Maswali Kutoka kwa Wasomaji
Mwandikaji wa Methali 30:18, 19 alisema kwamba “njia ya mwanamume pamoja na mwanamwali” ‘ilizidi ufahamu.’ Alikuwa anamaanisha nini?
Maneno hayo yamewachanganya watu wengi, kutia ndani wasomi. Mistari hiyo inasema hivi katika Tafsiri ya Ulimwengu Mpya: “Kuna mambo matatu yanayozidi ufahamu wangu [au, “ambayo ni ya ajabu sana kwangu,” maelezo ya chini], na manne ambayo siyaelewi: Njia ya tai angani, njia ya nyoka juu ya mwamba, njia ya meli baharini, na njia ya mwanamume pamoja na mwanamwali.”—Met. 30:18, 19.
Awali, tulielewa kwamba maneno “njia ya mwanamume pamoja na mwanamwali” yalikuwa yanafafanua jambo baya. Kwa nini? Muktadha wa andiko hilo unataja mambo yasiyofaa ambayo hayasemi kamwe “inatosha.” (Met. 30:15, 16) Na mstari wa 20 unamtaja “mwanamke mzinzi” ambaye anadai kwamba hajafanya kosa lolote. Hivyo, tulifikia mkataa kwamba kama tai angani, nyoka juu ya mwamba, au njia ya meli ya kale baharini, huenda mwanamume akafanya jambo bila kuacha ushahidi wowote. Kwa msingi huo, tulielewa kwamba maneno “njia ya mwanamume pamoja na mwanamwali” yalirejelea jambo baya, yaani, mwanamume kijana mjanja ambaye huenda akamshawishi mwanamke kijana asiye na uzoefu bila yeye kutambua kinachoendelea.
Hata hivyo, tuna sababu nzuri ya kufikia mkataa kwamba mistari hiyo inazungumzia jambo zuri. Mwandikaji alikuwa tu akistaajabia mambo hayo yaliyotajwa.
Kiebrania cha awali kinaunga mkono wazo la kwamba mistari hiyo inamaanisha jambo zuri. Kulingana na kitabu Theological Lexicon of the Old Testament, neno la Kiebrania lililotafsiriwa “yanayozidi ufahamu wangu” kwenye Methali 30:18 “linaonyesha jambo ambalo mtu . . . analiona kuwa la pekee sana, lisilowezekana, au hata lenye kustaajabisha.”
Profesa Crawford H. Toy wa Chuo Kikuu cha Harvard nchini Marekani, alifikia pia mkataa kwamba mistari hiyo ya Biblia haizungumzii jambo baya. Alisema hivi: “Jambo kuu hapa ni jinsi ambavyo mambo yaliyotajwa ni yenye kustaajabisha.”
Hivyo, inapatana na akili kusema kwamba maneno yaliyoandikwa kwenye Methali 30:18, 19 yanafafanua mambo ambayo kwa kweli ni yenye kustaajabisha, na hata yanazidi ufahamu wetu. Kama mwandikaji wa Biblia, tunastaajabishwa na jinsi tai anavyopaa, jinsi nyoka asiye na miguu anavyoweza kuteleza juu ya mwamba, jinsi meli nzito inavyoweza kusafiri juu ya bahari, na jinsi mwanamume kijana na mwanamke kijana wanavyoweza kupendana na kuishi maisha yenye furaha pamoja.
