Hamia kwenye habari

Hamia kwenye yaliyomo

Ninaweza Kufanya Nini Uhusiano Ukivunjika?

Ninaweza Kufanya Nini Uhusiano Ukivunjika?

 Vijana Huuliza

Ninaweza Kufanya Nini Uhusiano Ukivunjika?

“Tulikuwa na uhusiano na mvulana fulani kwa miezi sita na kabla ya hapo tulikuwa marafiki kwa miaka mitano. Alipotaka kuvunja uhusiano wetu, hata hakutaka kuniambia ana kwa ana. Aliacha tu kunizungumzia. Nilijihisi hoi. Nilitamaushwa sana. Nilijiuliza mara nyingi, ‘Kwani nilikosea wapi?’”—Rachel. *

SHANGWE yako yote inaweza kugeuka kuwa huzuni uhusiano unapovunjika. Fikiria kisa cha Jeff na Susan, ambao walikuwa na urafiki wa karibu kwa miaka miwili. Katika muda huo, uhusiano wao uliimarika. Siku nzima Jeff alimtumia Susan jumbe fupi zenye maneno matamu ya kimapenzi. Mara kwa mara, Jeff alimpa zawadi kumwonyesha kuwa bado alikuwa akimfikiria. “Jeff alijitahidi sana kunisikiliza na kunielewa,” Susan anasema. “Alinifanya nihisi kwamba mimi ni mtu wa pekee.”

Muda si muda, Jeff na Susan walianza kuzungumza kuhusu ndoa na mahali ambapo wataishi baada ya kuoana. Jeff hata aliashiria kwamba huenda akamposa Susan. Kisha, ghafula bin vu, Jeff alikatiza uhusiano huo! Susan alivunjika moyo sana. Ingawa aliendelea na shughuli za kawaida za maisha, alijihisi kana kwamba amekufa ganzi kwa sababu ya mshtuko. “Nilihisi nimechoka kiakili na kimwili,” anasema. *

Kwa Nini Mtu Huumia Sana?

Ikiwa umewahi kuwa katika hali kama ya Susan, huenda umejiuliza,  ‘Nitawahi kuwa na maisha ya kawaida?’ (Zaburi 38:6) Ni kawaida kuvunjika moyo ukipatwa na hali kama hiyo. Huenda kuvunjika kwa uhusiano ndilo jambo lenye kutamausha zaidi ambalo umewahi kukabili. Kwa kweli, watu fulani wamesema kwamba ni kama sehemu fulani ya mwili huwa inakufa uhusiano unapovunjika. Huenda ukapitia hatua kama hizi au nyingine za mtu aliyefiwa:

Kukataa. ‘Haiwezekani kwamba uhusiano wetu umevunjika. Atabadili maoni yake baada ya siku moja au mbili.’

Hasira. ‘Angewezaje kunitendea hivi? Ananiudhi!’

Kushuka moyo. ‘Mimi siwezi kupendwa. Hakuna mtu atawahi kunipenda.’

Kukubali. ‘Nitakuwa sawa. Nitaumia kwa muda, lakini hali itakuwa bora.’

Habari njema ni kwamba unaweza kufikia hatua ya kukubali. Muda utakaochukua kufikia hatua hiyo unategemea mambo kadhaa, kutia ndani muda ambao mlikuwa na uhusiano na hatua mliyokuwa mmefikia. Lakini kwa sasa, unaweza kukabilianaje na kuvunjika moyo?

Kurudia Hali Yako ya Kawaida

Huenda umesikia watu wakisema kwamba kadiri muda unavyopita ndivyo majeraha yanavyopona. Uhusiano wenu unapovunjika, huenda maneno hayo yasiwe na maana yoyote. Hiyo ni kwa sababu ni mengi zaidi ya muda yanayohusika. Kwa mfano: Unapokatwa, jeraha litapona baada ya muda, lakini kwa sasa bado linauma. Unahitaji kuzuia damu isivuje na kutuliza maumivu. Pia, unahitaji kuzuia kidonda hicho kisiambukizwe. Ndivyo ilivyo na jeraha la kihisia. Kwa sasa, linauma. Lakini unaweza kuchukua hatua fulani ili kupunguza maumivu na kuzuia usiambukizwe na kinyongo. Kupita kwa muda kutasaidia, lakini unapaswa kutimiza sehemu yako. Jaribu kufanya mambo yafuatayo.

Omboleza. Hakuna ubaya wowote kulia. Biblia inasema kuna “wakati wa kulia” na hata “wakati wa kuomboleza.” (Mhubiri 3:1, 4) Kulia hakumaanishi wewe ni dhaifu. Daudi ambaye alikuwa shujaa wa vita, wakati mmoja alikiri hivi alipokuwa na maumivu makali ya kihisia: “Kila usiku nalowesha kitanda changu kwa machozi; kwa kulia kwangu naulowesha mto wangu.”—Zaburi 6:6, Biblia Habari Njema.

