Wanafunzi wengi sasa wanasoma wakiwa katika aina tofauti ya “darasa”—nyumbani mwao. Ikiwa wewe unapitia hali hiyo, unaweza kufanya nini ili ufanikiwe? Hapa kuna mapendekezo kadhaa. a

•  Madokezo matano yatakayokusaidia

•  Vijana wenzako wanasema nini

•   Panga ratiba yako. Jaribu kufuata ratiba yako vizuri, kama jinsi ambavyo ungefanya shuleni. Tenga muda hususa wa kufanya kazi za shule, nyumbani au kazi nyingine muhimu. Unaweza kurekebisha ratiba yako kulingana na hali.

   Kanuni ya Biblia: “Mambo yote na yatendeke. . . kwa utaratibu.”—1 Wakorintho 14:40, maelezo ya chini.

   “Tumia siku yako kama vile uko shuleni tu. Unapaswa kumaliza mambo kwa kipindi fulani cha wakati.”—Katie.

   Jambo la kufikiria: Kwa nini ni vizuri kuandika ratiba yako na kuibandika mahali ambapo ni rahisi kuiona?

•   Jitie nidhamu. Kutimiza majukumu muhimu zaidi ni sehemu ya ukuzi—hata kama hujisikii kufanya hivyo. Usiahirishe mambo!

   Kanuni ya Biblia: “Iweni wenye bidii, msiwe wavivu katika kazi zenu.”—Waroma 12:11, maelezo ya chini.

   “Changamoto kubwa zaidi ni kuwa na uwezo wa kujizuia. Ni rahisi kujiambia, ‘Nitafanya kazi za shule baadaye.’ Halafu bado hufanyi kazi hizo, na hatimaye kazi zinarundamana.”—Alexandra.

   Jambo la Kufikiria: Kufanya kazi zako za shule sehemu ileile na muda uleule kila siku kunawezaje kukusaidia kusitawisha sifa ya kujizuia?

•   Tenga eneo la kusomea. Andaa kila kitu utakachohitaji. Tengeneza mazingira ya kusomea ili yawe yanayofaa lakini si yenye kustarehesha sana kiasi cha kukufanya ulale. Uko hapo ili kufanya kazi si kusinzia! Ikiwa huwezi kuwa na eneo hususa la kufanya kazi zako za shule, labda jikoni au chumba cha kulala kunaweza kuwa sehemu yako ya kusomea wakati wa vipindi vya masomo ya shuleni.

   Kanuni ya Biblia: “Mipango ya wenye bidii hakika huleta mafanikio.”—Methali 21:5.

   “Weka mbali mpira na michezo ya kompyuta, zima simu yako, na weka mbali gitaa. Ni muhimu kuweka mbali vikengeusha fikira.”—Elizabeth

   Jambo la kufikiria: Unaweza kufanya marekebisho gani ili eneo lako la kusomea lifae?

•   Jizoeze kukaza fikira. Kazia fikira somo unalojifunza wakati huo, usifanye mambo mawili kwa wakati mmoja. Ukijaribu kufanya mambo mengi kwa wakati mmoja kuna uwezekano mkubwa zaidi wa kufanya makosa na inaelekea utatumia muda mrefu zaidi kumaliza kazi yako.

   Kanuni ya Biblia: “[Tumia] vizuri kabisa wakati wenu.”—Waefeso 5:16.

   “Ilikuwa vigumu sana kukazia fikira jambo nilipokuwa na simu yangu. Nilipoteza muda mwingi kufanya mambo yasiyo ya maana.”—Olivia.

   Jambo la kufikiria: Je, unaweza kuongeza pole kwa pole muda unaotumia kukazia fikira kazi moja?

•   Pumzika. Nyoosha miguu kidogo kwa kutembea, endesha baiskeli yako, au fanya mazoezi. Kufanya jambo unalopenda kunaweza kukuchangamsha. Kitabu School Power kinasema hivi: “Fanya kazi yako kwanza, muda wa kupumzika utakuburudisha ikiwa umetimiza kazi zako.”

   Kanuni ya Biblia: “Ni afadhali konzi moja ya pumziko kuliko konzi mbili za kazi ngumu na kukimbiza upepo.”—Mhubiri 4:6.

   “Kwa kawaida shuleni unaweza kujifunza kucheza ala fulani ya muziki au kujifunza kuchora. Sikutambua jinsi nilivyofurahia mambo hayo hadi nilipokosa kuyafanya. Ni vizuri kufanya mambo fulani yanayokufurahisha kama sehemu ya masomo yako ya shule.”—Taylor.

   Jambo la kufikiria: Unaweza kufanya nini wakati wa mapumziko ili ufurahie kazi yako ya shule bila kukengeushwa?