Hamia kwenye habari

Hamia kwenye yaliyomo

‘Jaribio Halijafaulu’

‘Jaribio Halijafaulu’

 ‘Jaribio Halijafaulu’

KATIKA ulimwengu huu unaozidi kuwa kama kijiji kimoja, yasemekana kwamba matajiri wanazidi kuwa matajiri na maskini wanazidi kuwa maskini. Kundi moja la kimataifa lilisema hivi lilipokuwa likizungumza kuhusu jitihada za kusitawisha uchumi wa ulimwenguni pote: “Baada ya kufanya jaribio hilo kwa miaka 50, halifaulu. Badala ya kuwaletea watu wote faida za kiuchumi, jaribio hilo linaelekea kusababisha uharibifu wa mazingira, vurugu isiyo na kifani katika jamii, kuzorota kwa uchumi wa nchi nyingi, kuongezeka kwa umaskini, njaa, ukosefu wa mashamba, uhamiaji na ghasia. Sasa yaweza kusemwa kwamba jaribio hilo halijafaulu.”

Mambo yaliharibikia wapi? Wanadamu wanapotaka kujifaidi wenyewe tu, hawana budi kuleta madhara. Mfadhili na mwekezaji anayeitwa George Soros, alisema hivi: “Masoko hufanya mambo yote, kutia ndani wanadamu (wafanyakazi) na mambo ya asili (ardhi), yaonekane kama bidhaa.” Pia, kutokamilika kwa wanadamu huchangia. Kupatana na maoni ya mwanafalsafa Karl Popper, Soros alisema hivi: ‘Ufahamu wetu haujakamilika; hatuwezi kuwa na mpango mkamilifu kwa ajili ya jamii.’

Kwa wazi, tofauti kubwa kati ya matajiri na maskini ilianza zamani. Karne nane kabla ya Kristo kutokea, mwandikaji mmoja wa Biblia alisema kuhusu watu ‘waliowaonea maskini, na kuwaponda wahitaji.’ (Amosi 4:1) Baada ya kuona dhuluma kama hizo, mtawala mmoja wa kale aliandika hivi yapata miaka 3,000 iliyopita: “Mtu mmoja anayo mamlaka juu ya mwenziwe kwa hasara yake.”—Mhubiri 8:9, Chapa ya 1989.

Suluhisho ni nini? Je, wanadamu wanaweza kumaliza ile tofauti kubwa kati ya matajiri na maskini kupitia ushirikiano wa kimataifa? Soros alisema hivi: “Hatuna mashirika ya kimataifa ya kutosha yatakayolinda uhuru wa watu binafsi, haki za binadamu, na mazingira, au kuendeleza haki katika jamii—na zaidi ya yote kudumisha amani. Mashirika mengi tuliyo nayo ni ya kiserikali, na kwa kawaida serikali mbalimbali hutanguliza faida zake badala ya faida za watu wote kwa jumla. Katiba ya Umoja wa Mataifa hairuhusu shirika hilo litimize ahadi zinazoonyeshwa katika utangulizi wa mkataba wake.”

Je, twapaswa kukata tamaa? La. Serikali adilifu ya ulimwenguni pote i karibu! Serikali hiyo ilikuwa kichwa cha mahubiri ya Yesu. Aliiita “ufalme wa Mungu,” na aliwafundisha wanafunzi wake kusali kwa ajili yake. (Luka 11:2; 21:31) Ufalme wa Mungu umesimamishwa mbinguni, na hivi karibuni utaondoa ukosefu wote wa haki duniani. (Ufunuo 11:15, 18) Badala ya kuwa jaribio tu la muda la utawala, Ufalme wa Mungu utadumu milele. (Danieli 2:44) Utatatua kabisa matatizo ya umaskini na uonevu. Ni taraja zuri kama nini kwa maskini na watu walioonewa—naam, kwa kila mtu!

[Picha katika ukurasa wa 13]

Uchumi wa ulimwenguni pote haujasuluhisha matatizo ya maskini—mabilioni ya watu wangali wanaishi bila kuwa na maji ya mfereji au umeme nyumbani mwao