Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

Chanzo cha Halloween—Biblia Inasema Nini?

Chanzo cha Halloween—Biblia Inasema Nini?

Jibu la Biblia

Biblia haitaji Halloween. Hata hivyo, chanzo cha kale cha Halloween na desturi zake za leo zinaonyesha kwamba ni sherehe inayohusiana na mafundisho ya uwongo kuhusu wafu na roho zisizoonekana, au roho waovu.—Tazama “Historia na desturi za Halloween.”

Biblia inaonya hivi: “Asipatikane ndani yenu yeyote . . . anayeuliza habari kutoka kwa mizuka au roho, au anayeita wafu.” (Kumbukumbu la Torati 18:10-12, The Jerusalem Bible) Ingawa wengine huona kwamba Halloween ni sherehe isiyo na madhara, Biblia inaonyesha kwamba mambo yanayohusiana na sherehe hiyo yanadhuru. Katika 1 Wakorintho 10:20, 21, Biblia inasema hivi: “Sipendi ninyi kushirikiana na mashetani. Hamwezi kunywea kikombe cha Bwana na kikombe cha mashetani.”Union Version.

Historia na desturi za Halloween

  1. Samhain: Kitabu The World Book Encyclopedia kinasema Halloween ilitokana na “sherehe ya kale ya wapagani iliyosherehekewa na Waselti zaidi ya miaka 2,000 iliyopita.” “Waselti waliamini kwamba wafu wanaweza kutembea katikati ya watu walio hai. Wakati wa sherehe ya Samhain, walio hai wangeweza kuwatembelea wafu.” Hata hivyo, Biblia inafundisha wazi kwamba wafu “hawajui lolote kamwe.” (Mhubiri 9:5) Hivyo basi, hawawezi kuwasiliana na walio hai.

  2. Nguo zinazovaliwa wakati wa Halloween, peremende, na udanganyifu au zawadi za Halloween: Kulingana na kitabu Halloween—An American Holiday, An American History, baadhi ya Waselti walivalia mavazi meuzi yanayotisha ili roho waovu wanaozunguka-zunguka wafikiri kwamba wako pamoja nao na hivyo kuwaacha. Wengine waliwatuliza roho waovu kwa kuwapa peremende. Katika enzi za kati barani Ulaya, makasisi Wakatoliki walikubali desturi za wapagani na kuwahimiza wafuasi wao waende nyumba kwa nyumba wakiwa wamevalia mavazi fulani na kuomba zawadi ndogo-ndogo. Lakini Biblia haikubali ibada ya Mungu ichanganywe na desturi za ibada ya uwongo.2 Wakorintho 6:17.

  3. Mizuka, watu wanaonyonya damu, watu-mbweha, wachawi, na mazimwi: Hawa wamehusianishwa kwa muda mrefu na ulimwengu wa roho waovu. (Halloween Trivia) Biblia inasema wazi kwamba tunapaswa kupinga majeshi ya roho waovu, hatupaswi kusherehekea pamoja nao.Waefeso 6:12.

  4. Maboga ya Halloween na taa zenye sura ya binadamu zilizotengenezwa kwa maboga: Katika enzi za kati nchini Uingereza, “waombaji walienda nyumba kwa nyumba kuomba chakula ili wasali kwa ajili ya wafu,” na walibeba “mishumaa iliyotiwa ndani ya tanipu, na mishumaa hiyo ilionyesha nafsi iliyokwama toharani.” (Halloween—From Pagan Ritual to Party Night) Wengine wanasema kwamba taa hizo zilitumiwa kufukuza roho waovu. Katika miaka ya 1800, kule Amerika Kaskazini, maboga yalianza kutumiwa badala ya tanipu kwa kuwa yalipatikana kwa wingi na ilikuwa rahisi kuondoa sehemu ya ndani. Desturi za Halloween zinategemea imani ambazo hazipatani na Biblia kama vile kutokufa kwa nafsi, toharani, na kusali kwa ajili wafu.Ezekieli 18:4.

Pata Kujua Mengi Zaidi

Ukweli Kuhusu Halloween

Pata kujua mahali pasipofaa ambapo Halloween na sikukuu nyingine zinazofanana na hiyo zilipotoka.

Je, Tusherehekee Sikukuu?

Sikukuu zinazopendwa na watu wengi katika eneo unaloishi zilianzaje? Huenda jibu la swali hilo likakustaajabisha.