Hamia kwenye habari

Hamia kwenye yaliyomo

Mbona Watu Wanaacha Dini?

Mbona Watu Wanaacha Dini?

 Mbona Watu Wanaacha Dini?

Dini zinazodai kufundisha mafundisho ya Yesu Kristo zina wafuasi bilioni 1.7 hivi. Jumuiya ya Wakristo imesemwa kuwa dini kubwa zaidi duniani, hata kupita dini maarufu kama vile Ubudha, Uhindu, na Uislamu. Hata hivyo, ripoti zinaonyesha kwamba katika nchi nyingi za Ukristo, watu wanaacha Jumuiya ya Wakristo.

 Watu wa hali zote wanaacha makanisa. Ronald F. Inglehart, mtafiti kwenye Chuo Kikuu cha Michigan aliye pia mwenyekiti wa mradi wa Uchunguzi wa Maadili Ulimwenguni, alisema kwamba dini inafifia katika nchi zilizoendelea. Gazeti la Bible Review linamnukuu akisema hivi: ‘Mbali na kupungua sana kwa idadi ya watu wanaoenda kanisani kila juma, sasa nchi za Amerika Kusini zinatuma mishonari ili kuokoa maisha ya watu wa Ulaya.’ Anasema kwamba “dini imefifia” hasa katika nchi fulani kaskazini mwa Ulaya. Huko Norway na Denmark, asilimia 5 tu ya watu ndio huenda kanisani kwa ukawaida. Huko Sweden, asilimia 4 tu ya watu ndio huenda kanisani, na nchini Urusi ni asilimia 2 tu.

Ripoti kutoka Ujerumani zaonyesha kwamba kati ya mwaka wa 1984 na 1993, idadi ya Wakatoliki rasmi ambao walikuwa wakienda kanisani kwa ukawaida ilipungua toka asilimia 25.3 hadi asilimia 19. Kufikia 1992, ni asilimia 4 tu ya Waprotestanti waliokuwa wakihudhuria ibada ya Jumapili kwa ukawaida. Mnamo mwaka wa 1999, gazeti la Christianity Today liliripoti hivi: “Kati ya kila Wajerumani kumi, ni mmoja tu ambaye huenda kanisani kila juma.”

Gazeti la The Guardian lasema hivi kuhusu kupungua kwa waumini huko Uingereza: “Ukristo umedhoofika sana kuliko wakati mwingine wowote.” Makala hiyo yasema kwamba “kile kipindi cha mwaka wa 1950-2000 ndicho kilichokuwa kibaya zaidi kwa makasisi na wazee wa kanisa kati ya vipindi vyote vya miaka 50.” Gazeti hilo lilirejelea ripoti moja maalum kuhusu dini katika Muungano wa Uingereza na kusema kwamba vijana na hata wazee wanaacha dini. Gazeti hilo lasema hivi: ‘Wazee wanaacha kumwamini Mungu wanapoendelea kuzeeka. Utafiti wa hivi majuzi ambao unaonyesha mwelekeo huo, utayafadhaisha makanisa ya Uingereza ambayo yamo taabani. Kwa muda mrefu yamewategemea wazee wakati waumini wanapoendelea kupungua.’

Mbali na Ulaya, mielekeo hiyo ipo katika nchi nyingine. Kwa mfano, gazeti la Kanada la Alberta Report lasema kwamba Kanada imekumbwa na “kufifia kwa ibada na imani ya dini” na kwamba “thuluthi tatu ya Wakanada wanapendelea maoni yao binafsi kumhusu Mungu badala ya kufuata mafundisho rasmi.”

Watu wengi hawahisi kwamba wanafaidika au kuelimishwa kiroho wanapohudhuria ibada kanisani. Kwa mujibu wa gazeti la Kanada la Maclean’s, Wayahudi na Wakatoliki waliohojiwa wakati wa ibada maalum ya Kihindu kwenye milima ya Himalaya, walisema hivi: “Hatukuvutiwa tena na sherehe za kidini ambazo hazikuchangamsha.” Kwa kweli, hata baada ya kwenda kanisani kwa miaka mingi bila kukosa, wengine hujiuliza hivi, ‘Nimejifunza nini kanisani? Je, nimemkaribia Mungu zaidi?’ Basi ndiyo sababu, kama vile mwandishi Gregg Easterbrook alivyosema, ‘katika siku zetu, nchi za Magharibi zimekumbwa hasa na umaskini wa kiroho badala ya umaskini wa fedha.’

