Hamia kwenye habari

Hamia kwenye yaliyomo

Kutoka kwa Wasomaji Wetu

Kutoka kwa Wasomaji Wetu

 Kutoka kwa Wasomaji Wetu

Faraja kwa Wagonjwa Asanteni kwa ajili ya mfululizo “Faraja kwa Wagonjwa.” (Januari 22, 2001) Miaka minne iliyopita nilipata aksidenti. Mara nyingi nilihisi kwamba laiti ningekufa. Tokeo ni kwamba nimekuwa msahaulifu sana nami husononeka mara nyingi sana. Nilitiwa moyo sana niliposoma mfululizo huo.

T. M., Japani

Nimekabiliana na maumivu makali ya ugonjwa wa baridi yabisi tangu nilipokuwa na umri wa miaka 15. Habari hiyo ilinisaidia kung’amua kwamba ninahitaji kujifunza kumtumaini sana Yehova, ambaye ni “ngome siku ya taabu.”—Nahumu 1:7.

Y.F.R., Kolombia

Mimi ni mhubiri wa wakati wote. Muda mfupi baada ya kuhamia eneo jipya, niligundua kwamba nina ugonjwa wa sukari. Maelezo yenu kuhusu hisia zenye kutatanisha zinazomkumba mtu aliye na ugonjwa wa kudumu yalikuwa mazuri ajabu! Makala hizo zilinisaidia kuchunguza upya hali yangu kwa usawaziko zaidi na kufanya marekebisho maishani.

L. A., Italia

Sisi si wagonjwa, lakini kanuni zilizo katika makala hiyo zimetusaidia sana kushughulikia tatizo fulani tulilo nalo. Kama kawaida, gazeti hilo lilikuwa jibu kwa sala hususa tuliyotoa.

R. P. na L. P., Sri Lanka

Majuma kadhaa yaliyopita, niliambiwa kwamba nina uvimbe hatari wa ini. Waweza kuwazia jinsi habari hiyo ilivyoniathiri, kwa sababu kabla ya hapo nilikuwa mwenye afya. Hivi leo nilipokea toleo la Januari 22, nikasoma makala zote kwa hamu. Makala hizo zilieleza hisia zangu, mawazo yangu, na mashaka yangu yote, na wakati huohuo, zilinisaidia kuwa na maoni yanayofaa.

J. E., Hispania

Simulizi Halisi la Maisha Ninaandika kuhusu simulizi lenye kugusa hisia la Bill na Rose Meiners, lenye kichwa “Kushinda Vipingamizi kwa Kuweka Miradi.” (Januari 22, 2001) Inatia moyo kujua kwamba wamevumilia kwa zaidi ya miaka 50. Masimulizi haya ya maisha hugusa hisia za ndani sana za moyo. Ningependa kuwajulisha Bill na Rose kwamba ninatoa sala hususa kwa ajili yao.

V. G., Italia

Simulizi hilo la mwanamume huyo ambaye amekuwa akipambana na ugonjwa kwa zaidi ya miaka 50 lilitutia moyo sana sisi tulio wazima. Lilinisaidia kung’amua kwamba nikiwa mwanamke mwenye afya nzuri, ninapaswa kuthamini sana hali yangu ya kiafya na kutumia maisha yangu kikamili zaidi.

P. V., Jamhuri ya Cheki

Mama yangu amekuwa mgonjwa kwa karibu miaka 20. Hivi sasa amekata tamaa na angependa sana kupata kitulizo. Nilimsomea makala hiyo, lakini nilifaidika pia. Sasa naelewa kwa nini anashuka moyo mara nyingi.

G.O.A., Nigeria

Bill na Rose, na watu wengine wengi ambao hawana budi kuishi na ugonjwa hatari ni wajasiri sana! Nafikiri sisi ambao hatuna ugonjwa mbaya tunaweza kujifunza kutokana na kielelezo chao. Bill na Rose, endeleeni kuvumilia! Mnatuwekea kielelezo kizuri!

I. S., Ujerumani

Miadi ya Kijinsia Kati ya Matineja Nina umri wa miaka 15, na nilifurahia kusoma makala “Vijana Huuliza . . . Vipi Ikiwa Wazazi Wangu Wanafikiri Mimi Ni Mchanga Mno Kuweka Miadi ya Kijinsia?” (Januari 22, 2001) Watoto shuleni huniuliza iwapo mimi hufanya ngono na watu wa jinsia yangu kwa sababu siweki miadi ya kijinsia. Kwa kawaida mimi huwaambia kwamba wazazi wangu hawaniruhusu kuweka miadi ya kijinsia, lakini sikuzote nimetaka kuwajibu vizuri zaidi. Baada ya kusoma makala hiyo, sasa ninajua jinsi ya kujibu maswali yao. Asanteni sana kwa kutufikiria sisi matineja.

C. G., Marekani