza lenyewe? Au lilibuniwa?

[Hisani ya Picha katika ukurasa wa 24]

Courtesy Stephen Childs