Tunza afya yako. Kufanya mazoezi na kula vizuri kutasaidia kurudisha nguvu ulizopoteza kwa sababu ya mfadhaiko wa kuvunjika kwa uhusiano. Biblia inasema: “Mazoezi ya kimwili ni yenye faida.”—1 Timotheo 4:8.

Unahitaji kukazia fikira mambo gani yanayohusiana na afya yako?

․․․․․

Uwe na shughuli nyingi. Usiache kufanya mambo yanayokupendeza. Na usijitenge kamwe na watu. (Methali 18:1) Kushirikiana na watu wanaokujali kutakufanya ukazie fikira mambo yanayofaa.

Ni miradi gani inayoweza kukusaidia uwe na shughuli nyingi?

․․․․․

Sali kwa Mungu na umwambie hisia zako. Inaweza kuwa vigumu kufanya hivyo. Baada ya uhusiano kuvunjika, watu fulani  huhisi kwamba Mungu amewasaliti. Wao husema, ‘Nilisali na kusali kwamba nipate mtu anayenifaa, na sasa ona kilichotokea!’ (Zaburi 10:1) Hata hivyo, je, inafaa kumwona Mungu kuwa mtu anayewatafutia watu wachumba? La hasha; na hapaswi kulaumiwa ikiwa mtu mmoja hataki uhusiano huo uendelee. Tunajua jambo hili kumhusu Yehova: ‘Anakujali wewe.’ (1 Petro 5:7) Kwa hiyo, mmiminie hisia zako katika sala. Biblia inasema hivi: “Maombi yenu na yajulishwe Mungu; na amani ya Mungu yenye ubora unaozidi fikira zote itailinda mioyo yenu na nguvu zenu za akili kwa njia ya Kristo Yesu.”—Wafilipi 4:6, 7.

Ni mambo gani hususa unayoweza kusali kwa Yehova unapojitahidi kukabiliana na mfadhaiko wa kuvunjika kwa uhusiano?

․․․․․

Kuganga Yajayo

Baada ya kupona, huenda ikafaa kufikiria ni nini kilichotukia katika uhusiano wenu. Unapokuwa tayari kufanya hivyo, kuandika majibu ya maswali yafuatayo kunaweza kukusaidia.

▪ Je, alikuambia kwa nini anavunja uhusiano wenu? Ikiwa alikuambia, andika sababu hiyo hapa chini, hata kama unahisi si sababu inayofaa.

․․․․․

▪ Unafikiri kulikuwa na sababu gani nyingine?

․․․․․

▪ Ukitazama nyuma, je, kuna mambo yoyote ambayo ungefanya ili uhusiano wenu usivunjike? Mambo gani?

․․․․․

▪ Je, kuvunjika kwa uhusiano huo kumekuonyesha njia ambazo ungependa kukomaa zaidi kiroho au kihisia?

․․․․․

▪ Ukianza uhusiano mwingine, ungependa kufanya nini kwa njia tofauti?

․․․․․

Ni kweli kwamba uhusiano wenu haukufaulu. Lakini kumbuka jambo hili: Kunapokuwa na dhoruba ni rahisi kufikiria tu mawingu mazito na mvua inayomwagika. Hata hivyo, mwishowe mvua huacha kunyesha na anga huwa jangavu. Baada ya muda, vijana waliotajwa katika makala hii walifaulu kuendelea na maisha yao. Uwe na hakika kwamba hata wewe unaweza kufaulu!

[Maelezo ya Chini]

^ fu. 3 Majina katika makala hii yamebadilishwa.

^ fu. 5 Ingawa majina yanayotajwa katika makala hii ni ya wasichana, kanuni zinazozungumziwa hapa zinawahusu wavulana pia.

MAMBO YA KUFIKIRIA

▪ Umejifunza nini kujihusu kutokana na uhusiano wako wa awali?

▪ Umejifunza nini kuhusu watu wa jinsia tofauti?

▪ Uhusiano wenu unapovunjika unaweza kuzungumza na nani unapolemewa na hisia?

[Sanduku katika ukurasa wa 20]

PENDEKEZO

Susan, aliyetajwa awali, aliandika orodha ya maandiko na kuyaweka karibu ili ayasome alipolemewa na hisia. Huenda unaweza kufanya vivyo hivyo na maandiko yaliyotajwa katika makala hii.

[Picha katika ukurasa wa 19]

Kuvunjika kwa uhusiano ni kama kukatwa. Kwa sasa, kidonda kinauma lakini kitapona