Hamia kwenye habari

Hamia kwenye yaliyomo

Daraka Muhimu la Akina Baba

Daraka Muhimu la Akina Baba

 Daraka Muhimu la Akina Baba

“IDADI inayoongezeka ya wanaume vijana wanataka kutimiza kikamili daraka la kulea watoto wao. Asilimia 82 ya wanaume walio na umri wa kati ya miaka 21 hadi 39 walichagua ratiba ya kazi iliyowaruhusu kutumia wakati mwingi zaidi pamoja na familia zao,” lasema gazeti la Toronto Star la Kanada kuhusiana na uchunguzi wa hivi majuzi wa Chuo Kikuu cha Harvard. Kwa mujibu wa uchunguzi huo uliohusisha wanaume na wanawake 1,008 wa Marekani walio kati ya umri wa miaka 21 hadi 65 na zaidi, asilimia 71 ya wanaume vijana waliohojiwa walisema kwamba “wangekubali kukatwa mshahara ili watumie wakati mwingi zaidi pamoja na familia zao.”

Kwa nini akina baba wengi wanataka kutumia wakati mwingi zaidi pamoja na watoto wao? David Blankenhorn, mmoja wa waanzilishi wa shirika la Miradi ya Kitaifa ya Akina Baba, linalowahimiza akina baba wachukue daraka lao kwa uzito, alisema kwamba katika uchunguzi uliofanywa kuhusiana na wanaume 1,600 wa Marekani mnamo mwaka wa 1994, asilimia 50 walisema kwamba baba zao hawakuwategemeza kihisia-moyo walipokuwa wachanga. Akina baba wengi leo hawataki hilo litukie tena.

Akina baba wanaotumia wakati mwingi pamoja na watoto wao wanaweza kuwaathiri kwa njia nzuri. Lilipokuwa likizungumzia uchunguzi uliochapishwa na Wizara ya Afya na Huduma za Jamii ya Marekani, gazeti la The Toronto Star lilisema kwamba akina baba wanapokula pamoja na watoto wao, kutembea nao, na kuwasaidia kazi za shule, ‘watoto na vijana waliobalehe huwa na matatizo machache ya kitabia, hushirikiana sana pamoja na marafiki na hufanya vyema sana shuleni.’

Mambo yaliyotajwa hapa juu yanaonyesha mpango wa kuwalea watoto ulioandikwa miaka elfu tatu iliyopita, ambao unatumika leo sawa na vile ulivyotumika wakati huo. Mwanzilishi wa familia aliwaagiza hasa akina baba wahusike sana katika kuwalea watoto wao. (Waefeso 3:14, 15; 6:4) Akina baba walishauriwa wawafundishe watoto wao kumpenda Mungu kutoka moyoni na wawaeleze kuhusu kanuni na amri za Mungu. Mungu aliwaambia wafanye hivyo ‘waketipo katika nyumba yao, na watembeapo njiani, na walalapo, na waondokapo.’—Kumbukumbu la Torati 6:7.

Kulea mtoto si kazi ya mtu mmoja. Biblia huwashauri hivi watoto: “Yasikilize mafundisho ya baba yako, wala usiiache sheria ya mama yako.” (Mithali 1:8) Daraka la baba ni muhimu. Latia ndani kumuunga mkono na kumheshimu mama na kushiriki katika kazi za kulea watoto. Pia, daraka hilo lahusisha kutumia wakati kuwasomea watoto na kuzungumza nao. Hilo hutimiza uhitaji muhimu wa kihisia-moyo wa watoto.

Bila shaka, Biblia ndicho chanzo chenye kutegemeka zaidi cha ushauri na kanuni timamu kwa familia nzuri. Baba anayeiandalia familia yake mahitaji ya kiroho, ya kihisia-moyo, na ya kimwili kwa ukawaida anatimiza daraka alilopewa na Mungu.