Jibu la Biblia

 Kitabu cha Ufunuo kinamfafanua “mwanamke” ambaye ni “kahaba mkubwa” na ambaye ana jina ambalo ni “fumbo: ‘Babiloni Mkubwa.’” (Ufunuo 17:1, 3, 5) Mwanamke huyo anawakilisha dini zote za uwongo ambazo ‘zimeibadili kweli ya Mungu kwa ajili ya uwongo.’ a (Waroma 1:25) Ingawa dini hizo hutofautiana katika baadhi ya mambo, zote huongoza watu mbali na ibada ya Mungu wa kweli, Yehova.​—Kumbukumbu la Torati 4:35.

Mambo Yanayomtambulisha Babiloni Mkubwa

1.   Babiloni Mkubwa ni jina la mfano. Kitabu cha Ufunuo kimeandikwa “kwa njia ya ishara”. Kwa hiyo, inafaa kusema kwamba Babiloni Mkubwa ni jina la mfano, na si mwanamke halisi. (Ufunuo 1:1) Kwa kuongezea, ‘anakaa juu ya maji mengi’ ambayo yanawakilisha “watu na umati na mataifa na lugha.” (Ufunuo 17:1, 15) Haiwezekani kwa mwanamke halisi kufanya jambo hilo.

2.   Babiloni Mkubwa ni milki ya ulimwenguni pote. Anatajwa kuwa “jiji kubwa lililo na ufalme juu ya wafalme wa dunia.” (Ufunuo 17:18) Kwa hiyo, ana uvutano katika mataifa yote.

3.   Babiloni Mkubwa ni shirika la kidini, si la kisiasa wala la kijamii. Babiloni la kale lilikuwa jiji lililojaa mambo ya kidini, na ambalo lilijulikana kwa “maapizo” yake ya kuwasiliana na pepo na “ulozi.” (Isaya 47:1, 12, 13; Yeremia 50:1, 2, 38) Kwa kweli, wakaaji wa jiji hilo walishiriki katika ibada ya uwongo ambayo ilipingana na Mungu wa Kweli, Yehova. (Mwanzo 10:8, 9; 11:2-4, 8) Watawala wa Babiloni walijiinua juu ya Yehova na ibada yake. (Isaya 14:4, 13, 14; Danieli 5:2-4, 23) Vivyo hivyo, Babiloni Mkubwa anajulikana kwa mazoea yake ya “kuwasiliana na pepo.” Hilo linamtambulisha kuwa shirika la kidini.​—Ufunuo 18:23

    Babiloni Mkubwa hawezi kuwa shirika la kisiasa, kwa sababu “wafalme wa dunia” wanaomboleza uharibifu wake. (Ufunuo 17:1, 2; 18:9) Pia yeye si muungano maarufu wa kibiashara, kwa sababu Biblia inamtofautisha na “wanabiashara wa dunia.”​—Ufunuo 18:11, 15.

4. Picha hii ilipigwa kwa hisani ya Jumba la Makumbusho la Uingereza

     Dini ya uwongo inapatana kabisa na ufafanuzi wa Babiloni Mkubwa. Badala ya kuwafundisha watu jinsi ya kumkaribia Mungu wa kweli, Yehova, dini ya uwongo huwaongoza watu kuabudu miungu mingine. Biblia hutaja jambo hilo kuwa “uasherati” wa kiroho. (Mambo ya Walawi 20:6; Kutoka 34:15, 16) Dini nyingi za uwongo zinaendelea kufundisha imani ambazo zilikuwa zikifundishwa katika jiji la kale la Babiloni, kutia ndani utatu, kutokufa kwa nafsi, na matumizi ya sanamu katika ibada. Dini hizi huchanganya ibada yao na mambo ya ulimwengu. Biblia hurejelea ukosefu huu wa uaminifu kuwa uzinzi wa kiroho.​—Yakobo 4:4.

    Utajiri na kujionyesha kwa dini ya uwongo kunapatana kabisa na jinsi Biblia inavyomfafanua Babiloni Mkubwa kuwa “amevikwa nguo za rangi ya zambarau na nyekundu,” na “alikuwa amepambwa dhahabu na jiwe la thamani na lulu.” (Ufunuo 17:4) Babiloni Mkubwa ndiye chanzo cha mafundisho na matendo yasiyomheshimu Mungu yanayotajwa kuwa “machukizo ya dunia.” (Ufunuo 17:5) Washiriki wa dini ya uwongo wanafafanuliwa kuwa “watu na umati na mataifa na lugha” wanaomuunga mkono Babiloni Mkubwa.​—Ufunuo 17:15.

 Babiloni Mkubwa ndiye kisababishi cha vifo vya “wale wote ambao wameuawa juu ya dunia.” (Ufunuo 18:24) Historia inaonyesha kwamba dini ya uwongo imechochea vita na matendo ya kigaidi na pia imeshindwa kuwafundisha watu ukweli kumhusu Mungu mwenye upendo, Yehova. (1 Yohana 4:8) Jambo hili limesababisha umwagaji mkubwa wa damu.

Mungu ana maoni gani kuhusu Babiloni Mkubwa?

 Machoni pa Mungu, dhambi za Babiloni Mkubwa “zimekusanyika pamoja mpaka mbinguni.” (Ufunuo 18:4, 5) Mungu anakasirishwa na dini ya uwongo kwa kumwakilisha kwa njia isiyofaa na kwa kuwatendea isivyofaa wafuasi wake.

Ni nini kitakachoipata Babiloni Mkubwa?

 Biblia inasema kwamba “Mungu ametangaza hukumu” juu ya Babiloni Mkubwa. (Ufunuo 18:20) Kwa kutumia lugha ya mfano, Biblia inatabiri wakati ambapo Mungu atazikomesha dini za uwongo. (Ufunuo 18:8) Atamchochea mnyama-mwitu mwenye rangi nyekundu—anayewakilisha mashirika ya kisiasa yenye nguvu—kuishambulia dini ya uwongo na kuiharibu kabisa. (Ufunuo 17:16, 17) ‘Babiloni lile jiji kubwa litatupwa chini kwa kasi sana, nalo halitapatikana tena.’ (Ufunuo 18:21) Kwa sababu hiyo, ni lazima wale wanaotaka kumpendeza Mungu ‘watoke kwake,’ na hivyo kujiepusha na dini ya uwongo.​—2 Wakorintho 6:14-17.