Hamia kwenye habari

Hamia kwenye yaliyomo

Tumeumbwa na Uwezo wa Kujifunza Milele

Tumeumbwa na Uwezo wa Kujifunza Milele

 Tumeumbwa na Uwezo wa Kujifunza Milele

“Kila kichwa kina ubongo ulio na uwezo mkubwa ajabu unaofanya kazi muhimu, na kadiri tunavyoendelea kujifunza juu yake, ndivyo tunavyotambua kwamba uwezo wake hauna kikomo.”—TONY BUZAN NA TERENCE DIXON, WAANDISHI WA SAYANSI.

UBONGO wa mwanadamu unaweza kujifunza mambo mengi kadiri gani? Swali hilo linaendelea kuwashangaza na kuwatatanisha watafiti. Katika kitabu The Brain Book, Peter Russell anaandika hivi: “Kadiri tunavyojifunza mambo mengi zaidi kuhusu ubongo wa mwanadamu, ndivyo tunavyogundua kwamba uwezo wake ni mkubwa zaidi kuliko ilivyodhaniwa.”

Kwa mfano, ubongo wetu una uwezo mkubwa sana wa kukumbuka mambo. Russell anasema: “Kumbukumbu si kama chombo kinachoweza kujaa.” Badala yake, kumbukumbu imelinganishwa na mti unaoendelea kutokeza matawi mapya ambayo hushikilia habari zaidi. Kila kitu unachokumbuka ni kama tawi jipya linaloshikilia habari zaidi. Russell anaongeza hivi: “Kwa hiyo uwezo wa kukumbuka huendelea kuongezeka. Ukijua mengi ndivyo utakavyoweza kukumbuka mengi zaidi.” Basi, swali tulilouliza awali linazuka tena, Kwa nini ubongo wa mwanadamu una uwezo mkubwa kadiri hiyo ambao haujatumiwa?

 Nadharia ya mageuzi haijibu swali hilo kwa njia inayoridhisha. Kwa kuwa inategemea sana dhana ya kusalimika kwa viumbe bora, nadharia hiyo huwafanya watu wenye kutumia akili wajiulize hivi, ‘Ni nini kilichosababisha ubongo wa mwanadamu uwe na uwezo mkubwa jinsi hiyo?’ Kwa mfano, kwa nini utengeneze lori kubwa ikiwa utabeba sepetu moja tu ya mchanga?

Hata hivyo, Biblia hutoa maelezo sahili lakini yenye kueleweka. Kwanza, inatuambia kwamba wazazi wetu wa kwanza, Adamu na Hawa, waliumbwa kwa mfano wa Mungu wakiwa na uwezo wa kuonyesha sifa zake za ajabu. Pili, inaeleza kwamba waliumbwa ili waishi milele, naam, wajifunze milele. (Mwanzo 1:27; 2:16, 17) Ijapokuwa ubongo wa mwanadamu si mkamilifu kwa sasa kwa sababu wanadamu walirithi dhambi, unathibitisha kusudi hilo la Mungu.—Waroma 5:12.

Lakini kusudi la Mungu la awali, kwamba dunia ijawe na wanadamu wakamilifu wanaomwogopa Mungu wanaoishi katika Paradiso, litatimia. Kwa hakika, Yehova alitoa Mwana wake wa pekee, Yesu Kristo, awe dhabihu ya fidia kwa ajili yetu ili tupate uzima wa milele.—Mathayo 20:28; Yohana 3:16.

Habari Bora Zaidi za Kujifunza

Pia Yehova alitupatia Neno lake lililoongozwa kwa roho takatifu, yaani, Biblia Takatifu. (2 Timotheo 3:16; 2 Petro 1:21) Kwa kuwa kitabu hicho kiliongozwa na roho takatifu, hatutakuwa tunatia chumvi kusema kwamba kina habari bora zaidi za kujifunza na ndicho chakula bora zaidi cha kiroho kwa ajili ya wanadamu. (Zaburi 19:7-10) Kwa kweli, Yesu mwenyewe alisema: “Mwanadamu ataishi, si kwa mkate tu, bali kwa kila neno linalotoka katika kinywa cha Yehova.”—Mathayo 4:4.

Kwa hiyo, uwe kijana au mzee, kwa nini usitenge muda mfupi kila siku kusoma ‘maneno’ ya Mungu yenye thamani? Wale wanaofanya hivyo na kutumia yale wanayojifunza watafaidika sasa na wakati ujao. Naam, wanaweza kuwa na tarajio la kuishi na kujifunza milele, kama Mungu alivyokusudia awali. Hilo ni tumaini lililoje!—Mhubiri 3:11; Yohana 17:3.

[Picha katika ukurasa wa 11]

Kulingana na kusudi la Mungu, ubongo wa mwanadamu uliumbwa ili ujifunze milele

[Picha katika ukurasa wa 12]

Biblia ina habari bora zaidi za kujifunza