Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

Nataka Kuacha Shule

Nataka Kuacha Shule

Unahitaji kufikiria mambo yafuatayo

Ni kiwango gani cha chini zaidi cha elimu kilichowekwa na sheria katika eneo lenu? Umefikia kiwango hicho? Ukipuuza shauri la Biblia la ‘kujitiisha kwa mamlaka zilizo kubwa’ na kukatiza masomo yako kabla ya kufikia kiwango kilichowekwa na sheria, basi unaacha shule.—Waroma 13:1.

Umetimiza malengo yako kuhusiana na elimu? Ungependa elimu ikusaidie kutimiza nini? Hujui? Unahitaji kujua! Ikiwa hujui, utakuwa kama mtu anayesafiri katika gari-moshi lakini hajui anakoenda. Kwa hiyo, keti chini na wazazi wako, mzungumzie sehemu iliyo hapa chini yenye kichwa “Malengo Yangu ya Kielimu.” Ukikatiza masomo yako kabla ya kutimiza malengo yako kuhusiana na elimu, na ambayo wewe na wazazi wako mmeweka, basi unaacha shule.

Kwa nini unataka kuacha shule? Huenda baadhi ya sababu zikawa kuitegemeza familia yenu kiuchumi au kufanya utumishi wa kujitolea. Sababu za kibinafsi zinaweza kuwa ni kuepuka mitihani au kazi za shule. Tatizo ni kutambua sababu hasa inayokuchochea, na ikiwa ni sababu nzuri au ina ubinafsi. Ikiwa unaacha shule kwa sababu tu unataka kuepuka matatizo, utashangaa.

Kuacha shule ni kama kuruka kutoka kwenye gari-moshi kabla ya kufika unakoenda

Kuacha shule ni kama kuruka kutoka katika gari-moshi kabla ya kufika unakoenda. Huenda safari yenyewe ikawa yenye kuchosha na huenda hata wasafiri wasiwe wenye urafiki. Lakini ukiruka na kutoka, hutafika unakoenda, na huenda ukaumia. Vivyo hivyo, ukiacha shule, haitakuwa rahisi kwako kupata kazi. Na hata ikiwa utapata, huenda ukapata mshahara au malipo ya chini kuliko yale ambayo ungepata kama ungemaliza masomo yako.

Badala ya kuacha shule, jifunze kushughulikia kwa subira matatizo unayokabili shuleni. Ukifanya hivyo, mwishowe utagundua kwamba matokeo yatakuwa mazuri kwako.

Malengo Yangu ya Kielimu

Kusudi la msingi la elimu ni kukutayarisha kupata kazi itakayokusaidia na kuisaidia familia ambayo huenda ukawa nayo wakati ujao. (2 Wathesalonike 3:10, 12) Umeamua ni aina gani ya kazi unayotaka na jinsi wakati unaotumia shuleni unavyoweza kukusaidia kujitayarisha kwa ajili ya kazi hiyo? Ili kukusaidia kujua ikiwa elimu yako inakuelekeza mahali panapofaa, jibu maswali yafuatayo:

  • Nina uwezo gani? (Kwa mfano, wewe hushirikiana vizuri na watu? Wewe hufurahia kufanya kazi kwa mikono yako au kuunda au kurekebisha vitu? Unajua kuchunguza na kutatua matatizo?)

  • Ni kazi za aina gani zitakazoniwezesha kutumia uwezo wangu?

  • Ni kazi gani za kuajiriwa zinazopatikana mahali ninakoishi?

  • Ni masomo gani sasa yanayonitayarisha kwa ajili ya kupata kazi wakati ujao?

  • Ni masomo gani ninayoweza kuchagua yatakayonisaidia kufikia malengo yangu kwa njia inayofaa zaidi?

Kumbuka, lengo lako ni kufuzu ukiwa na elimu unayoweza kutumia. Kwa hiyo, usipite mipaka na kuwa mwanafunzi sikuzote, sawa na mtu anayekata kushuka kutoka kwenye “gari-moshi,” na kukwepa majukumu ya utu-uzima.

 

Pata Kujua Mengi Zaidi

Mswali Ambayo Vijana Huuliza, Buku la 1

Pombe na dawa za kulevya, maadili na ngono, urafiki na mtu wa jinsia tofauti, na uchumba ni miongoni mwa mambo yanayozungumziwa.