“Nilikubaliana kabisa na sheria za wazazi wangu nilipokuwa na umri wa miaka 15, lakini sasa nina miaka 19 na ninahisi kwamba ninapaswa kuwa na uhuru zaidi.”​—Sylvia.

 Je, maoni yako ni kama ya Sylvia? Ikiwa ndivyo, makala hii itakusaidia kuzungumzia suala hilo pamoja na wazazi wako.

•  Unachopaswa kujua

•  Unachoweza kufanya

•  Vijana wenzako wanasema nini

 Kabla ya kuzungumza na wazazi wako kuhusu sheria zao, fikiria yafuatayo:

•  Maisha bila sheria ni vurugu. Fikiria kuhusu barabara kubwa iliyo na magari mengi. Namna gani ikiwa hakungekuwa na alama au ishara za barabarani, hakuna taa za kuongoza magari, wala hakuna kiwango cha mwendo ambao magari yanapaswa kwenda? Sheria za nyumbani​—sawa na sheria za barabarani​—zinasaidia kudumisha utaratibu.

•  Sheria zinathibitisha wazazi wako wanakujali. Ikiwa hawangekuwekea sheria, hilo lingemaanisha kwamba hawajali yanayokupata. Na hilo lingeonyesha wao si wazazi wazuri.

 JE, ULIJUA? Wazazi pia wanapaswa kutii sheria! Ikiwa huamini hilo, soma Mwanzo 2:​24; Kumbukumbu la Torati 6:​6, 7; Waefeso 6:4; 1 Timotheo 5:8.

 Hata hivyo, utafanya nini ikiwa bado unahisi kwamba sheria za wazazi wako si za haki?

 Kabla ya kuzungumzia jambo hili, fikiria. Je, kwa kawaida wewe unatii sheria za wazazi wako? Ikiwa mara nyingi wewe si mtiifu, basi huenda huu usiwe wakati mzuri wa kuomba uongezewe uhuru. Badala yake, ona makala yenye kichwa, “Ninaweza Kufanya Nini Ili Wazazi Wangu Waniamini?”

 Ikiwa kwa kawaida unatii sheria za wazazi wako, tayarisha kile ambacho ungependa kuwaambia. Kupanga mawazo yako mapema kutakusaidia kuchunguza ikiwa ombi lako linapatana na akili. Kisha, waombe wazazi wako watenge wakati na mahali ambapo nyote mnaweza kuzungumza kwa utulivu na starehe. Mtakapozungumza, kumbuka mambo yafuatayo:

 Uwe mwenye heshima. Biblia inasema hivi: “Neno kali huchochea hasira.” (Methali 15:1) Kwa hiyo jikumbushe hivi: Nikibishana na wazazi wangu au kuwalaumu kwa kutonitendea kwa haki, mazungumzo yatakwenda mrama.

 “Kadiri ninavyowaheshimu wazazi wangu, ndivyo wanavyoniheshimu. Ni rahisi zaidi kwetu kukubaliana tunapoheshimiana.”​—Bianca, 19.

 Sikiliza. Biblia inatuambia tuwe ‘wepesi wa kusikia, si wepesi wa kusema.’ (Yakobo 1:19) Kumbuka, unazungumza na wazazi wako, huwatolei hotuba, kwa hiyo wasikilize pia.

 “Kadiri tunavyokua, huenda tukahisi tunajua mengi zaidi kuliko wazazi wetu, lakini hilo si kweli hata kidogo. Tunapaswa kukubali mashauri yao.”​—Devan, 20.

 Uwe na hisia-mwenzi. Jaribu kuona mambo kama wazazi wako wanavyoyaona. Fuata ushauri wa Biblia wa ‘kuangalia, si faida zako mwenyewe, bali pia faida za wazazi wako.’​—Wafilipi 2:4.

 “Badala ya kufikiri kwamba wazazi wangu wako upande wangu, nilikuwa nikiona kuwa wako dhidi yangu. Lakini sasa ninatambua kwamba walikuwa wakijifunza jinsi ya kuwa wazazi wazuri nami nilikuwa nikijifunza kuwa mtu mzima. Mambo yote walifanya kwa sababu ya upendo”​—Joshua, 21.

 Pendekeza suluhisho. Kwa mfano, tuseme kwamba wazazi wako wameweka sheria: unataka kwenda kwenye karamu, lakini itakuchukua saa nzima kufika huko, kwa hiyo, wanakuzuia usiende. Chunguza uone hangaiko lao ni nini​—je, ni umbali, au ni karamu yenyewe?

•   Ikiwa ni umbali, je, watabadili maoni yao ikiwa utaambatana na rafiki ambaye ni dereva mzuri?

•   Ikiwa ni karamu, je, kuna uwezekano kwamba watakuruhusu wakijua ni nani watakaokuwepo na ni nani atakayeisimamia?

 Kumbuka kuwa na heshima unapozungumza na kusikiliza kwa subira kile ambacho wazazi wako wanasema. Onyesha kwamba ‘unamheshimu baba yako na mama yako’ kwa maneno na mtazamo wako. (Waefeso 6:​2, 3) Je, watabadili maoni yao? Labda. Au labda hawatabadili. Vyovyote vile . . .

 Kubali uamuzi wa wazazi wako kwa heshima. Hiyo ni hatua muhimu ambayo mara nyingi husahaulika. Maombi yako yasipotimizwa, kuanza kubishana na wazazi wako kutafanya iwe vigumu kuzungumza nao tena, na itakuwa vigumu kupata uhuru zaidi. Kwa upande mwingine, ukikubali uamuzi wao, huenda wakakupunguzia kidogo sheria walizoweka.