Hamia kwenye habari

Hamia kwenye yaliyomo

Kutoka kwa Wasomaji Wetu

Kutoka kwa Wasomaji Wetu

 Kutoka kwa Wasomaji Wetu

Hifadhi ya Wanyama na Mazingira Asanteni kwa ajili ya makala “Pantanal—Hifadhi Yenye Kuvutia Sana.” (Septemba 8, 1999) Niliambatana na mwandikaji katika mawazo yangu kwenye sehemu hiyo yenye kuvutia sana, huku nikifurahia amani na utulivu uliopo. Nasubiri kwa hamu sana wakati ambapo Mungu atatokeza hali kama hizo katika sayari nzima.

M. A., Italia

Ugonjwa wa Kisukari Nimemaliza tu kusoma kwa mara ya pili yale makala “Binti Yenu Ana Ugonjwa wa Kisukari!” (Septemba 22, 1999) Miezi kumi iliyopita nilijulishwa kwamba nina Ugonjwa wa Kisukari Aina ya Kwanza. Kwa muda mrefu nilikuwa na afya bora, nilipokuwa painia, mweneza-evanjeli wa wakati wote, tangu umri wa miaka 17. Nimehitaji kufanya mabadiliko mengi maishani katika miezi michache iliyopita. Imenilazimu kutumia pampu ya insulini, na kuacha upainia kwa sababu ya gharama za kushughulikia ugonjwa wangu. Lakini nawashukuru kwa sababu ya kuchapa makala kama hizo zinazotukumbusha kwamba wengine wana matatizo yayo hayo.

B. F., Marekani

Mwanangu mwenye umri wa miaka minne ameugua ugonjwa wa kisukari tangu alipokuwa na umri wa miaka miwili. Tunajua vyema hisia za Sonya na familia yake kama zilivyoonyeshwa katika makala hiyo. Tunashukuru kwa sababu ya udugu wa Kikristo wenye upendo ambao umetuwezesha kuvumilia.

C. R., Moldova

Kwa muda fulani nimekuwa nikitarajia kusoma habari yenye kutia moyo juu ya ugonjwa huu. Nina umri wa miaka 17 nami nimeugua kisukari tangu nilipokuwa na umri wa miaka 5. Nyakati nyingine, imekuwa vigumu sana kukabiliana na maradhi hayo. Lakini nilifurahi sana kupokea makala sahili ninayoweza kushiriki na familia yangu na marafiki wangu wote itakayojibu maswali yao na kuwasaidia kuelewa zaidi ugonjwa wa kisukari.

K. W., Kanada

Je, Ni Hatari? Nilisoma makala nzuri sana yenye kichwa “Wanawake Wamechangia Sana.” (Juni 22, 1999) Nilishangaa kidogo kuona kwamba wanawake waliofanya kazi ya ujenzi hawakuvalia kifaa chochote cha kulinda macho.

R. L., Marekani

Twawahakikishia wasomaji wetu kwamba wafanyakazi hawa wa kujitolea huvalia miwani ya kulinda macho wanapofanya kazi yao kihalisi. Waliombwa wajitayarishe kupigwa picha wakiwa hivyo—bila miwani ili nyuso zao zenye shangwe zionekane vyema.—Mhariri.

Ukosefu wa Haki Ninataka kuwashukuru kwa ajili ya makala “Vijana Huuliza . . . Naweza Kuvumiliaje Ukosefu wa Haki?” (Septemba 22, 1999) Hata ingawa mimi ni mchanga, nimetendwa isivyo haki na kukabili jeuri sana hivi kwamba nina maumivu makali ya kihisia-moyo. Jambo hilo limefanya iwe vigumu kwangu kuendelea na upainia, ambao nimeufanya kwa miaka minane sasa. Nilitiwa moyo na sentensi iliyosema: “Fanya yote uwezayo kuvumilia.” Maneno hayo yanadhihirisha upendo, nami nawashukuru kwa moyo wangu wote.

A. G., Italia

Muziki Nimekuwa mzee katika kutaniko la Kikristo kwa miaka mingi sasa na daima mimi hupendezwa na wachanga. Lakini hivi karibuni nimevunjika moyo, kwa sababu shauri ambalo nimekuwa nikitoa kuhusu hatari za namna fulani za muziki wa kisasa limepuuzwa. Hata hivyo, ule mfululizo “Muziki—Ni Wenye Uvutano Zaidi Kuliko Unavyoweza Kuwazia” (Oktoba 8, 1999) ulikuja kwa wakati wake. Nukuu kutoka katika vyanzo vingine kuhusu athari mbaya za muziki fulani zilikuwa bora kabisa. Nitazungumza na wachanga mambo hayo.

D. H., Bolivia

Nikiwa mwimbaji na mwalimu wa muziki katika shule ya msingi, nilipendezwa sana na makala yenu ya karibuni juu ya muziki. Asanteni!

K. F., Marekani