Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Wafundishe Watoto Wako

 SOMO LA 11

Waliandika Habari Zinazomhusu Yesu

Waliandika Habari Zinazomhusu Yesu

Je, unawaona watu walio kwenye picha hii?— Majina yao ni Mathayo, Marko, Luka, Yohana, Petro, Yakobo, Yuda, na Paulo. Watu hawa waliishi wakati uleule ambao Yesu alikuwa duniani, na waliandika kumhusu Yesu. Sasa, ngoja tujifunze mambo fulani yanayowahusu watu hao.

Je, unajua watu hawa walifanya nini?

Watatu kati yao walikuwa mitume ambao walihubiri pamoja na Yesu. Je, unawajua watu hao?— Mathayo, Yohana, na Petro. Mtume Mathayo na Yohana walimjua Yesu  vizuri sana, na kila mmoja aliandika kitabu kuhusu maisha ya Yesu. Pia, mtume Yohana aliandika kitabu kinachoitwa Ufunuo, na barua tatu zinazoitwa Yohana wa Kwanza, Yohana wa Pili, na Yohana wa Tatu. Mtume Petro aliandika barua mbili ambazo zinapatikana kwenye Biblia. Zinaitwa Petro wa Kwanza na Petro wa Pili. Katika barua yake ya pili, Petro aliandika kuhusu wakati ambao Yehova akiwa mbinguni sauti yake ilisikika duniani ikisema: ‘Huyu ni mwanangu. Ninampenda sana.’

Watu wengine katika picha hiyo, pia wanatufundisha mambo fulani yanayomhusu Yesu katika vitabu walivyoandika. Mmoja wao anaitwa Marko. Huenda Marko alikuwepo Yesu alipokuwa akikamatwa na aliona mambo yote yaliyotokea wakati huo. Mwingine ni Luka. Luka alikuwa daktari, na huenda alikuja kuwa Mkristo baada ya Yesu kufa.

Waandishi wa Biblia wengine wawili unaowaona kwenye picha hiyo walikuwa wadogo wa Yesu. Je, unajua majina yao?— Majina yao ni Yakobo na Yuda. Mwanzoni, hawakumwamini Yesu. Hata walifikiri kwamba Yesu alikuwa amerukwa na akili. Hata hivyo, baadaye walimwamini Yesu na wakawa Wakristo.

Mwandishi wa mwisho kati ya waandishi hao ni Paulo. Kabla ya kuwa Mkristo aliitwa Sauli. Aliwachukia sana Wakristo, na hivyo akawatendea kwa ukatili sana. Unajua ni jambo gani ambalo lilimfanya Paulo atake kuwa Mkristo?— Siku moja, Paulo alikuwa akisafiri barabarani, na ghafla akasikia sauti kutoka mbinguni ikiongea naye. Ilikuwa sauti ya Yesu! Kwa hiyo Yesu akamuuliza hivi Paulo: ‘Kwa nini unawatendea kwa ukali watu wanaoniamini?’ Baada ya tukio hilo, Paulo akabadilika na kuwa Mkristo. Paulo aliandika vitabu 14 vya Biblia, kuanzia kitabu cha Waroma hadi Waebrania.

Tunasoma Biblia kila siku, sivyo?— Kwa kusoma Biblia, tunajifunza mambo mengi kumhusu Yesu. Je, ungependa kujifunza mambo mengi zaidi kumhusu Yesu?—