Bila shaka, kuna nchi nyingi ambako watu wengi huenda kanisani. Hata hivyo, kwenda kanisani hakuonyeshi kwamba watu hao hutii mafundisho ya kanisa kwa uaminifu. Kwa mfano, gazeti la Australia la The Age lasema kwamba katika nchi za Magharibi, ‘idadi ya Wakristo wanaoishi kulingana na mafundisho ya dini yao inapungua haraka. Katika sehemu nyingi za Afrika, Asia, na Amerika Kusini, watu wengi hutumia Ukristo kama chombo cha kujificha ili kuendelea kushikilia mapokeo ya ajabu-ajabu ya kienyeji ambayo hayahusiani na mafundisho rasmi ya Ukristo. Na mara nyingi mapokeo hayo hupinga mafundisho ya Kikristo, na yalitupiliwa mbali rasmi miaka mingi iliyopita.’

Mbona watu wengi, vijana kwa wazee, wanaacha makanisa yao? Yaelekea sababu kuu ni kukatishwa tamaa.

Sifa Mbaya ya Dini

Gazeti la The Guardian lasema hivi: “Kanisa Katoliki lilipata sifa mbaya ya kupanga njama na ufashisti katika karne yote ya 20, hiyo ikitia ndani kumpongeza Jenerali Franco baada ya vita ya wenyewe kwa wenyewe huko Hispania, na pia harakati za kanisa hilo za hivi majuzi za kumtetea Jenerali Pinochet.” Gazeti la Guardian pia lilisema kwamba Papa Pius wa 12, ambaye alikuwa papa wakati wa vita, “alikuwa tayari kukubaliana [na Hitler] na kuepuka mambo ambayo yangemwaibisha kama vile kushutumu yale Maangamizi Makubwa.”

Gazeti la The Age lasema hivi: ‘Mara nyingi madai  ya Ukristo yamekuwa ya uongo. Wakristo hawajaweza kudumisha amani na umoja kati yao. Jambo hilo linathibitishwa na vile vita vingi vya uporaji na utekaji nyara ambavyo ilidaiwa vilipiganwa ili kuwageuza watu kuwa Wakristo. Imani, tumaini na upendo zaweza kuwa ndizo sifa kuu za Kikristo, hata hivyo wale wanaodaiwa kuwa wanafuata sifa hizo wanaweza kukosa imani, wanaweza kukosa tumaini na labda kutokuwa na upendo kama vile tu watu ambao si Wakristo. Yale Maangamizi Makubwa yalianzishwa na nchi ya Ukristo, na nchi nyingine ya Ukristo ndiyo iliyoshambulia nchi ya Japani kwa silaha za nyukilia.’

Huenda wengine wakasema kwamba Jumuiya ya Wakristo imeendeleza sifa nzuri kama vile kuonyesha busara katika matumizi ya mali, uvumilivu, kiasi, na haki. Hata hivyo, gazeti la The Age lasema hivi: “Lakini, kwa ujumla, Wakristo huko Ulaya, Amerika Kaskazini na Australia wanatumia mali-asili za Dunia kupita kiasi na wanaendelea kuruhusu dhuluma, uonevu na uharibifu wa mazingira ya nchi jirani zisizo na uwezo mkubwa wa kisiasa ili kujitajirisha.”

Gazeti la The Age laendelea kusema hivi kuhusu wakati ujao wa Jumuiya ya Wakristo: “Bila utaratibu mzuri na ulio thabiti, Ukristo hauwezi kamwe kuwa na uvutano mkubwa katika jamii kama ilivyokuwa katika karne zilizopita. Jambo hilo laweza kuwa jema au baya, kulingana na maoni ya watu mmoja-mmoja. Lakini huo ndio ukweli wa mambo kuhusu wakati ujao wa Ukristo.”

Kwa sababu ya kuzorota huko kwa dini, wengi wanaacha makanisa mashuhuri. Lakini je, mahitaji yao hutoshelezwa wanapoingia katika dini nyingine? Je, hilo ndilo suluhisho la tatizo lao?

[Picha katika ukurasa wa 7]

Watu wengi wameacha dini kwa kuwa zimeunga mkono vita na serikali katili za kisiasa

[Picha katika ukurasa wa 7]

Sherehe kubwa za kidini hazitoshelezi mahitaji ya kiroho ya watu wengi

[Hisani]

foto: age fotostock